"أحمد" طفل حركي ونشيط جدًا عمره 10 سنين، تم العثور عليه وهو عمره أيام ومن وقتها وهو عايش في الدار، وفي انتظار أسرة تكفله."
"مروة" بنت جميلة 9 شهور، تم العثور عليها وهي عمرها شهر، ومن وقتها وهي في الدار في انتظار أسرة ترعاها"
سيناريوهات كتير لأطفال بالملايين عايشين بدون أسر في العالم كله، منهم اللي هيتم كفالته في وقت قريب ومنهم اللي هينتظر وقت طويل عشان يلاقي أسرته، أطفال محتلفة بأعمار مختلفة وأشكال مختلفة، كل واحد منهم ليه قصة تختلف عن التاني.
ولأن احنا في "كفالة" بنسعى إن كل طفل يتيم يكون ليه أسرته الكافلة مهما كان سنه أو وضعه أو قصته، فاحنا بنقدم لكم هنا نوعين مختلفين من الأطفال المحتاجين لأسر:
1- الرضع و الأطفال الأكبر سنًا لحد 6 سنوات:
معظم الأسر المقبلة على الكفالة بيكون عندها رغبة في كفالة طفل رضيع صحته كويسة، وبيتمنوا إن دا يحصل انهاردا قبل بكرا، لكن عملية الكفالة ليها شروطها واحكامها وإجراءاتها اللي بتاخد وقتها، وكل ما عرفت أكتر عن نظام الكفالة واستعديت ليه كل ما هتنجح فيه بشكل أسرع وبألم عاطفي أقل.
وبيختلف الأطفال الرضع المحتاجين لأسر في الشكل واللون وفي الحالة الصحية، منهم اللي صحته كويسة جدًا، ومنهم اللي عنده مشاكل صحية بسيطة قابلة للعلاج، ومنهم اللي بيعاني من مشاكل صحية شديدة.
لو عندك رغبة في كفالة طفل رضيع أو طفل أكبر سنًا، فانت بتمشي في إجراءات الكفالة بشكل عادي جدًا لحد ما تاخد الموافقة وجواب المشاهدة وبعدها بتقدر تختار الطفل اللي يناسبك من أي دار رعاية.
طب ليه بعض الأسر المقبلة على الكفالة بتفضل كفالة طفل رضيع عن الأطفال الأكبر سنًا؟؟
في عدة أسباب تانية بتدفع الأسر المقبلة على الكفالة إنها تفضل الأطفال الرضع على الأطفال الأكبر سنًا، زي مثلاً:
١- عندهم رغبة في توفير بيئة إيجابية مستمرة تبدأ منذ الصغر، بسبب اعتقادهم إن دا هيكون ليه تأثير إيجابي أكتر على علاقتهم بطفلهم.
٢- بيحبوا الأطفال الرضع.
٣- عايزين يتعاملوا مع الآثار الناتجة عن الإهمال والإساءة اللي ممكن يكون بيعاني منها طفل أكبر سنًا.
٤- يشوفوا طفلهم وهو بيكبر قدام عينيهم من صغره..
2- أطفال ليهم حالات خاصة:
تاني نوع من الأطفال المحتاجة لأسر هما الأطفال اللي ليهم حالات خاصة.
طب يعني إيه أطفال ليهم حالات خاصة؟؟
يعني:
١- أطفال عندهم مشاكل طبية بسيطة أو خطيرة، قابلة للعلاج أو غير قابلة للعلاج.
٢- أطفال اتعرضوا لسوء المعاملة أو العنف أو الإهمال أو التخلي.
٣- أطفال أكبر من 6 أو 7 سنين حتى 18 سنة.
٤- أطفال أخوات محتاجين لأسرة تكفلهم مع بعض.
٤- أطفال بيعانوا من مشاكل نفسية أو طبية خطيرة.
بعض الناس بتسأل هل مفروض إن الأسر المقبلة على الكفالة تكفل أطفال ليهم حالات خاصة، لأنهم موجودين بشكل كبير ومحتاجين لأسر بصورة أكبر عن غيرهم من الأطفال؟
الإجابة:
مفروض كل أسرة تكفل الطفل اللي عندها رغبة في كفالته، فمثلاً لو أسرة رغبتها إنها تكفل طفل رضيع بصحة كويسة، فمش من الصح إنها تكفل طفل عنده مشاكل طبية، أو طفل كبير في السن
أما لو كانت أسرة من البداية عايزة تكفل طفل ليه حالة خاصة وعارفة كويس إيجابيات وسلبيات اللي هي مقبلة عليه، فمفروض إنها تاخد خطوتها ومتترددش.
طب ايه الدوافع لكفالة طفل ليه حالة خاصة؟
في أسباب كتيرة ممكن تتدفع بعض الأشخاص لكفالة طفل بيمر بمشاكل صحية أو نفسية، أو طفل كبير سنًا، ودي أهم 3 أسباب:
١- عندهم أطفال من نسبهم بالفعل ولسه عندهم طاقة حب يدوها لطفل، مع وجود القدرة المالية لرعاية طفل محتاج لعناية خاصة.
٢- عندهم القدرة على التعامل مع مشاكل الطفل وعندهم قدرة على حلها.
٣- عندهم خبرة طبية أو خبرة في العلاج والدعم النفسي أو في أي مجال ممكن يساعدوا الطفل من خلاله.
طبعا في بعض الأطفال بتتعرض لبعض الإهمال أو العنف أو الاعتداء سواء كان اعتداء جسدي أو جنسي أو عاطفي، المشكلات دي مش بتتحل في يوم وليلة ولا بتختفي تلقائيًا بمجرد ما بيتم كفالة الطفل، لكن كتير منها بيكون قابل للعلاج وبيحتاج بس للوقت والصبر.
كذلك بعض الأسر الكافلة بتبقى عايزة تتجاهل ماضي الطفل، وتتظاهر بإن الطفل اتولد من جديد يوم ما كفلوه، في الواقع دا مش صح تمامًا، ضروري إنكم كأسرة كافلة يكون عندكم توقعات واقعية لنفسكم ولأطفالكم.
ضروري كمان تفكروا في الموضوع من كل نواحيه قبل ما تكفلوا طفل وتلاقوا إن الواقع مختلف تمامًا عن توقعاتكم.
لكن خلينا نطمنكم ونأكد عليكم إن الحب والاهتمام وتوفير احتياجات الطفل وطلب استشارة متخصص في بعض الأحيان، هيساعد بشكل كبير جدًا الطفل اللي ليه حالة خاصة إن حياته تتغير بشكل إيجابي تماماً.
