فيه ناس كتير عندها مفهوم خاطئ إن الكفالة هي التبني
طب ايه هو التبني؟
التبني معناه إن شخص يضم طفل لأسرته كأنه ابنه من النسب ، بس برغم إن الطفل دا مش ابنه ولا من نسبه بيسميه بإسمه وياخد لقبه ويتعامل في المجتمع بشكل قانوني ورسمي على إنه إبنه كإبنه من النسب تماماً وده بعيد كل البعد عن الحقيقه.
التبني بالمفهوم دا حرام في الإسلام لأنه بيسبب إختلاط وضياع للأنساب ، وكمان بيسبب مشاكل في الميراث وضياع لحقوق الورثة الشرعيين و بيحرم حلال ويحلل حرام.
التبني كان منتشر ومعروف عند العرب في الجاهلية لحد ما جه الإسلام وحرم التبني بشكل واضح
زي ما كان واضح في قول الله تعالى في قصة زيد بن حارثة : (ادْعُوهُمْ لِآبَائِهِمْ هُوَ أَقْسَطُ عِندَ اللَّهِ فَإِن لَّمْ تَعْلَمُوا آبَاءهُمْ فَإِخْوَانُكُمْ فِي الدِّينِ وَمَوَالِيكُمْ)
فالرسول نفسه صلى الله عليه وسلم كان متبني زيد قبل تحريم التبني وكان اسمه "زيد بن محمد" فلما نزلت آية تحريم التبني سماه الرسول زيد بن حارثة
طب ايه هي الكفالة؟
أما الكفالة فهي أن يضم الشخص طفل لأسرته ويقوم برعايته كأنه ابنه من نسبه لكن بدون ما ينسبه له بشكل قانوني كأنه إبنه من النسب وبدون ما يترتب على كفالته أي أثر من آثار التبني زي الإرث وضياع الأنساب وكل الأمور الأخرى.
والكفالة بمعناها دا حث عليها الإسلام وحبب فيها ووعد عليها بالثواب العظيم ومجاورة الرسول صلى الله عليه وسلم في الجنة، فعن أبي هريرة رضي الله عنه عن النبي صلى الله عليه وسلم قال "خير بيت للمسلمين بيتٌ فيه يتيم يُحسَن إليه، وشر بيتٍ في المسلمين بيت فيه يتيم يُسَاء إليه، وأنا وكافل اليتيم كهاتين في الجنة. وأشار بإصبعيه يعني السبابة والوسطى.
فأفضل صورة لكفالة اليتيم المحصول منها ثواب مجاورة الرسول صلى الله عليه وسلم في الجنة بتكون بضم الطفل للأسرة ومعاملته كفرد منها ورعايته بشكل يومي وتغيير مستقبله جذرياً من خلال الإنضمام لأسره تحبه وتهتم بيه .
الكفالة في مصر والوطن العربي
الكفالة بيتم العمل بيها في مصر ودول كتير في الوطن العربي
بدأ نظام الكفالة في مصر من سنة ١٩٥٩ من خلال وزارة التضامن الإجتماعي تحت مسمى الأسر البديلة
الوزاره وضعت شروط ومعايير تضمن بيها سلامه مقاصد الأسر وصلاحيتها للهدف النبيل ده
من خلال الموقع هنا هتعرف إيه هيا الشروط والإجراءات الخاصة بالكفالة
