سردك لقصة كفالة طفلك في شكل كتاب قادر على تعزيز شعور طفلك بالإنتماء لأسرتك وعلى تعزيز إحترامه لذاته وثقته في نفسه، إتعلم إزاي تصنع لطفلك كتابه وهو هيطلب منك تحكيله قصته كل يوم.
الطفل في مرحلة قبل المدرسة بيحب القصص جدًا، وبيتخيل الشخصيات المفضلة ليه في القصص كأشخاص حقيقين، وبيكون قادر إنه يفتكر كل كلمة وكل صورة في قصته المفضلة، حتى لو تخطيت أي جزء سهوًا هتلاقي طفلك بيفكرك بيه.
لكن أكتر قصة بيحبها الطفل هي قصته هو، الطفل المكفول بيستفيد جدًا من وجود دليل ملموس يربطه بأسرته الكافلة زي فكرة “كتاب قصة كفالته” هتلاقي طفلك بيضحك من الفرحة لما بيسمع إسمه ويشوف حاجات من حياته الحقيقية موجودة في كتاب بيحكي قصة هو بطلها.
كتابة القصة على الورق:
لحسن حظنا إن الطفل في المرحلة دي مش بيكون مهتم بكل تفاصيل القصة ، الطفل لسه مش مدرك يعني إيه زيارة بحث اجتماعي ويعني إيه تقديم أوراق
، ولا حتى يعني إيه عدم قدرتكم على الإنجاب ، كل اللي طفلك محتاج يسمعه في قصته هو شكله وطريقة تصرفه وإزاي وصل لبيتكم
، وايه كان رد فعلكم يوم وصوله ، الطفل محتاج لتفاصيل بسيطة جدًا وملموسة تتعلق بيه هو. يكون هو بطل القصة و يشوف ده قدامه في الكتاب.
إبدأ القصة بشرح وضعك قبل كفالة طفلك ، وإزاي سمعت لأول مرة عنه ، والرحلة اللي قمت بيها عشان توصله، ركبت إيه ومين كان معاك، إوصف لطفلك شكله وقت ما قابلته ، كان كبير أو صغير، شعره كان عامل إزاي، ايديه ورجليه وعينيه وهكذا (يفضل إن يكون فيه صور في الكتاب ده هيساعده بشكل أكبر في تعزيز هويته الأسرية وإرتباطه بيها)
إحكي لطفلك شعورك لما شفته لأول مرة، وايه كان رد فعله لما شافك وإيه رد فعلك لما شفته ، وإزاي نام في حضنك أول ما شلته، إحكي لطفلك عن أول أكلة أكلها من ايديك،
وعن رحلة رجوعكم للبيت، و مين كان في انتظاركم لما وصلتوا، وكان ايه رد فعلهم.
قصة كفالة طفلك مش مفروض تكون خيالية ، لكنك تقدر تبدع فيها زي ما إنت عايز وزي ما إنت شايف المناسب لطفلك ،
ممكن تستخدم فيها بعض الصور أو ممكن تستخدم صور مقصوصة من المجلات توصف شكل مكان الدار ، ممكن تستخدم صورة عربية عشان توصف شكل رحلتكم يوم وصوله،
أو ممكن تستخدم رسومات بسيطة ترسمها وتلونها بإديك ، الطفل مش محتاج لروائع فنية،
أي صورة أو رسمة طفلك يقدر يتعرف عليها هتقضي الغرض.
بعد ما تكتب النص وتحط الصور، غلف الصفحات النهائية بورق يخليها متينة عشان متتقطعش بسهولة لما طفلك يمسك الكتاب،
لأن طفلك هيبقى عنده فضول يقرأ الكتاب طول الوقت ، وإفتكر متغيرش أي كلمة من الكتاب لأن طفلك هياخد باله.
نموذج لقصة طفل مكفول صفحة بصفحة:
سهل جدًا تسرد قصة طفلك لو التزمت بالأساسيات، وهنا بنقدملك بعض النصايح لكتابة الصفحات الافتتاحية لقصة طفلك كمثال تقدر تبدأ بيه قصة طفلك :
"في يوم كانت الشمس طالعة والجو كان جميل، كان شكله يوم مميز اوي . كنت في البيت بعمل غدا وبابا كان في الشغل واتصلت ولقيت موبايلي بيرن ورديت لقيت مدام كذا بتكلمني وبتقولي أجمل خبر سمعته في حياتي .
قالتلي إن في طفل جميل مستنينا عشان ناخده يعيش معانا في بيتنا
(حط صورة ليوم مشمس وست بتتكلم في التليفون وبتضحك وسعيدة جدا)
عملتوا ايه بعد كدا يا ماما ؟
"مكناش مصدقين نفسنا من الفرحة، واتصلنا بجدك وجدتك وكل أصحابنا وقولنالهم على الخبر السعيد، وكلهم كانوا مبسوطين وفرحانين أوي “ (حط صورة لأجداد مبسوطين وبيضحكوا عشان توصل لطفلك رسالة سعادتهم بيه بشكل واضح وصريح)
وبعدين حصل إيه يا ماما ؟
“ركبنا العربية وأخدنا ساعة عشان نوصل للدار، وطول الطريق كنا بنفكر فيك ومستنين نشوفك"
حط صورة للدار للمكان اللي أخدت منه طفلك، وممكن صورة لطفل سعيد بيضحك، أو صورة طفلك نفسه يوم ما قابلتوه لو كان عندكم صورة ليه
هنسيبك تفكر وتبدع أكتر بس متنساش لما تعمل كتاب طفلك ياريت تشاركنا تجربتك ونصايحك على جروب دعم الأسر الكافلة على صفحتنا على الفيس بوك “كفالة”
