• هل أقدر أكفل طفل وأنا مش متزوجة ؟
• أه تقدري طبعًا، القانون بيسمح للآنسات والمطلقات والأرامل بالكفالة طالما فوق سن الـ 30 بعد التأكد من صلاحية وضع المتقدم للطلب مع استيفاء باقي الشروط.
• زوجي مش مصري / زوجتي مش مصرية هل لينا حق الكفالة ؟
• طبعًا، القانون الجديد بينص إن يكون الزوجين مصريين أو أحدهما مصري، مع استيفاء باقي الشروط.
• أنا وزوجتي معانا ثانوية عامة، هل ليا حق الكفالة؟
• طبعًا، القانون الجديد استثنى شرط التعليم الجامعي والكفالة بقت من حق أي زوجين حاصلين على شهادة الثانوية العامة أو ما يعادلها، ويجوز للجنة استثناء شرط للتعليم إذا رأت صلاحية الزوجين للكفالة
مع استيفاء باقي الشروط. الفكرة مش درجه التعليم لإن من حق كل شخص يكفل طفل الفكرة في مدى صالحية الأسر المتقدمه للأمانه المقبلين عليها ومدى جاهزيتهم وجديتهم وده اللي الوزاره بتحرص
حرص كبير جدا إنها تتأكد منه من خلال شروط وإجراءات في صالح الطفل .
• أنا كفلت طفل، ينفع أسافر بيه برا مصر ؟
• طبعًا، بتاخد موافقة وبتسافر عادي جدًا.
• كفلت طفل وزوجتي توفت، هل هقدر أستمر في كفالته؟
• آه تقدر تستمر في كفالته بشكل مؤقت بعد ما تاخد موافقة من اللجنة العليا للأسر البديلة.
• كفلت طفل هل أقدر أسميه باسم زوجي؟
• لأ، بس تقدري تضيفي ليه اسم زوجك الأول فقط، أو لقب العيلة في شهادة الميلاد
مثال : إسم الطفله ليلى . إسم زوجك : أدهم محمد هلالي
إسم الطفلة في الأوراق الرسمية ممكن يكون ليلى أدهم أو ليلى هلالي على حسب إختياركم
• كفلت طفل هل أقدر أحط اسمي كأم في شهادة ميلاده؟
• آه، تقدري تضيفي ليه اسمك الأول فقط في شهادة الميلاد.
• هل أقدر أكفل طفليين أخوات عشان مفرقهمش عن بعض؟
• آه طبعًا تقدري لو عندك القدرة بس بشرط حصولك على موافقة من مديرية التضامن الاجتماعي وفقاً للشروط.
• أنا وزوجتي ٥٠ سنة هل لينا حق الكفالة؟
• طبعًا، ليكم حق الكفالة لحد سن الـ ٦٠، وممكن كمان بعد سن الـ ٦٠ لو أثبت البحث الاجتماعي قدرتكم على الكفالة، مع استيفاء باقي الشروط.
• ايه المبلغ المطلوب إيداعه في حساب باسم الطفل عشان أقدر أكفله؟
• ٣٠٠٠ جنيه مصري.
• هل الطفل المكفول ليه حق الورث؟ وإزاي أأمن له مستقبله ؟
• طفلك بالكفالة ملوش الحق الشرعي في الورث . ولكن طبعا تقدر توصيله في حياتك بجزء من مالك لا يتعدى الثلث وتنفذ الوصية بعد وفاتك وكمان تقدر توهب له أي شيء في حياتك على سبيل الهبة سواء كان عقار أو أملاك أو أي مبلغ أو شيء تاني .
• لو كفلت طفل رضيع، هل لازم أرضعه؟
• لأ طبعًا مش لازم ومفيش إجبار . القرار ده يرجعلك. ولكن الرضاعه بتخلي الطفل طفلك في الرضاعه وده هيشيل كتير تحديات شرعية ليكي ولزوجك في المستقبل .
إذا إختارتي الرضاعه فانتي تقدري ترضعي الطفل عن طريق استدار اللبن بالأدوية وبالمضخة الكهربائية حتى لو إنتي مش متزوجه وده بعد المتابعة مع استشاري الرضاعة.
• إيه هيا مدة الرضاعة اللي تكفي عشان يكون الطفل المكفول ابني من الرضاعة ؟
• خمس رضعات مشبعات قبل سن العامين
• لو مش متزوجة وعايشة مع أهلي ومعنديش شقة خاصة بيا هل هقدر أكفل طفل؟
• هو مش شرط وجود شقة خاصة بيكي، لكن في الآخر القرار بيرجع لقرار اللجنة بعد البحث الاجتماعي بعد البحث العميق ومعرفة تفاصيل كتير ممكن تأثر على الطفل.
• هل عشان أقدر أكفل طفل لازم يكون عندي غرفة منفصلة له ؟
• لأ مش شرط وجود غرفة خاصة بالطفل المهم إن مكان السكن يناسب وجود طفل بشكل صحي و ده بيتم من خلال فريق البحث الإجتماعي اللي بيزور مكان الإقامه.
• أنا راجل مش متزوج هل ليا حق الكفالة ؟
• لا يحق لك الكفالة . من حق الطفل إن الكافل يكون معاه بشكل كبير يهتم بيه ويربيه ووجود الرجل في الشغل بشكل كبير بدون وجود شريكة حياة تشيل معاه المسئولية ديه هيأثر بشكل سلبي على الطفل، الطفل أكيد محتاج أم.
• هل حرام ابني من الكفالة يقولنا بابا وماما؟
• لأ مش حرام، الرسول صلى الله عليه وسلم قال لبشير بن عقربة بعد وفاة أبيه "أما ترضى أن أكون أنا أباك وعائشة أمك؟" طالما لا تقصد بده الأبوة الشرعية.
• هل نقدر نكفل أنا وزوجتي في أول سنة بعد زواجنا؟
• أيوة تقدروا تكفلوا في أي وقت بعد زواجكم طالما سنكم فوق الـ ٢١ سنة
