أسباب كتير ممكن تدفع أسرة عندها أطفال من نسبها إنها تكفل طفل، وكل أسرة وليها أسبابها وقناعتها ورغباتها، واحنا في "كفالة" بنقدملكم أشهر الأسباب اللي ممكن تدفع أسرة لكفالة طفل برغم وجود أطفال من نسبها، وكمان بنقدملكم نصائح لحياة سعيدة وسط أطفالكم البيولوجيين والمكفولين.
أولاً: دوافع كفالة طفل برغم وجود أطفال من النسب:
- الأب والأم عندهم طاقة حب كبيرة ونفسهم يفرحوا قلب طفل ويضموه لأسرتهم
- حب الخير والطمع في الثواب ومرافقة الرسول في الجنة
- مشاكل صحية تمنع الحمل مرة تانية، مع رغبتهم في وجود أطفال أكتر
- مسؤولية مجتمعية والقناعة بإن من حق كل طفل أسرة
وأحيانًا بيحصل العكس، إن أسرة تكفل طفل وبعدين يحصل حمل، الفكرة إن في النهاية بيكون عندك أطفال من نسبك وأطفال مكفولين.
تعالوا نقولكم إزاي تقدروا تعيشوا حياة سعيدة وسط أطفالكم ميحسش فيها أي طفل بإنه مختلف؟؟
1- خلي طفلك على استعداد:
بمعنى إننا هنفهم الطفل اللي موجود معانا في البيت سواء كان من نسبنا أو مكفول، إن في أخ تاني هيوصل، ونفهمه إن وصول الطفل دا مش معناه إنه قليل أو مش كفاية، وإن وجود أخ ليه من أكتر الحاجات اللي هتسعده.
نبدأ نشارك الطفل في التحضيرات زي مثلًا تجهيز غرفة الطفل اللي هيوصل، ناخده ونشتري لعب ليه وللطفل اللي هيجي ونخليه يختارله لعبة هدية، خدوه معاكم وانتوا بتجيبوا الطفل لو سنه مناسب، حملوه شوية مسؤوليات للطفل زي تغير الحفاضات وقراءة القصص، قولوله إن هيكون ليه وقته الخاص معاكم وحددوه إمتى، يعني اشركوه في المهمة كلها وحسسوه إنهم جزء منها، مع تحسين علاقتكم بيه.
ولو كان الطفل الأول هو المكفول وبعدين حصل حمل ضروري توضحي لطفلك المكفول إن الطفل اللي جاي مش بديل ليه أبدًا، وإن هما الاتنين أولادكم، وإن هو فرد من العيلة زيه زي الطفل اللي هيوصل تمامًا.. واستعدي لبعض الكلام زي مثلًا "أنا كان نفسي آجي من بطنك" ... دا كلام عادي ومقبول وردك عليه يكون بإنك متفهمة دا كويس أوي، وإنه سواء كان جه بحمل أو بطريقة تانية فدا مش هيغير حاجة من حبك ليه..
2- التوازن:
أحيانًا بيميل بعض الأسر لمعاملة الطفل المكفول معاملة خاصة فيها تفضيل ليه على أمل منهم إن دا هيحسسه إنه محبوب وزيه زي أخوه أو خوف منهم إنهم يظلموه، بس للأسف دا بيخلي الأمور تسوء أكتر وبيعمل حساسية شديدة بين الاخوات، عشان كدا خليكم متوازنين وطبيعيين، واقنعوا نفسكم من جواكم إنهم واحد ومفيش بينهم فرق وعاملوهم نفس المعاملة..
3- طلب المساعدة:
طبيعي إن الأطفال هيكون بينهم نوع من التنافس وكل واحد يحس إن ماما أو بابا بيحبوه أكتر أو أقل من أخوه التاني، وقتها كل المطلوب منكم إنكم تأكدوا إنكم بتحبوهم زي بعض، لكن لو لاحظتو تغيير في شخصية أو سلوك حد منهم زي نوبات غضب شديدة، أو تبول لا إرادي، أو بيسألوا أسئلة غريبة صعب إجابتها، وقتها اطلبوا استشارة متخصص نفسي أو سلوكي.
وجود الأطفال نعمة، وإن الطفل يكون ليه أخ يسنده ويحبه ويدعمه نعمة كبيرة، متحرموش أطفالكم من إن يكون ليهم أخوات سواء من النسب أو بالكفالة.
