يعني إيه تحريم بالرضاعة؟
يعني طفل يرضع منك خمس رضعات مشبعات قبل سن السنتين، فيبقى ابنك بالرضاعة، يحرم عليكي الزواج منه زي ابنك بالظبط، ويحق ليه الخلوة والاختلاط بيكي، يعني يشوفك بدون حجاب بعد بلوغه، وأولادك يبقوا اخواته وزوجك يبقى أبوه وياخد كل أحكام ابنك من النسب.
فعن عائشة رضي الله عنها عن النبي صلى الله عليه وسلم قال "يُحرَم من الرضاع ما يُحرَم من النسب"
وفي سورة النساء "حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالَاتُكُمْ وَبَنَاتُ الْأَخِ وَبَنَاتُ الْأُخْتِ وَأُمَّهَاتُكُمُ اللَّاتِي أَرْضَعْنَكُمْ وَأَخَوَاتُكُمْ مِنَ الرَّضَاعَةِ"
طب سؤال: لو أنا مش متزوجة أصلًا وعايزة أكفل طفل، إزاي هرضعه؟
خلينا نقولك إن مش لازم تحملي وتولدي علشان ترضعي، دلوقتي مع بعض الأدوية المدرة للبن والأعشاب تقدري ترضعي بدون حمل أو ولادة.
طب إزاي؟
عن طريق حاجة اسمها الاسترضاع (الإرضاع المستحث)
والاسترضاع معناه إنك بتابعي مع طبيب استشاري رضاعة طبيعية بيوصفلك كورس علاجي محدد مع بعض الأعشاب زي الحلبة، وبعد فترة من العلاج مع تعصير الثدي بمضخة الثدي بيبدأ الجسم يفرز اللبن بكميات قليلة بتزيد مع الوقت، وفي النهاية بتقدري تعصري كميات تكفي الطفل لخمس رضعات مشبعات، وبتقدري تخزني الرضعات في الفريزر أو تديها لطفلك بمجرد عصرها وبكدا خلاص بقى ابنك بالرضاعة.
وبمجرد ما توقفي العلاج وتوقفي تعصير الثدي بيوقف اللبن تدريجي وبتكملي رضاعة صناعية، وفي بعض الأمهات بتختار إنها بتنجح في إنها تكمل رضاعة مباشرة من الثدي فوق الخمس رضعات بتوع التحريم مع التنسيق مع استشاري الرضاعة.
الكفالة شيء جميل جدًا، والرضاعة شيء أجمل بيزيد الكفالة جمال، لكن متزعليش لو مقدرتيش ترضعي طفلك لأي سبب، أمهات كتير بتنجب طفلها وبترضع صناعي، ودا عمره ما أثر على علاقة الارتباط والتعلق بينها وبين طفلها..
وافتكري دايمًا إن الكفالة بتمنحك ابن من غير ولادة، وبتمنح الطفل أم وأب وأسرة وحياة.
