أحيانًا بعض التعريفات المتعلقة بالكفالة بتبقى غريبة على بعض الناس، وعشان احنا في "كفالة" يهمنا إن الكفالة توصل لكل شخص بالطريقة الصح وإن كل الناس سواء كانوا داخل مجتمع الأسر الكافلة أو خارجه يكونوا فاهمين كويس المصطلحات المتعلقة بالكفالة، بنقدملكم هنا بعض أهم المصطلحات الخاصة بالكفالة و التعريفات المتعلقة بيها:
١-الكفالة:
ضم طفل محتاج أسرة لأسرة كافلة تقوم برعايته وتربيته وتوفير احتياجاته كأنه ابن ليها تمامًا لكن بدون ما ينسب لأسرته الكافلة، وتعتبر الكفالة وسيلة لبناء أسر دائمة زي الحمل والولادة.
٢- التبني:
هو ضم طفل فاقد الرعاية الأسرية لأسرة أخرى تقوم على رعايته لكن بيختلف عن الكفالة في إن الطفل المتبنى بينسب لأسرته المتبنية
يعني بياخد اسم الأب بالكامل واسم الأم بالكامل كأنه ابنهم من نسبهم وطبعا بيترتب على كدا إنه بيرث زي باقي أفراد الأسرة.
والتبني بالمعنى دا محرم شرعاً لأنه بيسبب اختلاط للأنساب وكمان غير قانوني في مصر.
التبني موجود في الدول الغربية زي أمريكا وكندا.
٣- قضايا الكفالة:
هي المشاكل المتعلقة بالكفالة واللي بتشغل بال الأشخاص الكافلين أو أي شخص مرتبط بعملية الكفالة.
٤- مجموعة الأسر الكافلة أو مجموعة دعم الأسر الكافلة:
اجتماع مجموعة أشخاص كافلين أو مهتمين بقضايا الكفالة للاختلاط والتعرف والدعم ومناقشة قضايا الكفالة وتبادل الخبرات.
٥- الأم من النسب أو الأم البيولوجية:
هي الأم اللي ولدت طفل بعد حملها فيه.
٦- الأب من النسب أو الأب البيولوجي:
هو الأب المسؤول عن حمل الأم من النسب في الطفل.
٧- الأسرة البيولوجية:
هي الأسر اللي بتتكون من زوج وزوجة وأولادهم من نسبهم.
٨- الطفل المكفول:
هو الطفل فاقد الأبوين واللي تمت كفالته من خلال أسرة بديلة، الطفل المكفول بيعيش مع أسرته الكافلة طول عمره زي ابنها تمامًا.
٩- الطفل كريم النسب:
هو الطفل اللي تم العثور عليه ولم يستدل على أسرته من النسب، الطفل كريم النسب بيتم إصدار شهادة ميلاد ليه بأسماء وهمية بعد تسليمه لقسم الشرطة وبيتم إيداعه في دار رعاية لحين كفالته داخل أسرة بديلة.
١٠- نظام الأسر البديلة الكافلة:
هو نظام تابع لوزارة التضامن الاجتماعي بيسمح بكفالة أطفال دور الرعاية في البيوت، وهدف النظام دا هو إلحاق الأطفال فاقدي الرعاية الأسرية وخصوصًا الأطفال كريمي النسب بأسر بديلة بيتم اختيارها وفق شروط ومعايير بتأكد صلاحية الأسرة وعدم وجود أي نية لاستغلال الطفل.
١١- الاسترضاع (الإرضاع المستحث):
هو عملية استدرار اللبن من الثدي لإرضاع الطفل بدون وجود حمل أو ولادة عن طريق استخدام الأدوية المدرة للبن ومضخة الثدي، وبتستخدم الأمهات الكافلات عملية الاسترضاع في إرضاع الطفل المكفول خمس رضعات مشبعات لتجنب وجود أي حرج ديني بعد بلوغ الطفل.
١٢- الأسر البديلة:
هو مصطلح يطلق على الأسر اللي بتكفل طفل يتيم في بيتها طبقًا لنظام الأسر البديلة التابع لوزارة التضامن الاجتماعي.
١٣- القابلية الجينية:
احتمال وراثة الطفل لبعض السمات الجينية من الأسرة البيولوجية أو العائلة البيولوجية الممتدة.
١٤- لغة الكفالة الإيجابية:
العبارات والكلمات اللي بتصور الكفالة بشكل إيجابي أو على الأقل بشكل محايد، وتصف الأسر الكافلة على أنها أسر حقيقية لا تقل عن الأسر البيولوجية، زي استخدام تعبير "الأم من النسب" بدل من "الأم الحقيقية"
١٥- دور الرعاية:
هي مسمى يطلق على دور الأيتام اللي بيتم فيها إيداع الأطفال فاقدي الرعاية الأبوية سواء كانوا أيتام الأب والأم أو أطفال كريمي النسب تم العثور عليهم، ومعظم أطفال دور الرعاية هم أطفال كريمي النسب.
١٦- زيارة البحث الميداني:
عملية تتضمن اجراء مقابلات مع الأسر المقدمة على الكفالة في بيوتهم، للكلام معاهم وتوجيه بعض الأسئلة ليهم، ومراجعة أوراقهم المقدمة، والتحقق من المعلومات الطبية والمالية الخاصة بيهم، ولدراسة صلاحية بيئة منزلهم لتواجد طفل فيها، ليتم عمل تقرير بحث ميداني عندهم وتقديمة للجنة المحلية المسئولة عن قرارا الموافقة أو الرفض.
١٧- محضر العثور:
هو محضر بيتم تحريره في قسم الشرطة بعد تسليم الطفل المعثور عليه للقسم، وبيتم تسجيل أي معلومة تخص الطفل وقت العثور عليه زي مكان العثور ويتم تسمية الطفل بأسماء وهمية في القسم وتسجيل الاسم بمحضر العثور.
١٨- خطاب المشاهدة:
هو جواب بيتم تسليمه للأسر المقبلة على الكفالة فور حصولها على موافقة اللجنة بالكفالة، يسمح الخطاب للأسر بزيارة دور الرعاية واختيار الطفل المناسب ليها عشان تكفله في بيتها.
١٩- اللجنة المحلية:
هي اللجنة المسئولة عن اتخاذ قرار الموافقة أو الرفض على طلبات الكفالة للأسر المتقدمة للكفالة من خلال نظام الأسر البديلة، وكل محافظة بيكون ليها لجنة محلية خاصة بيها بتنعقد بشكل دوري لمراجعة طلبات الكفالة والبت فيها، وبتتكون اللجنة من ممثلي الأزهر الشريف ووزارة التضامن الاجتماعي و وزارة الصحة وغيرهم من الوزارات اللي بتهتم بمصلحة الطفل.
٢٠- اللجنة العليا للأسر البديلة:
هي لجنة تتكون من ممثلي جميع الوزارات والهيئات الهامة اللي بتهتم بالطفل ووظيفتها هي البت في التظلمات الخاصة بالأسر اللي تم رفض طلبها والبت في الاستثناءات.
