لو كنتي بتعاني من مشاكل في الخصوبة والحمل، فانتي أكيد اتعلمتي إنك مينفعش تشاركي تجربتك مع كل الناس اللي حواليكي، لأن أكيد في شخص هيقول حاجة تتجاهل مشاعرك أو تسيء ليها.
التعرض للأسئلة والتعليقات شيء لا يمكن التخلص منه أبدًا، حتى وإن كان بحسن نية، لأن كتير من الناس ببساطة مش فاهمة يعني إيه زوجة بتعاني من مشاكل في الإنجاب.
المفتاح موجود دايمًا في مقاومة رغبتك في الرد، لأنك في غنى عن الضغط اللي هيقع عليكي وانتي بتحاولي تردي على الأسئلة المزعجة، التعامل مع التعليقات السلبية بحكمة أو عدم التعامل معاها تمامًا هيساعدك على تخطي الضغط دا والرجوع ليومك العادي والتعامل بشكل طبيعي.
احنا في "كفالة" يهمنا إن كل سيدة بتعاني من مشاكل في الإنجاب إنها تعيش حياتها بأقل الضغوطات الممكنة، وكمان تقدر تتجاوز أي كلام يتقالها عن مشكلة حملها بسعة صدر بدون ما تأثر على نفسيتها بشكل سلبي، عشان كدا بنقدملكم هنا أشهر 5 تعليقات مزعجة ممكن تتعرضلها أي سيدة بتعاني من مشاكل في الإنجاب، وكمان بنقدم معاها أفضل الاقتراحات الإيجابية للرد عليها.
5 تعليقات شائعة مزعجة تتعلق بتأخر الإنجاب وأفضل طريقة للرد عليها:
1- "معلش متزعليش، أكيد ربنا هيعوضك في حاجة تانية"
التعليق دا مزعج على مستويات كتيرة، أولًا: تعليق زي دا بيفترض الهزيمة، وبيفترض إن الزوجة دي عمرها ما هتحمل أبدًا، ثانيًا التعليق دا بيفقدها أي قوة من إيديها في وقت هي أساسًا حاسة فيه بفقدان السيطرة على حياتها ويمكن كمان على نفسها.
لو حد وجهلك تعليق زي دا، حطي في اعتبارك إنه مش مدرك الأثر العميق اللي ممكن يسببه كلامه، وممكن مكنش لاقي كلام يقوله، فبدل من التزام الصمت قرر يهون عليكي بكلام هو مش مدرك لأثره عليكي.
أفضل طريقة للرد على تعليق زي دا، هو عدم الرد من الأساس، صمتك ممكن يبعت للشخص رسالة معناها إن تعليقه غير مقبول، حاجة كمان ضروري تعمليها، دوني ملاحظة عندك بإنك تتجنبي الكلام في موضوع الإنجاب مع الشخص دا فيما بعد.
2- "عندك مشكلة في الخصوبة! أكيد بتهزري، دا أنا بحمل لو جوزي عدا من جنبي"
النوع من التعليقات اللي معناها "الحمل دا شيء سهل بالنسبالي" تعليقات مزعجة وبتقلل من شأن الزوجة اللي بتحاول الإنجاب، طريقة ردك هتعتمد على مدى قرب الشخصية اللي قالت التعليق دا منك.
فلو كانت الشخصية دي غريبة عنك قابلتيها في العيادة مثلًا، فمتتردديش في الضحك على كلامها لأن واضح إنها بتحاول تضحكك، أما لو كانت جدتك مثلًا، فهي كبيرة في السن على عتابها على كلامها، سبيها تقول اللي في نفسها خصوصًا لو كان عندها 10 أولاد.
أما لو كان الشخصية دي حد قريب منك زي اختك أو صديقتك، فالأفضل لو تشرحيلها بهدوء إنك بتحاولي تفهمي إيه هي مشكلتك وتحليها، ومش بتقارني تجربتك بتجربة حد تاني.
3- "هي المشكلة عند مين فيكم"؟
لنفترض إن الشخص دا بيسأل بشكل جدي وبصدق عن نوع مشكلة الخصوبة اللي عندكم فعلًا، النوع دا من الأسئلة شخصي جدًا بالإضافة كمان لسوء الصياغة.
عمومًا خلي بالك من الكلام اللي هتقوليه لأنك ممكن لو جاوبتي بصدق تتعدي على حدودك أو حدود زوجك الشخصية، وتضطري لكشف معلومات غير مريحة بالنسبالك أو بالنسبة لشريك حياتك.
ولو مش حابة تخوضي في التفاصيل وشايفة إن السؤال شخصي فانتي تقدري تقولي "الأسباب شخصية شوية، بس اطمني احنا بنحاول نحلها، شكرًا على اهتمامك"
4- "انتم بتدفعوا كل تكاليف العلاج دي منين؟"
لو كان مصدر السؤال من شخص حابب يطمن عليكم وعلى حالتكم المادية، فدا شيء كويس، لكن لو كان الشخص بيسأل من باب الفضول وعايز يعرف لو عندكم مصدر أموال سري، فمتتردديش في إنك تجاوبيه بـ "الحمد لله ربنا ميسرها" وغيري الموضوع.
5- "انتو تاعبين نفسكم ليه، ما تكفلوا طفل وخلاص، الأطفال كتيرة في دور الرعاية"
قد يكون الشخص دا بيحاول يقدملكم حل لمشكلتكم، لكن تعليقه بيوحي إن في حاجة غلط في رغبتكم في تجربة الحمل والولادة، وإنكم مفروض تتخلوا عن محاولة الحمل، أو إن كفالة طفل هتكون أسهل مثلًا، يمكن يكون دا أصعب تعليق هتضطري للرد عليه، لأن أي رد هيفتح مجال لمحادثة.
الحقيقة إن إنتي وزوجك مديونين لنفسكم بالمحاولة لحد ما تحسوا بالراحة التامة في إنكم تجربوا حل تاني، واللي ممكن يكون الكفالة أو نوع تاني من أنواع علاجات الخصوبة.
عمومًا أفضل طريقة للرد على تعليق زي دي وإنهاء المحادثة في نفس الوقت إنك تقولي "احنا عارفين إن الكفالة موجودة وممكن تكون حل مناسب كمان، لكننا لسه مش مستعدين للتخلي عن محاولة الحمل"
