اختيارك للكلمات اللي هتستخدمها مع طفلك ليه تأثير أكبر مما تتخيل على شكل العلاقة بينكم، ويعتبر اختيار الكلمات هو الحل النهائي لمشاكل الأبوة حتى مع الأطفال اللي قليل جدًا ما بيسمعولك، لما تستخدم الكلمات الرقيقة مع طفلك هيكون عندك فرصة أكبر إنك تخليه ينتبه ويهتم بالكلام اللي انت بتقوله..
الأبحاث أثبتت إن الأطفال وكمان الكبار بيستجيبوا كويس جدًا للكلام اللي بيتقال بصورة لطيفة عن اللي بيتقال في صورة زعيق أو غضب، وبرغم إن الطفل فاهم إنك فقدت أعصابك أو إنك متنرفز وممكن كمان يزعل عشانك بس أسلوب الزعيق والنرفزة هيخلي طفلك يتجنبك عشان ميوصلكش للحالة دي تاني.
لازم تكون عارف إن الأطفال عندهم قدرة رهيبة على الإنجاز وتحقيق حاجات عظيمة، كل اللي الطفل محتاجه هو التشجيع وإنه يبقى عارف إن في حد مؤمن بيه وبقدراته، كل المطلوب منك إنك تركز مع انجازات طفلك كويس وتتكلم دايمًا معاه عن إنجازاته العظيمة اللي قام بيها..
واحنا في كفالة بنهتم جدًا بالأساليب التربوية للطفل سواء كان مكفول أو من نسبك، عشان كدا بنقدملك 5 نصايح هتساعدك تحقق أكبر استفادة ممكنة من كلماتك الإيجابية مع طفلك:
1- خليك دقيق: خلي طفلك يفهم انت بتمدحه على ايه بالظبط، يعني بدل ما تقول لطفلك "أنا مبسوط من اللي انت عملته" قوله "أنا مبسوط منك عشان ساعدت اخوك الصغير لما وقع"
2- التواصل الجسدي: من الحاجات المهمة اللي بتفرق مع للأطفال وكمان الكبار هي التواصل الجسدي، لما تيجي تمدح طفلك لفظيًا عشان تصرف معين، احضنه أو طبطب على كتفه أو على راسه، دا هيعزز رسالتك الإيجابية.
3- امدح طفلك في السر والعلن: الطفل محتاج يحس إنك فعلًا فخور بيه، محتاج يشوفك وانت بتفخر بيه وبتمدحه قدام العيلة والأصحاب، ومحتاج كمان يسمعك وانت بتقوله إنك فخور بيه بينك وبينه، عشان يحس إن فخرك بيه قدام الناس مش كان لمجرد العرض أو الشو، لأ دا احساسك الحقيقي تجاهه.
4- ركز على الإيجابيات: أحيانًا الطفل بيغلط وبيعمل حاجات مكنش مفروض يعملها واحنا طول الوقت بنحاول نصلح الجوانب الغلط إما بالنقد أو بالزعيق، بس احنا كمان محتاجين نركز على الحاجات الإيجابية اللي بيعملها الطفل أو بيقولها ونشجعه عليها زي ما بنحاول نصلح الحاجات الغلط.
5- استخدم الكلمات الصحيحة لما تيجي تأدب طفلك: حط في اعتبارك نوع السلوك الخاطئ الصادر من طفلك وعمره ومزاجه، عشان تقدر تحدد التقنية اللي هتستخدمها في التربية والكلمات اللي هتستخدمها في التأديب.
تقنيات بسيطة لمستوى أفضل من الأبوة والأمومة:
1- امدح سلوك طفلك الجيد: اعترافك بسلوك طفلك الجيد هو أفضل طريقة لتشجيعه على الاستمرار فيه.
2- اثبت على مبدأك مع الكل: لازم تطبق العدالة والثبات على المبدأ في كل مهامك ومع كل الأشخاص، متخليش طفلك يحس إنك متناقض.
3- اسمح لطفلك بالتعبير عن وجهة نظره: لما تحصل مشكلة حط في اعتبارك إن من الممكن إن يكون في ظروف معينة مخفية عنك، فانت محتاج تسمع لطفلك بصبر وتركيز، وتظهر لطفلك التعاطف والحب والاهتمام وانت بتسمعه عشان تقدر توصل لسبب المشكلة.
4- اسمع طفلك كويس: مهارة الاستماع مهارة صعبة على ناس كتير وبتحتاج لمجهود وصبر، بس الاستماع ضروري جدًا عشان تقدر تتواصل كويس مع الطرف التاني، ابذل أقصى جهدك عشان تسمع لطفلك كويس ومهما كان كلامه سخيف بالنسبالك، فهو بالنسباله مهم.
5- لا للمقارنة: متقارنش طفلك بأي طفل تاني ولا حتى اخوه.
6- ثقافة الاعتذار: اعتذر لطفلك لو ظلمته أو أسأت ليه.
7- التناسب: لما طفلك يغلط اتأكد إن العواقب مناسبة للخطأ اللي عمله الطفل، وفهم طفلك سبب عقابه إيه.
8- أنا هنا: خليك متواجد لما طفلك يحتاجك خصوصًا لو كان احتياج عاطفي.
لو لقيت طفك مضطرب أو متوتر اسأله محتاج إيه واستجيب بشكل مناسب، خلي ليك دور فعال في حياته، الطفل مش محتاج أكتر من اهتمامك وفهمك لاحتياجاته، ممكن تبدأ مع طفلك بداية جيدة عن طريق مشاركته هواياته أو بإنكم تعملوا قايمة سوا بالحاجات اللي حابب تعملها معاه.
ابذل أقصى ما عندك عشان تحافظ على ممارسة التقنيات والنصايح دي، مع حفاظك على طريقتك في تربية طفلك عشان تقدر تبني علاقة صحية بينك وبين طفلك فيها احترام وحب متبادل.
