أثبتت التجارب إن معظم الأطفال المكفولين بيتمتعوا بصحة نفسية كويسة، وبيكبروا لأشخاص بالغين عاديين، إلا إن عدد قليل منهم قد يعاني من مشاكل نفسية بسبب كفالته في سن كبير، أو تعرضه للإيذاء في طفولته، لكن في الغالب معظم الأطفال والبالغين المكفولين بيتأقلموا بشكل كويس جدًا في المجتمع بدون أي مشاكل..
واحنا في "كفالة" هناقش معاكم من خلال سلسلة من المقالات إزاي تقدروا تعرفوا إذا كان طفلكم بيعاني من اضطرابات نفسية محتاجة لتدخل متخصص، وإزاي تقدروا تتعاملوا مع مشاعركم المؤلمة الناتجة عن مشاكل طفلكم النفسية، بالإضافة للتأثيرات اللي ممكن تحصل لعلاقتكم بشريك حياتكم بسبب مشاكل طفلكم..
إزاي تعرف إذا كان طفلك بيعاني من اضطرابات نفسية؟
طبيعي يكون صعب عليك إنك تحدد إذا كان طفلك محتاج لمعالج نفسي لأنك بتحبه وقريب منه ومتعلق بيه ومعتاد على أفعاله وتصرفاته، لكن أحيانًا بيكون الأمر واضح جدًا، زي إن طفلك بيتعمد يأذي نفسه، أو يأذي غيره بطريقة واضحة ومتعمدة، في العموم أي طفل عنده ميول انتحارية أو عنيفة فهو بحاجة للعلاج..
وبرغم كدا لو قررت تعرض طفلك على معالج نفسي بعد كفالته بفترة قصيرة، اتأكد من إن المعالج مدرك كويس إن جزء من صراع طفلك قد يكون بسبب محاولة الطفل للتكيف مع بيئته وبيته الجديد.
أما لو كان طفلك مش واضح عليه أي مشكلة نفسية، متحاولش تبالغ في رد الفعل وتفرض على طفلك علاج هو مش محتاجه، لو حسيت إن ممكن يكون في أي مشكلة محتملة ناقش المشكلة مع شريك حياتك أو حتى مع طفلك لو كان كبير، قبل ما تندفع وتعرض طفلك على معالج ممكن يفاقم المشكلة أو يخلق مشكلة مكنتش موجودة في الأساس.
من ناحية تانية، متحاوش تفترض إن طفلك بيعاني من مشكلة نفسية وتاخده لأقرب معالج، وهو في الأساس بيمر باضطرابات المراهقة الطبيعية.
متناس دور طبيب الأطفال، طبيب الأطفال هيقدر يقدملك نصايح مفيدة، كمان ممكن يقيم حالة طفلك، أو يحيلك لمتخصص تاني يقيمه...
توقيت سلوك الطفل مهم، يعني مثلًا مينفعش تحكم علي طفلك المكفول من أول يوم إنه مضطرب نفسيًا لو كان سلوكه مزعج ولا يطاق في أول يوم من وصوله لبيتك.
قد يكون من الصعب على طفل إنه يسيب الدار اللي قضى فيها 4 أو 5 سنين من حياته، ويتنقل فجأة مع أشخاص ميعرفهمش، وبرغم إن أحيانًا دور الأيتام بتبقى فظيعة لكن الأطفال بيعتادوا عليها، وهيعتادوا عليك انت كمان وهيحبوك كل ما يكبروا، الفترة الانتقالية لطفلك ممكن تستمر لأسابيع أو شهور عشان يقدر يتكيف مع نمط الحياة الجديد ومعاكم كأشخاص جداد على حياته...
إزاي تفرق بين السلوك الطبيعي والسلوك الغير طبيعي لطفلك المكفول
في أحيان كتير بيتصرف الأطفال بغرابة، وفي سلوكيات كتير غريبة أو سخيفة تعتبر ضمن النطاق الطبيعي، طب إزاي تقدر تحكم على سلوك طفلك بإنه سلوك غير طبيعي ومحتاج لتدخل أو علاج؟ دي بعض المؤشرات اللي بتدل على احتياج طفلك للعلاج:
- الطفل اللي بيتكلم عن الموت بشكل مستمر، أو بيقول إنه نفسه يموت، الطفل دا محتاج لعلاج فوري، الأطفال ممكن تنتحر وفي أطفال انتحرت قبل كدا بالفعل.
- درجات الطفل في المدرسة أقل بكتير من قبل كدا، والمدرسين بيشتكوا من سوء درجاته و/ أو من سلوكه (ممكن يكون طفلك عنده مشكلة نفسية أو ممكن يكون بيعاني من صعوبة في التعلم أو اضطراب نقص الانتباه وفرط الحركة أو مشكلة تانية بحاجة للتشخيص وللتدخل العلاجي) .
- وزن الطفل قل أو زاد بشكل ملحوظ جدًا، برغم عدم وجود طفرة نمو في حالة زيادة الوزن (التغييرات في الوزن ممكن يكون معناها إن الطفل يعاني من مشكلة طبية، اعرض طفلك على طبيب الأطفال أولًا)
- لو واضح إن مفيش شيء بيخلي طفلك سعيد، وبقى فاقد الاهتمام بالأنشطة اللي كان بيستمتع بيها.
- كل ليلة تقريبًا الطفل بيلاقي صعوبة في إنه ينام أو إنه يفضل نايم طول الليل.
- لو الطفل بيشتكي إن في ناس بتجري وراه وبتحاول تأذيه بطريقة غامضة أو سخيفة في نظرك.
- لو الطفل اللي في عمر المدرسة بيكلم نفسه أو بيكلم أشخاص مش موجودة بشكل متكرر.
- لو طفلك بيكرر طقوس معينة لدرجة تسبب الإزعاج وبتتعارض مع مارسته لأنشطته اليومية العادية.
- لو الطفل بيظهر سلوكيات يأذي بيها نفسه زي إنه يجرح نفسه متعمد (ممكن يكون الطفل عنده ميول انتحارية ومحتاج لعلاج عاجل)
أسئلة تسألها لنفسك لتحدد مدى احتياج طفلك لطبيب نفسي:
دي بعض الأسئلة العامة اللي هتحتاج تسألها لنفسك هشان تحدد مدى احتياج طفلك لطبيب نفسي:
- بالنسبة للمدة اللي عاشها طفلك في أسرتك، هل سلوك طفل بيتدهور؟ هل كفلت طفلك من سنين ولا من شهور قريبة، أحيانًا الأطفال المكفولين حديثًا ممكن يعانوا من صعوبات نفسية لأنهم بيحاولوا يتأقلموا، لو لاحظت إن سلوك طفلك بدأ يتدهور بعد سنين من حياته في أسرتك (مع استثناء فترة المراهقة) فغالبًا فكرة العلاج هتبقى فكرة كويسة.
- هل سلوك طفلك بيعرضه أو بيعرض غيره للخطر؟
- ايه اللي ممكن يحصل لو معرضتش طفلك على معالج نفسي؟ لو كنت شايف إن طفلك هيفضل على حاله وبرغم إن سلوكياته مزعجة إلا إنها محتملة لأنها في النطاق الطبيعي، يبقى غالبًا طفلك مش محتاج لعلاج، على العكس بقى لو شايف إن طفلك هيزداد سوء في حالة إنك معرضتهوش على طبيب، لدرجة إنه ممكن يحرق البيت وانتو نايمين مثلا، فطفلك محتاج لعلاج في أقرب وقت،بالنسبة لمعظم الناس، أطفالهم هتبقى في النص بين الطرفين دول، لو دا حال طفلك اسأل نفسك طفلك أقرب لمين فيهم؟ هل سلوكه أقرب للطفل الطبيعي ولا الطفل المضطرب؟ لو كان أقرب للطفل المضطرب يبقى طفلك محتاج لعلاج.
- هل بتقاوم عرض طفلك على معالج نفسي لأنك خايف إن أهلك وأصحابك وجيرانك يكتشفوا الموضوع؟ هل شايف إن دا هيخليك والد فاشل في نظرهم، أو ممكن يسبب وصمة عار لطفلك؟ لو دي مشكلتك حاول تتجاوزها واعرف إن أحيانًا بيبقى واجب على الآباء والأمهات إنهم ياخدوا قرارات مؤلمة أحيانًا.
- هل بتفكر في العلاج لأن حد من أفراد أسرتك أو مدرس لطفلك شايفين إن طفلك محتاج لعلاج، على الرغم من إنك شايف إن طفلك كويس وطبيعي جدًا، هما ممكن يكونوا على حق، وممكن جدًا لأ، انت الوحيد اللي تقدر تاخد القرار دا وتحدد حاجة طفلك للعلاج، حط الفكرة في اعتبارك وابدأ راقب طفلك وركز معاه لعل تشوف حاجة انت مكنتش شايفها قبل كدا
- أخر حاجة، شوف حدسك بيقولك ايه؟ ممكن يكون كل حاجة بتوحي إن طفلك طبيعي ومش محتاج لأي علاج، لكن حدسك بيقولك إن في شيء غلط، فكر في حدسك كويس، أحيانًا بيكون الحدس هو اللي صح حتى لو كان الواقع مختلف تمامًا
