كل يوم فيه ٢٠ طفل بينضم لدور الرعاية

أطفال تبحث عن أسرة

تعرف على الأطفال وغير حياتهم للأبد

تمت الكفالة

عبد الرحمن (بودي)

تاريخ الميلاد ١٣ يونيو ٢٠١٦

بودي نفسه يطلع طيار و بيحب ياكل الكابتشو .كريم (بيعزم علينا بالأكل) منظم (بيرجع الحاجات لمكانها) بيساعد أخواته الصغيرين في الدار في الأكل بيحب يروح الحضانة

يبحث عن اسرة

أمجد

تاريخ الميلاد : ١٦ أكتوبر ٢٠١٦

أمجد بيحب البطاطس المحمرة . متكلم وبيحب التواصل ويندمج في الكلام جدا . بيحب لعب البولينج واللعب على الحصان الهزاز بيحب التلوين أوي

تمت الكفالة

علي

تاريخ الميلاد : ٢٥ أغسطس ٢٠١٩

علي طفل حساس – هادي – علي بيحب الألعاب الصوتية جدا وبيتؤثر بالموسيقى بشكل كبير

تمت الكفالة

ليلى

تاريخ الميلاد : ٨ ديسمبر ٢٠١٩

ليلى اجتماعية جدًا جداً . طفلة سعيدة بجد طول الوقت بتضحك وعايزة تلعب مع أخواتها ومع الأمهات البديلات في الدار . عندها عروسة محدش يقدر يقرب منها لأنها المفضلة ليها و بتحب تلعب بيها أوي

يبحث عن اسرة

عبد الله

تاريخ الميلاد : ٤ أكتوبر ٢٠١٩

عبد الله طفل هادي و بيحب يسمع الموسيقى أوي عبد الله لعبته المفضلة فيل صغير بيحب يتواصل معاه ويلعب مع صديقه الفيل

يبحث عن اسرة

دنيا

تاريخ الميلاد : ١١ مارس ٢٠٢٠

دنيا طفلة حركية ونشيطة بتحب اللعب جدًا . دمها خفيف أوي و ضحكتها عايزة تلعب طول الوقت . بتضحك أول ما تسمع اسمها وبتحب تسمع الأغاني

تمت الكفالة

مروان

تاريخ الميلاد : ١٩ أغسطس ٢٠١٩

مروان دايماً عايز حد يلعب معاه . هو طفل هادي جدًا . بتشده الألعاب الملونة وبيحب يلعب بعربيته الزرقا اللي مبتسلمش من الخبط والحوادث المرورية الكتير

تمت الكفالة

سليم

تاريخ الميلاد :٨ سبتمبر ٢٠١٩

سليم طفل إجتماعي أوي . بيحب الناس جدًا وبيندمج بشكل جميل وليه ضحكة تخطف القلب . بيتعصب بسهولة لو غلست عليه بس لو ندهت عليه بإسمة يتكسف ويبتسم لك . سليم عيونه جميلة وبتضحك

تمت الكفالة

يوسف

تاريخ الميلاد : ٢٩ أغسطس ٢٠٢٠

يبحث عن اسرة

ياسين

تاريخ الميلاد : ٩ يوليو ٢٠٢٠
تاريخ الإنضمام للدار : ٩ أغسطس ٢٠٢٠

ياسين طفل كل الدار بيحبه . حنون و جميل . لما تبص لعنيه تحس بحنان و حب كبير

تمت الكفالة

مدحت

تاريخ الميلاد :٢٥ نوفمبر ٢٠١٧

مدحت طفل اجتماعي ومحبوب جدًا
مدحت طفل منظم وبينظف مكانه بعد ما ياكل أو يلعب
أكتر أكله مفضلة لمدحت هي الخيار

تمت الكفالة

زينة

تاريخ الإلتحاق بالدار:١٧ أغسطس ٢٠٢٠

زينة طفلة فضولية ومشاغبة جدًا
زينة بتحب دبها الأصفر وبتاخده في حضنها وقت النوم

تمت الكفالة

آلاء

تاريخ الميلاد : ٤ أغسطس ٢٠٢٠

يبحث عن اسرة

فرح علاء مرسي

تاريخ الميلاد: 12 سبتمبر 2018

 
فرح اسمها في الدار الطفلة السعيدة
فرح اسم على مسمى
فرح طول الوقت بتغني وتدندن
فرح مزاجها رايق والضحكة على وشها علطول
فرح بنوته طيبة جدا
فرح بتحب الألعاب الموسيقية
لو هتزور فرح هاتلها لعبة موسيقية
فرح تبحث عن أسرة تكفلها في بيتها
 

يبحث عن اسرة

آدم درويش رفعت

تاريخ الميلاد: 30 يوليو 2018

آدم أو زي ما بيدلعوه (ويوي) طفل هادي وطيب جداً
آدم لماح وذكي وكريم جداً
آدم بيحب الأكل خصوصاً الموز و الفروالة
آدم كمان بيحب الألعاب الموسيقيه و عنده حس موسيقي عالي
لو هتزور آدم هاتله أي لعبة موسيقية
آدم يبحث عن أسرة تكفلة في بيتها
 

يبحث عن اسرة

رامي تامر مصعب

تاريخ الميلاد: 16 أكتوبر 2018

رامي طفل حنين جدًا وذكي

رامي طفل مطيع وبيحب أخواته  في الدار ودايمًا بيدافع عنهم

رامي طفل اجتماعي وبيتعلق بالأشخاص بسرعة

رامي بيحب يلعب بالمكعبات

وأكلته المفضلة هي الجبنة النستو

رامي يبحث عن أسرته تكفله في بيتها

يبحث عن اسرة

بلال خالد سعيد

14 فبراير 2019

بلال طفل هادي وحساس جدًا
بلال قلبه طيب وبيتراضى بسهولة
بلال بيحب جدً لعب الكرة
ومشروبه المفضل عصير التفاح
بلال يبحث عن أسرة تكفله في بيتها

يبحث عن اسرة

أدهم فادي مازن

24 فبراير 2019

أدهم طفل  مطيع وطيب جدًا
أدهم بيتعصب بسهولة بس بيهدا بسرعة
أدهم بيحب الأكل جدًا
ولعبته المفضلة هي المكعبات
أدهم يبحث عن أسرة تكفله في بيتها

يبحث عن اسرة

مصطفى محمد محمود

10 مايو 2019

مصطفى طفل هادي وحساس،
مصطفى بيحب النوم جدًا، وطول ما هو صاحي عايز يلعب
مصطفى طفل طيب أوي ولو شفته هتحبه من ابتسامته الجميلة
مصطفى يبحث عن أسرة تكفله في بيتها

يبحث عن اسرة

يوسف أيمن رزق الله

تاريخ الميلاد: 8 نوفمير 2018

يوسف طفل دمه خفيف ومرح جدًا
يوسف طفل ذكي واجتماعي
يوسف بيحب الألعاب الصوتية والبونبون هو نقطة ضعفه
يوسف يبحث عن أسرة تكفله في بيتها

يبحث عن اسرة

يوسف جمال خليل

13 مارس 2019

يوسف طفل حنين جدًا
أول ما يشوفك يجري عليك عشان يحضنك ويطبطب عليك
يوسف بيحب الونس وبيحب يلعب بالعربيات جدًا
يوسف يبحث عن أسرة تكفله في بيتها

يبحث عن اسرة

وليد شادي السيد

تاريخ الميلاد: 14 مارس 2017

وليد طفل وسيم جدًا وغمازاته تخطف قلب أي حد يشوفه
وليد طفل محبوب ومنظم،
وليد أنيق جدًا ومش بيحب يخرج من غير ما يلبس ساعته،
ولعبته المفضلة هي العربيات
وليد يبحث عن أسرة تكفله في بيتها

يبحث عن اسرة

أيمن هاني أشرف

تاريخ الميلاد: 27 ديسمبر 2018

أيمن طفل وسيم وطيب جدًا
أيمن بيحب يلعب طول الوقت
أيمن بيتعلق بألعابه جدًا وخصوصًا الألعاب الموسيقية
أيمن يبحث عن أسرة تكفله في بيتها

يبحث عن اسرة

علي عادل سيد

تاريخ الميلاد: 11 مايو 2018

على طفل هادي ودمه خفيف جدًا
علي طفل مطيع وفي حاله جدًا
علي بيحب الميا والعصاير جدًا
ولعبته المفضلة هي المكعبات

تمت الكفالة

إبراهيم فاروق متولي

تاريخ الميلاد: 20 مارس 2019

إبراهيم طفل مرح جدًا
بيحب الضحك والهزار
ودمه خفيف جدًا جدًا
بيحب الألعاب الصوتية
وبيحب الفواكه والعصاير جدًا

يبحث عن اسرة

وليد عبدالله عبد الحميد

تاريخ الميلاد: 8 ديسمبر 2017

وليد طفل اجتماعي ومرح جدًا
وليد دمه خفيف وبيرتبط بالأشخاص بسهولة
وليد بيقول "أنا بحب المذاكرة ونفسي أطلع دكتور
وليد بيحب الحضانة جدًا ولعبته المفضلة هي كرة القدم
وليد يبحث عن أسرة تكفله في بيتها

يبحث عن اسرة

أبو القاسم محمد مصطفى

تاريخ الميلاد: 24 إبريل 2018

أبو القاسم طفل حنين واجتماعي جدًا
أبو القاسم طفل متعاون ودايمًا بيساعد أخواته في الدار
 ولعبته المفضلة هي العربيات
أبو القاسم يبحث عن أسرة تكفله في بيتها

يبحث عن اسرة

حامد صابر حمزة

تاريخ الميلاد: 06 مايو 2018

حامد طفل هادي ومطيع
حامد مميز جدًا في الحضانة
حامد طفل خجول
حامد بيحبب أفلام الكرتون وأغاني الأطفال
حامد يبحث عن أسرة تكفله في بيتها

يبحث عن اسرة

تامر علي عوض

تاريخ الميلاد: 13 أكتوبر 2018

تامر طفل بريء جدًا وبيحب اللعب
تامر لعبته المفضلة هي العربيات
 تامر بيحب الخضروات جدًا
تامر يبحث عن أسرة تكفله في بيتها

يبحث عن اسرة

زياد خيري سالم

تاريخ الميلاد: 8 سبتمبر 2018

زياد طفل حنين ووسيم جدًا
زياد ابتسامته تخطف قلبك
زياد طفل اجتماعي وأول ما يشوفك يحضنك
زياد هتحبه بمجرد ما هتشوفه
زياد محتاج أسرة تكفله في بيتها

يبحث عن اسرة

معتز حازم سامح

تاريخ الميلاد: 1 مايو 2018

معتز طفل خجول جدًا
معتز بيحب الأكل جدًا وخصوصًا الرز والفراخ
معتز بيحب يلعب بالعربيات والألعاب المضيئة
اسم الدلع بتاعه في الدار "موزة"
معتز يبحث عن أسرة تكفله في بيتها

يبحث عن اسرة

مؤيد منصور عبدالله

1 فبراير 2019

مؤيد طفل ذكي واجتماعي جدًا
مؤيد وبيرتبط بالأشخاص بسرعة
مؤيد بيحب اللعب والجري
وبيحب الألعاب المضيئة والعربيات
مؤيد يبحث عن أسرة تكفله في بيتها

يبحث عن اسرة

هيثم نجار سعيد

تاريخ الميلاد: 5 فبراير 2019

هيثم طفل خجول وابتسامته جميلة جدًا
هيثم بيحب يلعب بالكرة، وبيحب أفلام الكرتون
هيثم طفل ذكي ومحبوب جدًا
هيثم يبحث عن أسرة تكفله في بيتها

يبحث عن اسرة

مروان عمر يوسف

تاريخ الميلاد: 2 ديسمبر 2018

مروان طفل هادي ومطيع
مروان طفل اجتماعي وبيندمج بسهولة مع الأشخاص الجداد
أسعد وقت بالنسبة لمروان لما ينزل الجاردن ويلعب في الزوحليقة
مروان يبحث عن أسرة تكفله في بيتها

يبحث عن اسرة

معاذ إسماعيل إبراهيم

تاريخ الميلاد: 13 مارس 2019

معاذ طفل اجتماعي وذكي
معاذ طفل مميز جدًا في الحضانة
معاذ ضحكته جميلة وتخطف القلب
معاذ بيحب الموز جدًا
ولعبته المفضلة هي عربيات السباق
معاذ يبحث عن أسرة تكفله في بيتها

يبحث عن اسرة

أحمد كريم راضي

تاريخ الميلاد: 20 سبتمبر 2017

أحمد طفل حنين وكريم جدًا
أحمد طفل هادي وخجول
أحمد بيحب سبايدر مان أوي ونفسه يطلع ظابط لما يكبر
وأكتر فاكهة مفضلة بالنسباله هي التفاح
أحمد يبحث عن أسرة تكفله في بيتها

يبحث عن اسرة

علاء فايز نعيم

تاريخ الميلاد: 6 سبتمبر 2017

علاء طفل حنين وبيخاف جدًا على أخواته في الدار
علاء طفل مميز في الحضانة وخطه جميل جدًا
علاء بيحب المذاكرة ونفسه يطلع دكتور
علاء يبحث عن أسرة تكفله في بيتها

يبحث عن اسرة

مالك جمال حسن

تاريخ الميلاد: 17 سبتمبر 2017

مالك طفل ذكي وطيب جدا
مالك بيحب أخواته في الدار جدًا
مالك بيحب يلعب بالمسدسات وبيحب أفلام الكرتون جدًا
والفواكه هي أكلته المفضلة
مالك يبحث عن أسرة تكفله في بيتها

قصص ناجحة

أنا أمنية المشد

"انتي صدقتي الجارية يا أمنية، و علمي اللي هينتفع به، و الولد الصالح اللي هيدعيلي."
أنا أمنية، متخرجة من ألسن و بعشق اللغات و الأدب، بشتغل في شركة تكنولوجيا عالمية، كاتبة روائية، و مكفولة من و أنا عندي ٥ شهور ودلوقتي عندي ٢٦ سنة ودي جملة بابا قالهالي عمري ما هنساها.
أنا وعيت و أنا عارفة إني مش الابنة البيولوجية لأهلي، و برضه وعيت على إنهم هما أهلي الحقيقيين و ماليش غيرهم. هما أهلي اللي كل يوم الصبح أصحى أشوفهم و أقضي اليوم معاهم زي أي طفل تاني.
هما اهلي اللي سهروا معايا و أنا تعبانة و اتخانقوا معايا عالمذاكرة و أوضتي المكركبة، هما أهلي اللي دلعوا و كبروا و ربوا.
الحوار بيننا في الموضوع ده (الكفالة) كان على طول سلس ، ماكانش فيه أي حساسيات، ف لما حبيت أفهم أكتر و أنا كبيرة شوية سألت بابا أكتر و قعد شرحلي إزاي و ليه قرروا ياخدوا الخطوة دي و يحتضنوني، و ده ماغيرش حاجة جوايا عشان أنا أصلا كنت عارفة، ف التفاصيل مافرقتش معايا عشان يبقى الحال على ما هو عليه: هما أهلي.
ماكنتش بقول للناس في الأول على قصة كفالتي عشان كانوا خايفين عليا من رد فعل الناس اللي بتهاجم أي فكرة غريبة أو غير مألوفة أو عن جهل ، و بدأت أقول و أنا في الجامعة عشان كنت فخورة بيهم و عايزة صحابي كمان يبقوا فخورين بيهم، و عشان دي مش حاجة اتكسف منها خالص. ردود الفعل كانت بنسبة كبيرة جدا ايجابية، لحد ما بعض الأشخاص حكوا لأهاليهم اللي بيفكروا بطريقة مختلفة شوية، قالولهم إن وضعي و عيشتي دي حرام، ف جم نقلوا الكلام ده ليا لما السيرة اتفتحت، و طبعا رد فعلي كان منفعل جدا، و الناس اعتذرت و لما فعلا شافوا تعامل أهلي معايا شافوا قد إيه دي حاجة كويسة و نبيلة و رحيمة.
نيجي بقى لأول كام شهر بعد التخرج و ابتديت أهو أقف على رجلي، تحصلي أكبر صدمة في حياتي حتى يومنا هذا: وفاة بابا. اللي يعرفني و لو معرفة سطحية جدا، يعرف قد إيه بابا ده كان من أهم الأشخاص اللي في حياتي، و كان سندي في الدنيا و من أقرب الناس ليا، ماكانش أب عادي باخد منه الفلوس وخلاص ومكنش أب يتخاف منه و عامل رعب في البيت ، لأ بابا كان له دور كبير قوي في تربيتي و تكوين شخصيتي، و كان صاحبي اللي برغي معاه و بحكيله أي حاجة و كان دايماً يسمعني و ينصحني.
فجأة بابا اختفى. بقى مش موجود في حياتي. ساعتها بجد الدنيا ضلمت.
هو لسه عايش معايا وجوايا وجمله الكتير بتتردد في ودني وفي عقلي.
علاقتي بماما مش هيعبر عنها أي كلام بس الأكيد إن علاقتنا كل يوم بتبقى أقوى بكتير ، عشان فعليا احنا مالناش غير بعض، و هي صاحبتي الأولى اللي برغي معاها في أي حاجة و كل حاجة.
أنا ليه بكتب قصتي؟
أنا هنا عشان اطمن كل أسرة كافلة وكل اسرة عاوزة تكفل
أنا جاية من المستقبل وبقول لكم اللي بتعملوه ده صح.
القرار اللي بتفكروا تاخدوه ده او اللي اخدتوه فعلا من أحسن و أنبل القرارات اللي ممكن تاخدوها في حياتكم.
إنك تنقذ حياة ناس مالهاش حد في الدنيا دي و ممكن ربنا يبقى باعتكم ليهم من السما إو باعتنا ليكم من السما.
عشان أقول لكل الناس اللي زيي، ماتتكسفش ولا تخجل. انت مش غلط. ولا أهلك غلط. خليك فخور بنفسك و بأهلك و بكفالتك.
إنضموا ليا عشان ننشر الفكرة و نخليها حاجة عادية في مجتمعنا ، حاجة مجتمعنا يبقى بيشجعها اصلا. كل طفل من حقه يكون ليه أهل، و كل شخص من حقه يبقى له أب أو أم
انقذوا الطفل ده و هو هينقذكوا معاه.
انشروا الفكرة.

قصة كفالة وداد

أنا مامت وداد، أنا آنسة بس بقيت ماما..

حكايتي مع وداد مختلفة شوية وحصلت بطريقة تختلف كتير عن معظم قصص الكفالة

الحكاية بدأت لما أخدت قرار بإني أزور دار ايتام من باب عمل الخير

كان كل نيتي في البداية إني أزور دار أيتام و أحاول بقدر الامكان إني أروح زيارة يوم كل اسبوع عشان اساعد الأولاد في المذاكرة وأقضي وقت سعيد معاهم وأشوف إيه احتياجاتهم وأقدر أوفرها قد الإمكان

أول دار روحتها اكتشفت ان الأولاد فيها أطفال صغيرين ورضع ومفيش فيها أطفال كبار

بس أنا حبيت المكان أوي و حسيت براحة جدا لما دخلته.

قصتي مع وداد بدأت من أول ما دخلت الدار من وسط ٢٠ طفل، لقتني بروح عندها وبشيلها في حضني و هي فضلت ماسكة فيا لحد ما مشيت. وقتها كان عندها ٥ شهور 

فضلت أزور الدار أسبوعياً وبقيت كل زيارة أدور عليها عشان بس أحضنها، لحد ما أخدت قرار اني أتحمل مسئوليتها وهيا في الدار و بقيت اروحلها وأخرجها و حبيتها جدا واتعلقت بيها جدا

و بعد فترة سالت عن حاجه زي التبني وعرفت بنظام الكفالة الخارجية اللي هو اسمه نظام الأسر البديلة 

بدأت اعرض الموضوع علي عليتي طبعاً في الاول الموضوع كان غريب عليهم و مقدروش يتقبلوه لأني لسه آنسة معنديش أي مشكلة تمنع الزواج أو الحمل.

لكن أخدت قراري بإني لازم اقنعهم و بالفعل بدأت أعرف أهلي على وداد وأقربهم منها لحد ما حبوها واتعلقوا بيها

وقتها كانت وداد تمت سنة.

لكن للأسف وقت ما كنت قربت أقنع أهلي كان في أسرة بتعمل ورق وداد عشان تكفلها.

وقتها قولت يمكن ربنا ليه حكمة في كده او إني يمكن اتسرعت في قرار الكفالة لكن في نفس الوقت حسيت اني ضيعت حاجه كبيرة قوي مني، كأني ضيعت حتة مني حبتها حب مفيش مخلوق ممكن يتخيله .

و فعلاً بدأت أتواصل مع الوزارة وأثبت اني متكفلة بيها من سن ٥ شهور عشان آخذ أنا الموافقة، وقررت أبدأ في اجراءات الكفالة وفعلاً اتعمل لجنة و أخيرآ أخدت الموافقة.

أنا ربنا بعتني ليها لسبب و هي كمان جتلي في وقت كنت محتاجاها فيه.

أنا اتهاجمت كثير بس الحمد لله في برضو ناس شجعتني، وأهلي دلوقتي بيحبوها أوي.

انا حبيت اشارك قصتي علشان اشجع أي شخص علي فكرة الكفالة وأعرفه إنه عادي انه يبقى متخوف أو متردد في البداية

بس لو ربنا رزقك بالخطوة ديه و حسيت انها بتكمل بسهولة اعرف ان ربنا اختارك لحاجة عظيمة

انا اخترت وداد علشان هي تستاهل ان حد يختارها 

تستاهل إن حد يحبها و هفضل طول عمري أشكر ربنا على مكافئته ليا بـ "وداد"

وداد هي فرحة حياتي و أحلي حاجه انا حققتها في حياتي و الحاجه الحلوة الي هتديني دافع أكمل و أكون شخص أفضل عشان اكون قدوة ليها.

أنا نفسي كمان ان الناس اللي عايزة تكفل مش لازم تختار طفل صغير أو رضيع.

اختار الطفل الي قلبك يحبه و يرتاح له

انزلوا شوفوا الأولاد وقضوا معاهم وقت مهما كان سنهم

اختار الطفل الي يختارك

أنا وداد هي اللي اخترتني مش أنا اللي اختارتها.

قصة صفاء مامت مريم

"للأسف يابنتي مفيش أمل في الخلفة "

جملة عمري ما هنساها قالهالي دكتور لما قولناله طب نسافر بره 

أنا صفاء مامت مريم من سوهاج عمري ٣٤ سنة وبشتغل مدرسة كمبيوتر 

قصتي مع مريومة بدأت بعد جوازي ب ٩ شهور لما إكتشفنا إن زوجي بيعاني من عدم الإنجاب . 

أنا كان نفسي جداً في طفل . مكنتش قادرة أنتظر . الإحساس كان قوي جداً جوايا ومتعمق في كياني .

أفتكر وقتها كنت بحب أزور الأطفال أوي في دور الأيتام كنت بقضي وقت طويل من يومي معاهم . 

٤ سنين عدت وأنا بصارع الإحساس اللي جوايا ٤ سنين كانت كفيلة إني اخود القرار اللي كنت بفكر فيه كتير.

قرار إني أكفل طفل يتيم في بيتي . 

طبعاً كان فيه إعتراض كبير جداً من أسرة زوجي وحتى زوجي كان متردد . بس أنا أصريت على قراري وبدأت فعلا أدور على شروط الكفالة . مش هنسى ساعتها إن كان فيه شرط إنه لازم يمر اكتر من ٥ سنين جواز علشان تقدر تقدم على الكفالة . بصراحه مقدرتش اصبر على السنه اللي فاضله ديه . قررت إن أعمل تظلم و اخود بالأسباب وسبحان الله في النهاية تم الموافقة على إلغاء الشرط في يناير ٢٠١٦ .

وبدأت رحلة الإجراءآت من شهر فبراير والحمد لله اخدت الموافقه بعدها ب ٣ شهور .

حكايتي مع مريم ابتدت من وهي ٨ شهور، يوم ما شوفتها قلت لنفسي "هي دي يا صفاء . هيا ديه بنتك " بالرغم من إني مكنتش لسه قدمت ورقي ولا حتى أخدت الموافقة . بس فعلاً حبها فجأة دخل قلبي بدون أي مقدمات و فعلا مقولة "إنتي بنت قلبي" حقيقة بحس بيها كل يوم . 

أنا فضلت مع مريم في الدار لحد ما أخدت الموافقة وكفلتها وهي عمرها سنة ونص .

للأسف الشديد أسرة زوجي مكنتش متقبلة مريم خالص وفضلنا في مشاكل كتير بسبب الموضوع ده ، لحد ما مريم كملت ٤ سنين قررنا الانفصال أنا وزوجي. 

أنا قررت أكمل لوحدي لأنها بنتي اللي بحبها وحاسة تجاهها بالمسؤولية الكاملة وعمري ما هفرط فيها ، ولأني مقتنعة تمامًا بالقرار اللي أخدته.

بكفالة مريم حياتي إتغيرت للأفضل تمامًا ، مشاعر كتير جميلة بحسها معاها كل يوم والمشاعر ديه بتكبر يوم بعد يوم ، زي شعور إني كل شيء بالنسبالها ، وهي كل شيء بالنسبالي . شعور إن في شخص بتحبه وبيحبك بدون شروط . حب صافي وكل يوم بيشبهك أكثر من اليوم اللي قبله.

أجمل موقف حصلي خلال رحلة كفالة مريم هو خوف مريم عليا وارتباطها بيا وقلقها الرهيب عليا لما مرضت وتعبت.

مريم هي أملي في الحياة . مريم هي بنتي اللي مليش غيرها نفسي من كل قلبي وبدعي إنها توصل لبر الأمان وتكون عندها الثقة في نفسها وراضية عن حياتها وقرارتها ويكون مستقبلها جميل وكله نور.

مريم دلوقتي عندها ٦ سنين لسه مش مستوعبة أوي فكرة الكفالة بس انا بحاول أقدملها المعلومات بشكل بسيط مناسب لسنها ، طبعًا مريم بتسألني اسئلة كتير كل فترة، وانا بحب الأسئلة ومش بتهرب ولا بقلق منها عشان الأسئلة ديه بتخليني أقدر أفهم هي بتفكر في إيه وكمان عشان ده تعبير عن مشاعرها وطبعًا انا بجاوب على كل أسئلتها بصراحة وبطريقة مناسبة لعمرها لأن حقها تلاقي إجابة لكل أسئلتها.

الكفالة هي حق لكل طفل محتاج لأسرة وبيت دافي وديه أبسط حقوقه .

أنا نفسي أوصل رسالة للمجتمع اللي احنا عايشين فيه ، الرسالة دي :

١- اقبلونا واقبلوا أولادنا واتقبلوا الآخر بظروفه وحياته مهما كانت.

٢- متحكموش على الطفل بسبب ظروف اللي اتولد ولقى نفسه فيها.

٣- اختاروا كلماتكم كويس و أعرفوا إن في كلمات فعلاً بتجرحنا وبتجرح أولادنا.

أنا بنصح كل أسرة مقبلة على الكفالة تكون قد المسئوليه ومتتأثرش بأي آراء سلبيه حوليها وتكون على إيمان كافي بقرارها وبطفلها.

أحب أشكر أهلي (ماما وبابا وأخواتي وكل عيلتي) على دعمهم الحقيقي ليا في رحلتي مع مريم وعلى تقبلهم الفكرة وتشجيعي ومعاملتهم الطيبة لبنتي وحبهم الكبير ليها.

وأتمنى إن كل عيلة تكون داعمة لأي أب وأم كافلين ، ومحدش يرفض إبنهم ولا يعترض على قرارهم ، ويسيبوهم يربوا أولادهم بدون خوف عليهم من الرفض.

ادعولي ربنا يباركلي في مريم ويحفظها لأننا ملناش غير بعض.

رولا مامت أنس

قبل ما أبدأ في اجراءات الكفالة عرفت خبر حمل أختي
كنت مبسوطة جدًا علشانها من كل قلبي، بس هيا كانت زعلانة وكانت عم تبكي لما خبّرتني وتقلي "بس الدور عليكي انتي مش أنا"
وقتها قلتلها "انتي حملتي عشاني"
سألتني "كيف يعني؟"
جاوبتها "مابعرف بس هيك عندي احساس"
وسبحان الله بعد ولادتها بحوالي ٣ شهور حكوا معنا عشان أنس ، واختي هي اللي رضعته.
أنا رولا أم أنس اتزوجت أنا و محمد من ٦ سنين، مرت أول سنة من زواجنا واحنا في انتظار إن يحصل حمل لكن ماصار ، واكتشفنا وجود تحدي في الإنجاب.
فكرة الكفالة كانت عندي من بداية زواجي لما شوفت فيديو بالصدفة لصفا الفيلكاوي أم كافلة طفل جميل اسمه محمد وهي بتحكي قصة كفالة ابنها كانت ملهمة ولما شفت قصتها اتأثرت جدًا وأعجبت جدًا بالفكرة ،وبقيت متابعتها كتير من وقتها، وقررت إني هاخد خطوة الكفالة في يوم من الأيام بمجرد ما ربنا ييسرها.
لما عرفت بتحدي الإنجاب عرفت إن ربنا يسر لي طريق الكفالة ، عرضت الفكرة على محمد زوجي وكان متحمس وداعم للفكرة جدًا.
أنا ومحمد درسنا الموضوع بكل تفاصيله وأخدنا قرارنا بهدوء.
وبرغم هيك كان عندي تخوف شديد جدًا من التجربة بس اكتشفت بعدين إنه طبيعي يكون في توتر وقلق وأسئلة كتير بتراود كل أب وأم كافلين خلال فترة الانتظار.
طبعًا واجهنا شوية تحديات مع بعض أفراد عيلتنا بسبب إنهم كانوا متخوفين من التجربة لأنها جديدة عليهم، لكن بالتدريج قدرنا نقعنهم، وخصوصًا لما شافوا أنس وشافوا مدى سعادتنا فيه اتغيرت وجهة نظرهم تمامًا
أول يوم شفنا فيه أنس كنا في رمضان الماضي ، وللمصادفة أو لربما هي فعلاً إشارة من الله ليلتها كانت ليلة القدر وطول الليل كنت أدعي إن الله ييسرلنا الأمور ونلاقي ابننا والحقيقة أن وقعنا في حبه من لحظة ما شفناه ، وكان عندنا خليط من المشاعر غير مفهوم.
الحمد لله بعد ماصار معنا أنس أختي رضعته مع ابنها ، وأنا بإذن الله ناوية إني أنا كمان أتابع مع استشارية رضاعة وأرضعه، وهاد شيء أنا متحمسة جداً أعمله في الفترة القادمة.
أهم شيء بالنسبة إلي حالياً بعد ما كفلت أنس إنه يتقبل فكرة إنه ابننا عن طريق الكفالة ، أنا قررت إني أبدأ خبّره الحقيقة من صغره عن طريق القصص ، ومع الوقت أعطيه تفاصيل أكتر مناسبة لعمره لحد ما يقدر يستوعب الفكرة كاملة ويتقبلها.
أنا مقتنعة إن القراءة والبحث عن الكفالة من الناحية العلمية والناحية الدينية مهمين جدًا لكل أسرة كافلة وبيساعدوا بشكل كبير على مواجهة أي تحدي خلال رحلة الكفالة.
كتير بفكر لما أنس يكبر هل رح اقدر جاوبه على كل أسئلته ، وخايفة من مرحلة المراهقة طبعا لأنها مرحلة مو سهلة عشان هيك بحاول أثقف نفسي قدر الإمكان حتى أستعد للمرحلة القادمة
أكتر شيء بيضايقني لما حد يسألني "أنس شو جنسيته أو شو أصله؟ "
أو لما حد يسألني عن تفاصيل خاصّة بقصة أنس؟
مو مهم أبدًا أنس من وين المهم إنه معنا وجزء مننا، المهم إنه ابننا
" أنا حسيت مع أنس كل مشاعر الأمومة ولو ربنا كرمني وأنجبت طفل أو طفلة ما هيكون أبدًا أغلى من أنس لأن أنس هو ابني البكري"

قصة عز وياسمين

"عرفنا إن في أكتر من ٦ أسر شافوا عز لكن مفيش أي أسرة اختارته بسبب لون بشرته"

أنا ياسمين أم لـ تلات أولاد "آية وجود وعز"

أنا فلسطينية وزوجي أمريكي . عايشين في الأردن مع أولادنا التلاتة 

آية عمرها ٤ سنين وجود وعز كل واحد فيهم ١٨ شهر

أنا دايمًا كنت عايزة أكفل طفل ، احنا كفلنا "عز" برغم إن ربنا رزقنا آية و جود . حتى وأنا بختار شريك حياتي كنت دايمًا بتكلم معاه عن فكرة الكفالة ، وإننا نكفل طفل في يوم من الأيام .

وطبعًا إنجاب بنتين مغيرش أبدًا من رغبتي في الكفالة، بالعكس دا زود رغبتي جدًا، لأني لما خلفت بناتي أدركت كويس جدًا يعني إيه احتياجات طفل ، عرفت أد إيه الطفل محتاج للحب والرعاية ، وإن الطفل بدون حب ورعاية حقيقية مش هيقدر يعيش بشكل صحيح .

خلال سنوات جوازي الخمسة ناقشت أنا وزوجي فكرة الكفالة أكتر من مرة، مكنش عندنا خطة محددة بس كانت الفكرة موجودة وكنا منتظرين بس نستقر خصوصًا إن كان معانا آية وجود ومكناش متأكدين ان عندنا طاقة لطفل تالت.

وفي سنة ٢٠٢٠ أخدت انا وزوجي قرارنا النهائي بالتقديم على الكفالة ، كنا عارفين إن الإجراءات بتاخد شهور وممكن سنة وأكتر، بسبب قوائم الانتظار الطويلة في الأردن. 

كنا عايزين نكفل طفل بين سنة و٣ سنين عشان يكون في عمر بين آية و جود .

قدمنا الطلب وكنا متوقعين إن قدامنا وقت طويل نستعد فيه لاستقبال طفل تالت ، بس فعلًا مش كل حاجة بتمشي زي ما احنا مخططين ليها.

الأمور مشيت بطريقة سريعة جدًا لدرجة تخوف ، احنا قدمنا الطلب في أغسطس ٢٠٢٠ وفي شهر سبتمبر اخدنا الموافقة 

بعد ما قدمنا طلب الكفالة واتوافق علينا عرفنا بالصدفة إن في ولد عمره ٩ شهور في دار الرعاية ، ودا طبعًا شيء غريب جداً في ظل وجود قوائم انتظار طويلة على الأطفال تحت عمر ٣ سنين.

عرفنا إن في أكتر من ٦ أسر شافوا عز لكن مفيش أي أسرة اختارته بسبب لون بشرته ، وبرغم إننا كنا متوقعين إننا هنكفل بنت مع بناتنا الاتنين لأن دايمًا الموظفة كانت بتقولنا إن مينفعش نكفل ولد طالما عندنا بنتين.

إلا إننا لما سمعنا عن عز قررنا نكفله حتى من قبل ما نشوفه وبلغنا الموظفة إننا هنكفله وعايزين نشوفه.

وفعلًا بمجرد ما شفناه حسمنا قرارنا بكفالته.

عز كان في نفس عمر جود، الفرق بينهم كان بس ١٠ أيام ، يعني توأم . أخدنا البنتين لزيارة عز في الدار، واتكلمنا مع آية كتير قبل مقابلة عز. 

شرحنالها إننا هنضم لأسرتنا طفل محتاج لأب وأم، وهيبقى جزء من أسرتنا زيها هي و جود، طبعًا آية سألتنا أسألة كتير عن أب وأم عز من النسب، وهو ليه هيجي يعيش معانا.

جاوبناها بأفضل إجابات نقدر نقدمها لها وتكون مناسبة لسنها ، وبالفعل آية بقت بتعتبر عز أخوها الصغير، فعلًا الأطفال متعرفش يعني إيه لون بشرة .

الأطفال بتتعامل بفطرتها وبعواطفها، وبتشوف الناس على حقيقتها وبتحبها مهما كان شكلها، أتمنى إن احنا كمان نشوف الناس من حوالينا بالطريقة دي.

احنا من قبل ما نشوف عز واحنا واخدين قرار إننا هنكفله، لأن كانت نيتنا إننا نكفل طفل محتاج لأسرة وبيت، وكانت هي دي فرصتنا، 

وكنا متأكدين إننا لو مكفلنهوش إنه هيفضل في دار الرعاية باقي عمره، وفعلًا بمجرد ما شوفناه قدمنا طلب رسمي بكفالة عز.

بستغرب جدًا من الأسر اللي بتلاقي طفل مناسب من حيث السن ونوع الجنس وترفض تكفله عشان لون بشرته

يعني برغم قوائم الانتظار الطويلة على الأطفال تحت عمر ٣ سنوات، إلا إن في أطفال رضع في الدور محدش عايز يكفلهم عشان لون بشرتهم.

مفروض إن الغرض من كفالة طفل إننا نوفر بيت وأسرة لطفل بدل ما يكبر في دار رعاية بدون أسرة ترعاه ، بصرف النظر عن شكل الطفل أو لونه أو جنسيته.

فلما يرفض شخص يكفل طفل بسبب لون بشرته فدا معناه إن نيته مش في مكانها الصحيح .

بعد كفالة عز الأمور بقت أصعب شوية، وجود ٣ أطفال منهم اتنين رضع في نفس العمر محتاجين لرعاية واهتمام كان شيء صعب، طول الوقت بحاول أوزان وقتي بين جود وعز، خصوصًا إن عز كان محتاج لوقت أكتر عشان أقدر أوطد علاقتي بيه وأساعده على تطوير علاقته بينا، بحاول أديه حب أكتر ورعاية أكتر.

بس برغم الصعوبات دي إلا إن وجود عز في حياتنا خلى ليها معنى حقيقي وغيرنا كلنا للأفضل، وجود عز في حياتنا خلى قلوبنا بقت أكبر وأحن، حتى مفهوم الأسرة في نظرنا اتغير عن المفهوم التقليدي.

ناس كتير بتسألني إذا كنت بحس باختلاف بين حبي لعز وحبي لبناتي البيولوجيين

أنا حاليًا وأنا بكتب قصة كفالة عز مش حاسة بـ أي اختلاف، بس أنا فعلًا احتاجت لوقت عشان أوصل للشعور دا.

أنا احتاجت حوالي ٤ شهور عشان أقع في حبه زي ما بحب أخواته.

نفس الكلام حصل مع آية وجود مش بس عز، في أمهات بتقع في حب أولادها بمجرد ما تشوفهم، لكن أنا دايمًا كنت بحتاج شوية وقت عشان أقدر أتواصل معاهم وأحبهم.

في البداية مكنش في بيني وبين عز تواصل حقيقي ، بالعكس كان رافضني ، بس كنت حاسة دايمًا بالمسؤولية تجاهه ، بس مع الوقت حبي ليه كان بيكبر يوم بعد يوم خصوصًا لما بقى مرتبط بيا.

عشان كدا أنا نفسي أقول لكل أسرة مقبلة على الكفالة إن مفيش مشكلة لو محسوش بحب طفلهم من أول نظرة أو من أول زيارة، أو لو حتى كان في رفض من الطفل، أي علاقة في الدنيا بتحتاج لوقت عشان نقدر نبنيها ، أهم شيء يكون عندنا القدرة على الإلتزام تجاه الطفل، والحب هيحصل وهيكبر مع الوقت.

أنا حسيت بحب عز يوم بعد يوم ، مع كلمة ماما لما سمعتها منه لأول مرة ، ومع كل بوسة قبل النوم ، وكنت متأكدة إن حبنا هيفضل يكبر مع الوقت زي ما حصل مع أخواته. 

حاليًا أنا بحبه تمامًا زي آية وجود وبهتم بيهم كلهم بنفس الدرجة.

وهما نفسهم بقوا مرتبطين جدًا ببعض، يمكن أجمل لحظات بتمر عليا لما بشوف جود وعز بيلعبوا مع بعض وقادرين يتواصلوا مع بعض برغم صغر سنهم، بيشاركوا مع بعض أكلهم ولعبهم ، وأوقات بيتخانقوا زي أي أخوات توأم.

ولما بشوف آية وهي بتهتم بيهم وبتعبرلهم عن حبها طول الوقت، بحمد ربنا كتير على كفالة عز وعلى أسرتنا الجميلة.

قصة كفالة عز قصة جميلة وأنا فعلا بحس فيها بلطف ربنا وبأقداره الجميلة.

قصة علي وياسر

أنا على 57 سنة، أب لـ 3 أبناء، اتنين من نسبي، وواحد منهم مكفول

أولادي الاتنين الكبار خريجين جامعات، واحد منهم طبيب والتاني محامي، وأصغر ابن ليا هو “ياسر” ٦ سنين واضح طبعًا إن ياسر هو المكفول


قصة كفالة ياسر غريبة شوية، لكنها كانت قدر ربنا الجميل في حياتنا.

من حوالي ١٢ سنة كان أولادي دخلوا مرحلة الثانوية،
وزوجتي كان نفسها تكفل بنت، مشينا في الاجراءات بس كانت بتتقفل وشنا من كل اتجاه وكان الرد مينفعش تكفلوا بنت طالما عندكم ولدين،
فقولنا خلاص هنكفل ولد وفعلًا اختارنا ولد من دار في القاهرة واتمسكنا بيه لكن للأسف مديرة الدار كانت بتقفل كل حاجة في وشنا خصوصًا إننا كان مقر إقامتنا في طور سينا لحد ما استسلمنا وشلنا الفكرة من دماغنا.

من ٦ سنين، ابني الكبير كان استلم تكليفه في مستشفى، وفي أول يوم لنبطشيته جه المستشفى طفل معثور عليه عمره ٥ ساعات تقريبًا، ولأن احنا من سكان طور سيناء، فالعثور على طفل رضيع يعتبر شيء نادر حدوثه.

عرفت من ابني انهم عثروا على الطفل وعرفت كمان إن الطفل لازم يتنقل لمستشفى فيها حضانة، قررت أخد الطفل أنقله بعربيتي للمستشفى عشان ميتبهدلش، وفعلًا نقلته مع أمين شرطة بعد ما عملنا محضر عثور على الطفل.

أثناء ما كان الطفل في المستشفى كنا بنفكر في مصيره أنا وزوجتي، وكنا عارفين إنه لو مفيش أسرة كفلته إنه هيتنقل لدار من دور رعاية السويس لأن مفيش دور رعاية في سينا.

أثناء وجود ياسر في المستشفى كنا متكفلين بالألبان بتاعته، لأن وقتها كانت في أزمة في ألبان الاطفال، فكنا بنشتريهاله من برا ونوديهاله المستشفى.

وبعدها ربنا هدانا نقدم على كفالة الولد، وفعلًا مشينا في الاجراءات وكانت ميسرة جدًا لحد ما اكتشفنا إن في ١٧ أسرة غيرنا من سينا مقدمين على كفالة ياسر.

 ومديرية الشئون الاجتماعية وافقت على أسرتين من الـ 17، الأسرتين دول كانوا احنا وأسرة تانية.

وبرغم إن الأسرة التانية كانت أيسر حال مننا، لكن في النهاية الشئون اختارتنا احنا لأنهم شافوا إن ياسر هيكون ليه مستقبل أفضل معانا
وشاء ربنا اننا نكفل ياسر بعد ٣ شهور كان قضاهم في الحضانة

كلنا حياتنا بعد ياسر اتغيرت وبقى فيها حاجة جميلة
أنا استمتعت بوجود ياسر أكتر ما استمتعت بوجود أولادي الكبار
قضيت معاه وقت أكتر ما قضيت مع أولادي الكبار في صغرهم، لما كان أولادي صغيرين كان ورايا مسؤوليات وبشتغل وظيفيتن، دلوقتي المسؤليات قلت وحياتي المادية استقرت الحمد لله، فقدرت أستمتع بوجود ياسر، طبعًا زوجتي طايرة من الفرحة بوجوده.

ياسر عارف حقيقة إنه ليه أسرتين، ودايمًا بنقوله إنه محظوظ أكتر من صحابه اللي ليهم أسرة واحدة بس، ياسر بيحب كابتن أمريكا واحنا استغلينا دا عشان نحكيله حكايات عن إنه زي كابتن أمريكا اللي تاه من أهله وهو صغير، هو طلعً بيبقى فخور جدًا بالقصص دي لأنه البطل فيها، وكمان احنا لما يكبر أكتر هنعرفه الحقيقة، وبالمناسبة كل الناس حوالينا أصحابنا وقرايبنا وجيرانا عارفين قصة ياسر، وأنا مش ناوي إني أعرضه لأي مشكلة لما يكبر عشان كدا احنا هنقوله الحقيقة كاملة بس لما يكون سنه مناسب.

ياسر حاليًا فاهم مبدأ إن الشخص ممكن يكون ليه أكتر من أسرة. حتى إن الممرضة اللي كانت متابعة حالته في المستشفى واللي كانت عايزة تكفله، ياسر بيروح يزورها كل جمعة ويبات معاها وبيعتبرها مامته التالتة.

وأنا برغم إن عندي ٥٧ سنة بس أنا ممكن أكفل تاني، احنا ربنا من علينا بكفالة ياسر، ومؤمنين إن كان كل شيء في حياتنا مقدر وميسر عشان نكفله وينور حياتنا أنا وزوجتي وأولادي.