الكفالة عمل عظيم ليه مميزات كبيرة لكنه في نفس الوقت ليه تحدياته وصعوباته اللي قد تكون مش بتنتهي، مش المقصود من المقال دا أبدًا إننا نخوفك من الكفالة، احنا بس حابين نوضحلك بعض الدوافع الخاطئة للكفالة، عشان لو واحد من الدوافع دي كان من ضمن دوافعك، فـ ضروري تعيد تفكيرك من تاني أو تستشير حد متخصص قبل ما تاخد قرار الكفالة.
1- البحث عن الطفل المثالي:
أولًا مفيش وجود أصلًا للطفل المثالي، العقلية اللي بتسعى لتربية طفل مثالي سواء كان ابنها عن طريق الولادة أو الكفالة هي عقلية مؤذية للطفل ومدمرة لرفاهيته، وحتى لو الطريقة دي مظهرش تأثيرها على الطفل في البداية، لكنها بتسبب مشكلات عميقة جدًا طويلة المدى على الصحة النفسية للطفل.
2- الرغبة في تحقيق دور البطل المنقذ:
في ناس بتعاني من عقدة في حياتها اسمها عقدة المنقذ، الناس دي بتسعى لمساعدة عشان يحصلوا على الحب والتقدير على أفعالهم من اللي حواليهم، لكن في الحقيقة الطفل مش محتاج لمنقذ، الطفل محتاج لحب دايم وغير مشروط، حب مفيش حاجة تبدله أو تغيره، الناس اللي بتعاني من عقدة المنقذ لما بيكفلوا طفل بيكونوا دايمًا منتظرين منه الشكر والامتنان مقابل كفالتهم ليه وكأن الطفل مديون ليهم، الآباء الكافلين مش منقذين، هما آباء بيحبوا أطفالهم بدون شروط ومش منتظرين منهم أي امتنان ولا شكر وعمرهم ما شافوا طفلهم مديون ليهم بأي شيء.
3- سد الفراغ:
في ناس بتسعى للكفالة عشان تملى فراغ موجود في حياتها، زي مثلًا علاقة سيئة بشريك حياتها أو شعور بالوحدة لعدم وجود شريك حياة، كفالة الأطفال مش سد خانة، الطفل اللي هتكفلوه محتاج ليكم ولحبكم ودعمكم، محتاج لما تكفلوه تحطوا مصلحته في الاعتبار قبل تحقيق رغباتكم الشخصية، حتى لو هتقبلوا على الكفالة بسبب عدم قدرتكم على الإنجاب ضروري جدًا إنكم تتخلصوا من مشاعر الحزن اللي جواكم بسبب عدم قدرتكم على الإنجاب وتدوا نفسكم الوقت الفرصة إنكم تتعافوا منها قبل ما تقدموا على الكفالة، لأنكم لو مشيتوا في سكة الكفالة لمجرد سد خانة أو ملء فراغ فغالبًا الوضع هينتهي بيكم بخيبة أمل غير متوقعة سواء كان مع طفلكم أو مع شريك حياتكم.
4- الكفالة بقت موضة وناس كتير بتعملها:
مينفعش أبدًا يكون دافعك للكفالة إنها بقت موضة وإن ناس كتير بتعملها فتعملها انت كمان، مينفعش تعملها عشان تقلد ممثل مشهور ولا عشان تقلد صاحبك، الكفالة التزام مدى الحياة وليها تحدياتها وصعوبتها اللي مش هتشوفها إلا لو دخلتها، ضروري يكون في دراسة كاملة ووافية للكفالة ولكل القضايا المتعلقة بيها ويكون ليها دافع قوي يخليك تلتزم تجاه طفلك مدى الحياة...
5- الاعتقاد بإن الكفالة سهلة:
الكفالة مش سهلة أبدًا، وفي الغالب بتبقى أصعب من تربية أطفال من نسبك، وبرغم إن الكفالة رحلة جميلة مليانة بلحظات رائعة حرفيًا إلا إن الكفالة ليها تحديات ومخاطر وخساير وتعقيدات واللي غالبًا مش بتنتهي، ضروري قبل ما تخوض رحلة الكفالة إنك تكون عارف إن كلمة "سهلة" مش هتبقى موجدة في قاموسك عشان توصف بيها الكفالة، لكن في نفس الوقت ربنا بيعين وبيدي القوة لكل أب أو أم صدقوا نيتهم في كفالة طفلهم عشان يقدروا يتخطوا كل الصعوبات المتعلقة بالكفالة.
