ليه فيه زيارة منزلية ؟ إزاي تجهز نفسك لها ؟ أهم الأسئلة اللي هتتسألها ؟ نصائح مهمة
ناس كتير بتبقى فاكرة إن الزيارة المنزلية اللي بتقوم بيها موظفة الشئون الاجتماعية مقصود منها معاينة البيت ونضافته، لكن في الحقيقة إن الزيارة المنزلية هي أكبر من كدا بكتير.
زيارة البحث المنزلي هي عملية بتشمل مقابلة الوالدين المقبلين على الكفالة للكلام معاهم في بيتهم عن أفكارهم ودوافعهم للكفالة، ومراجعة معلوماتهم الطبية والمالية وغيرها من المعلومات المتعلقة بقدرتهم على الكفالة.
زيارة البحث الميداني ممكن تكون مخيفة لبعض الناس ، وناس كتير بتكره فكرة البحث الميداني وبتبقى شايفة إنها مش مضطرة تثبت كفاءتها وجدارتها عشان تستحق تكفل طفل.
في الحقيقة إن الكمال مش مطلوب عشان تستحقوا تكفلوا طفل، ولو كان الكمال شرط من شروط الكفالة، مكنش بقى في آباء كافلين ولا فيه كفالة من الأساس.
طب ليه في زيارة بحث ميداني؟
زيارة البحث الميداني بتقوم بيها وزارة التضامن الاجتماعي لعدة أسباب، من ضمنها:
• تقييم رغبة الزوجين المقدمين على الكفالة ومدى قدرتهم على الإلتزام بكفالة طفلهم، والتأكد من إن الزوجين على نفس القدر من الرغبة في الكفالة وإن محدش منهم عايز يكفل طفل عشان يرضي رغبة الطرف التاني بدون اقتناع منه، لأن بالشكل دا هيبقوا بيظلموا الطفل اللي هيكفلوه، لأن الطفل محتاج لأسرة كاملة ترغب فيه وتحبه وتلتزم تجاهه.
• إستكشاف سبب رغبة الزوجين في كفالة الطفل، أي زوحين مقبلين على الكفالة لازم يكون عندهم أسباب وجيهه لتبرير رغبتهم في الكفالة، حتى لو كان عدم قدرتهم على الإنجاب هو السبب ورا رغبتهم في الكفالة، فلازم يكونوا تقبلوا عدم قدرتهم على الإنجاب وبقوا متحمسين عشان يكونوا أسرتهم ومستعدين إنهم يشوفوا طفلهم المكفول طفلهم فعلًا مش طفل بديل، بعض الأسر بيكون دافعها إنها تمنح حياة أسرية سعيدة لطفل محتاجها. والبعض علشان ده فعل نبيل وخير كبير .في أسباب ودوافع كتير للكفالة، وضروري يكون في سبب وجيه لكل أسرة مقبلة على الكفالة توضحه أثناء زيارة البحث المنزلي.
• تقييم قدرة الزوج والزوجة على تحمل مسؤوليات الأبوة و الأمومة عن طريق توجيه بعض الأسئلة خصوصًا لو مكنش عندهم أولاد قبل كدا
• تثقيف الأسرة المقبلة على الكفالة عن الكفالة وعن التحديات اللي ممكن تقابلهم على طول رحلة كفالة طفلهم.
• التحقق من السجلات الجنائية والموارد المالية للزوج والزوجة.
• التحقق من الصلاحية النفسية والاجتماعية والصحية للزوج والزوجة.
• التحقق من صحة الأوراق المقدمة بمكتب الشئون الاجتماعية.
إزاي تجهز بيتك لزيارة البحث الميداني؟
برغم إن التحقق من بيتك مش هو أساس عملية البحث الميداني، لكن موظفة الشئون هتفحص بيتك حتى لو بعنيها عشان تتأكد من إنه مكان آمن ونضيف ويسمح بتربية طفل، هتحتاج تفحص أوضة الطفل لو موجودة أو تعرف منكم إذا عندكم خطة تجهزوا غرفة منفصلة للطفل فيما بعد، موظفة الشئون مش بتفتح دواليبك ولا مطبخك ولا تلاجتك، الموظفة بتيجي بشكل أساسي عشان تتعرف عليكم وتشوف طريقة تعاملكم مع بعض في بيتكم وعشان تشوف مدى توافر الأمان والحياة الصحية في بيتكم.
إنت مش محتاج لبيت مثالي عشان تنجح في الزيارة المنزلية، يكفي إن بيتك يكون مكان آمن ويسمح بوجود طفل فيه، ودي شوية حاجات مفروض تتأكد من وجودها في بيتك قبل الزيارة المنزلية:
• صلح أي شيء يتعلق بالسلامة زي الأسلاك المكشوفة أو فيش الكهربا.
• لو عندك سلالم في البيت اتأكد من وجود بوابات أمان عليها بحيث تكون آمنة على طفل صغير.
• إتأكد من قفل أي شيء غير آمن زي خزانات الأدوية، وأماكن المنظفات والمواد الكيماوية.
• لو عندك حمام سباحة إتأكد من وجود خطة لعمل سياج حواليه أو وجود بوابة تمنع الطفل من الوصول ليه.
وقت الزيارة
موظفة الشئون اللي هتيجي تزوركم أثناء زيارة البحث المنزلي هي شخص عنده مهمة جاي يقوم بيها، ضروري جدًا تكونوا لطاف معاها وإنكم تسيبوا انطباع كويس عندها.
هيكون شيء لطيف منكم لو قدمتولها شيء تشربه، أو بعض المقبلات البسيطة، تجنبوا إنكم تقدمولها شيء ضخم أو فاخر بزيادة، يكفي شيء بسيط للترحيب بيها.
تتوقعوا هتسألكم عن ايه؟
غالبًا أسالتها كلها هتكون في إطار سبب رغبتكم في الكفالة، ولو كان في مشاكل في الإنجاب فإحتمال إنها تسألكم أسئلة خاصة بمشكلة الإنجاب والعلاج، أكيد طبعًا هتسألكم عن وظايفكم وعن متوسط مرتبكم الشهري، ممكن تسأل عن هواياتكم أو أي أسئلة تانية تساعدها في أنها تتعرف عليكم وعلى شخصياتكم بشكل أكبر، وهنا بنعرضلكم قايمة ببعض الأسئلة اللي ممكن توجهالكم موظفة الشئون أثناء زيارة البحث الاجتماعي:
• إمتى بدأتوا تفكروا في الكفالة ؟ وليه ؟
• هل حد منكم بيعاني من مشكلة في الإنجاب ؟ وعرفتوا امتى وإزاي؟
• هل ممكن تستمروا في علاجات الخصوبة في نف الوقت اللي بتسعوا فيه للكفالة؟ وليه؟
• إزاي عرفتوا بعض وإزاي اتجوزتوا؟ إيه جذبكم لبعض؟ وازاي علاقتكم اتغيرت على مر سنين زواجكم؟
• هل جمعتوا اي معلومات عن الكفالة؟ وايه أهم المعلومات اللي عرفتوها؟
• هل انتو الإتنين عايزين تكفلوا طفل ولا واحد منكم بس هو اللي متحمس للموضوع ؟
• تفتكروا إيه هيكون تأثير كفالة طفل على حياتكم المهنية والزوجية وعلى حياتكم بشكل عام؟
• إيه اللي هتقدر تقدمه لطفلك المكفول؟
• هل حد من قرايبك أو أصدقاءك او جيرانك عارف إنك هتكفل طفل؟ لو لأ ليه مقولتلهمش؟ لو آه قولتلهم إزاي وحاسس بإيه من ناحيتهم؟
• هل شايف إن مفروض الطفل يعرف حقيقة كفالته؟ وليه ؟
• من وجهة نظركم إيه هي مميزات وعيوب الكفالة؟
أثناء اجابتك على الأسئلة ضروري جدًا تكون ودود ومهذب وصادق في كل إجاباتك، وإفتكر إن دي عملية تقييم بتتم لصالح طفلكم المستقبلي ولصالحكم في نفس الوقت.
للأسف بعض الأشخاص بتستخدم إسلوب الكدب وبتحاول تكون مثالية أكتر من اللازم، وكذبهم بيكون واضح جدًا ودا أحيانًا اللي بيدفع موظفة الشئون إنها تكتب تقرير سيء عنهم وبيكون كذبهم سبب في رفض طلبهم، مش معنى كدا إنك مطالب بإنك تكشف كل أسرارك الشخصية، لكنك مطالب بإنك تكون صريح في الأمور الواضحة اللي ممكن تنكشف زي مثلًا لو عندك قضية من أي نوع مسجلة في سجلك الجنائي.
يمكن أكبر عدو ليك خلال زيارة البحث المنزلي هو مخاوفك، ضروري تكون هادي، ومش متوتر، لأن التوتر والخوف ممكن يدفعك للكذب أو لردود أفعال غير لطيفة أو إجابات غير منطقية.
لو عندك أطفال
لو عندك أطفال تانيين فتوقع إن موظفة الشئون تسأل عنهم وممكن كمان تحتاج تقابلهم لو كان عمرهم مناسب، يعني مثلًا لو عمرهم فوق ٥ سنين فتوقع إنها تطلب تقابلهم، ولو عندك أطفال بالغين فتوقع منها تطلب تتكلم معاهم هما كمان.
أفضل طريقة عشان تخلوا أطفالكم يستعدوا للزيارة هي إنكم تتكلموا معاهم وتقولولهم على نيتكم لكفالة طفل وإيه هو دافعكم للكفالة، وتأكدوا عليهم إنكم هتفضلوا تحبوهم ومش هتفضلو طفلكم المكفول عليهم، حتى لو كانوا أطفالكم كبار فهما محتاجين يعرفوا نفس الكلام.
الحيوانات الأليفة
لو عندك حيوانات أليفة فضروري تتأكد إنها حيوانات مناسبة للتواجد مع طفل في نفس البيت قبل زيارة البحث الاجتماعي، لو عندك قطة أو كلب اتأكد من إنهم مش هيفضلو يتنططوا حوالين الموظفة طول زيارة البحث المنزلي، وراعوا إن في بعض الأشخاص بتخاف من الحيوانات.
النتيجة
ناس كتير بيكون عندها تخوف من النتيجة وبيكون عندها تصور إنهم لو اترفضوا فهما خلاص مش هيقدروا يكفلوا طفل للأبد، في الحقيقة فيه أسر إترفضت مرة وإتنين بدون حتى معرفة الأسباب ورا رفضهم لكنهم أصروا يقدموا تاني وتالت واتقبلوا واتوافق عليهم وعايشين حياة سعيدة مع أطفالهم دلوقتي، حاليًا الوزارة عملت نظام جديد للتظلمات بحيث متحتاجوش تعيدوا الجراءات من تاني..
ونصيحتنا ليكم متخلوش الأفكار الإنهزامية السلبية تأثر عليكم .
