مين فينا متبرعش في يوم من الأيام لدار أيتام
بس يا ترى مين فينا فكر هل التبرعات دي أفضل حل للأطفال ؟
منقدرش ننكر إن كتير من دور الرعاية في مصر قايمة بشكل أساسي على التبرعات وإن دور دور الرعاية مهم جدا في إن الأطفال متكونش في الشارع
التبرعات ماهي إلا وسيلة لتوفير احتياجات مادية للطفل زي أكل وشرب ولعب ولبس، لكنها مش بتوفر مشاعر مهمه وإحتياجات أساسيه نفسيه و عاطفيه وإجتماعيه زي الحب و الرعاية والحنان والاهتمام والأسرة .
مش بتدعم نمو الطفل العاطفي، ولا بتأهله مجتمعيًا أو نفسيًا كما يجب أن يون
احنا مش بنقلل من قيمة التبرعات لدور الأيتام بس احنا بندور على وسيلة توفر للطفل حياة أفضل فعليًا مش ظاهريًا
هيستفيد إيه الطفل من التجديدات اللي بتحصل في شكل الدار من برا من فلوس التبرعات وهو من جوا نفسيته محتاجه دعم
هيستفيد إيه من لعبة جديدة وهو فاقد الثقة في نفسه، فاقد الحب من أم وأب وجيران وعيلة.
علشان كدا اكفلوهم لو عندكم القدرة ، ضموهم لبيوتكم ولأسركم ووفرلهم البيت والحب والدعم، عيشوهم جو الأسرة والدفا اللي فيه.
و لو مش هتقدروا ادعموا الأسر الكافلة البديلة، ادعموا الفكرة عشان يبقى لكل طفل أسرة قادرة توفر له الحنان والاشباع العاطفي والنفسي اللي محتاجه كل طفل
أحسنوا في عملكم، لأن مش معنى إنك اتبرعت إنك عملت اللي عليك طالما عندك القدرة على إنك تعمل أفضل
متختارش الطريق الأسهل وتقول أنا عملت اللي عليا..
الفكرة مش فلوس، الفكرة في مستقبل طفل إنتا ممكن تدعمه ، الفكرة في حل دايم مش مؤقت، حل يضمنلهم حياة كريمة ومستقبل أفضل زي أي طفل غيرهم ليه أب وأم وأسرة وعيلة .
