أسر كافلة كتيرة مش عارفة امتى وليه مفروض تقول لطفلها حقيقة كفالته، وعندهم تساؤلات كتير بخصوص الموضوع دا، واحنا في "كفالة" بندعم إن كل طفل يعرف حقيقة كفالته من أسرته الكافلة بطريقة إيجابية، عشان كدا بنقدملكم هنا معظم التساؤلات اللي بتدور في بال الأسر الكافة بإجاباتها.
1- امتى مفروض أقول لطفلي حقيقة كفالته؟؟
في آراء وأبحاث كتير اتعملت في النقطة دي، بس أحدث الأبحاث بتقول إن مفروض الطفل يعرف عن حقيقة كفالته من أول يوم يدخل فيه بيتك، وإن مفروض الطفل ميعديش المرحلة السنية من 3-5 سنين من غير ما تكون بدأت تتكلم معاه عن حقيقة كفالته وبدأت تحط أساس لمحادثات مفتوحة ودايمة بينك وبين طفلك عن كفالته، بحيث الطفل ميبقاش عرف الحقيقة في يوم معين يفضل فاكرهُ طول عمره، ويكبر على الحقيقة دي يوم بعد يوم.
2- إزاي هقول لطفلي حقيقة كفالته من أول يوم وهو رضيع ومش هيفهمني؟
طفلك مش ضروري يفهمك في سنواته الأولى، انت بتعود نفسك في سنوات الرضاعة على الكلام عن الكفالة عشان يسهل عليك الكلام بعد كدا لما طفلك يكبر شوية ويبدأ يفهمك ويسألك، وكمان عشان طفلك يعتاد على المصطلحات المتعلقة بالكفالة، بالإضافة لكدا الطفل في مرحلة الرضاعة بيكون عنده قدرة على الاحساس بنبرة صوتك وانت بتحكيله عن فرحتك بوجوده وإنه بقى ابنك أخيرًا.
3- هيحصل ايه لو استنيت لحد ما ابني يكبر ويكون قادر يستوعب كلامي وبعدين أقوله حقيقة كفالته؟
اللي هيحصل إن الطفل هيحس إنك كنت بتكذب عليه وبتضلله كل السنين دي وهيفقد ثقته فيك، ووارد جدًا إنه يعرف الحقيقة من أي حد تاني من العيلة قبل ما انت تقولهاله ووقتها هيكون صعب تستعيد ثقة طفلك فيك تاني، كمان أثبتت الأبحاث إن الطفل اللي بيعرف حقيقة كفالته في سن متأخر بيكون مستوى رضاه عن حياته أقل من الأطفال اللي عرفت في سن مبكرة وبيكون احساسه بالضيق أو الحزن في حياته بشكل عام أكبر من الطفل اللي عرف في مرحلة مبكرة، فالأفضل لصحة طفلك النفسية إنه يكبر وهو مدرك حقيقته وهويته عشان يقدر يتقبلها ويتعايش معاها.
4- هل كفاية إني أقول لطفلي حقيقة كفالته في مناقشة واحدة بيني وبينه؟
مش مطلوب منك تقول لطفلك حقيقة كفالته وتسيبه يعيش مع تساؤلاته واستفساراته طول حياته من غير ما تشبع فضوله وتعرف هو بيفكر في إيه، انت مطلوب منك تفتح حوار كامل ومحادثة دايمة بينك وبين طفلك عن حقيقة كفالته وتفاصيلها، مطلوب منك إنك تكون متاح للرد على أسئلته واستفساراته بدون ما تحسسه بالضيق، مطلوب منك تقوله كل المعلومات اللي تعرفها عنه قبل كفالته بطريقة تناسب سنه، مطلوب تدعمه وتعرفه إن كفالته مش شيء يخجل منه، وإن الكفالة ما هي إلا وسيلة لبناء الأسر
5- ينفع أخبي عن طفلي بعض تفاصيل كفالته اللي عارفة إنها هتضره وهتأثر على نفسيته؟
مش من حقك تخبي عن طفلك أي حاجة انت عارفها عن حياته قبلك، هو محتاج يعرف أصله وبدايته حتى لو كانت معلومات سصعبة في وجهة نظرك، الطفل لما يعرف الحقيقة أفضل من إنه يتخيلها، لأن غالبًا خياله هيخليه يتصور الأسوء دايمًا، لو حاسس إن سن طفلك مش مناسب إنه يعرف المعلومة دي بسطهاله وقوله لما تكبر شوية هفهمك أكتر، ولما يوصل لسن مناسب قولهاله، أهم حاجة ميبقاش كلامك متناقض في مرحلة سنية عن المرحلة اللي بعدها وإن مع وصول لطفلك لمرحلة المراهقة يكون عرف كل الحقايق المتعلقة بقصة كفالته.
6- طفلي عدا 5 سنين ومقولتلوش أي حاجة بخصوص حقيقة كفالته؟
لسه عندك فرصة تبدأي، ابدأي بقصص وقت النوم عن الكفالة، في المرحلة دي طفلك هيبقى عنده استيعاب معقول إنه يفهمك، وبعد القصص ابدأي احكيله أجزاء من قصته واحدة واحدة، وهو هيوجهلك أسئلة كتيرة جدًا هتساعدك إنك تكشفيله الحقيقة بالطريقة اللي تناسب سنه.
