لو انتي آنسة، أرملة أو منفصله وقررتي تكفلي طفل، فا إطمني دي حاجة طبيعية وبتحصل وحصلت قبلك ونجح فيها سيدات كتير في مصر ، انتي مش بتعملي شيء غريب ولا شيء خارق للطبيعة، هو جايز يكون غير مألوف في مجتمعنا لكنه متاح وبيحصل وحصل بالفعل
إذا كنتي بتفكري في الكفالة . بننصحك قبل ما تاخدي قرارك إنك تفكري في ٥ نقاط مهمين جدا :
1- أهدافك في الحياة:
لو حاسة إنك لسه محققتيش أهدافك المهنية والشخصية في حياتك، ففكري كويس إزاي كفالة الطفل هتأثر على قدرتك على تحقيق أهدافك وطموحاتك، وحددي اولوياتك كويس، وخدي القرار السليم . قرار كفالة طفل مش قرار بسيط وتأثيره كبير على كل حياتك ولازم يكون قرار مسئول .
2-شبكة الدعم:
لو هتكفلي طفل فانتي محتاجة لشبكة دعم من أهلك او من أصدقائك، لأن من غير شبكة دعم هيبقى صعب عليكي تطلبي المساعدة من أي حد تاني ، يعني مثلًا ممكن يكون صعب عليكي تسوقي أو تجيبي احتياجات بيتك خصوصًا لو كان الطفل في مرحلة الرضاعة، وجود شبكة دعم هيخليكي تطلبي المساعدة منهم في أي وقت وانتي مرتاحة .
فكري مين هما افراد شبكة الدعم الخاصة بيكي و إعرفي حدود الدعم اللي ممكن يقدموه بشكل حقيقي
3- دخلك المالي:
بصفتك إنتي عائل أسرتك الوحيد، فاحساسك بإنك المسؤول المالي الوحيد عن حياة طفلك ممكن يكون صعب شوية، طبعًا انتي مش محتاجة تكوني ثرية أو من أسرة غنية عشان تقدري تكفلي طفل، بس انتي محتاجة تكوني مستقرة ماديًا وقادرة على إعالة نفسك وطفلك، فكري كويس وحطي خطة إزاي هتقدري تغطي نفقاتك انتي وطفلك على المدى القريب وكمان على المدى البعيد، أو لو محتاجة تحوشي مبلغ معين قبل كفالة طفلك .
4- الوظيفة:
لو هتكفلي طفل فانتي محتاجة لوظيفة في الغالب عشان تعولي منها طفلك ونفسك، فهل وظيفتك الحالية هتتوافق مع وضعك كأم، هل هتقدري تاخدي أجازة أول ما يوصل طفلك البيت عشان تستقروا سوا فترة ومين هيقعد مع الطفل في فتره شغلك . هل هتقدري تكفلي طفل رضيع ولا الأفضل عشان وظيفتك إنك تكفلي طفل في سن المدرسة ؟ كل التفاصيل ديه مهمه جدا وهتخليكي تشوفي الموضوع بشكل واقعي
5- الجواز :
ممكن ميكنش في نيتك تكملي حياتك بدون شريك حياة للأبد، في الحالة دي انتي محتاجة تعرفي إن الطفل ممكن ياخد كل وقتك واهتمامك لشهور وممكن سنين كمان عشان يحس بالأمان تمامًا معاكي، محتاجة تعرفي هتقدمي طفلك إزاي للشخص اللي هيتقدملك وإزاي هتقدري تشرحيله فكرة الكفالة وتعلميه إزاي يقدر يدعم احتياجات طفلك
لو عند استعداد تقومي بكل دا، فانتي غالبًا هتقدري... وعمومًا متخليش التخوفات تمنعك من إنك تاخدي رأي أو مشورة حد مر بالتجربة قبلك
