مع بداية محاولات الحمل، بيسيطر على الزوجين شعور كبير بالحماس، وعادةً بيصاحب شعور الحماس دا شعور بالقلق أو بالخوف من كونهم لسه مش مستعدين عشان يبقوا أب وأم، ومع مرور الشهور بيتلاشى الشعور بالحماس وبيظهر نوع مختلف من القلق وهو "ليه محصلش حمل لحد دلوقتي؟؟"
ومع مرور الشهور أكتر وأكتر بيتحول القلق لخوف، وبيبدأ خليط من المشاعر يسيطر على لزوجين لما يحددوا معادهم الأول في عيادة الخصوبة، خليط مشاعر بيبدأ بالحماس والأمل وبينتهي بالإحباط مع فشل أول دورة علاج .
شيء مرهق فوق الوصف، وضغط مش طبيعي على الزوج والزوجة، لكن إزاي يقدر الزوج والزوجة يتعاملوا مع الضغط دا؟؟
في "كفالة" بنقدملكم 5 نصائح مؤكدة للتغلب على ضغوطات مشكلات الإنجاب والخصوبة.
1. البحث:
اتعلم أي شيء تقدر عليه عن علاج الخصوبة والعقم والخيارات البديلة زي الكفالة، لأن كل ما زادت معرفتك كل ما قدرت تاخد قرار مدورس وتبني توقعات واقعية، ابدأ بالمعلومات اللي قدمهالك طبيبك، وزود معلوماتك من مصادر موثوقة.
2. غير اللي تقدر عليه حتى ولو شيء بسيط:
في بعض الأبحاث اللي اتعملت وأثبتت إن بعض التغييرات الصغيرة في نمط حياتك ممكن تزيد من الخصوبة، زي النوم الجيد، وبعض الأنظمة الغذائية، اعمل بحث صغير واعرف منه إيه الحاجات الصغيرة اللي تقدر تعملها عشان تحسن من الخصوبة.
3. متدفنش نفسك:
مشاكل الإنجاب وعلاجها من الأشياء المستهلكة جدًا، اللي هتمتصك وتمتص كل وقتك وطاقتك، طبعًا دي مش طريقة للعيشة، دور على حاجة تكون بتؤمن بيها تحط فيها جزء من طاقتك ووقتك وتحسسك بالإنجاز والرضا عن نفسك.
4. رجع الفرحة ليك ولشريك حياتك:
افتكر الحاجات اللي كنت بتعملها مع شريك حياتك وكانت بتسعدكم قبل ما تعرفوا إنكم بتعانوا من مشكلة في الإنجاب، اعملوا قايمة بالحاجات دي وارجعوا اعملوها مرة تانية، استمروا في التخطيط لمستقبلكم، فكروا في خطط لتقضية وقت أجازاتكم، وفكروا في ممارسة هواياتكم، بالطريقة دي مش بس هتكونوا أكتر سعادة لأ وكمان هتلهوا نفسكم عن التفكير في مشكلة الإنجاب.
5. استعين بمعالج نفسي:
مشاكل الإنجاب والعلاج من الحاجات الصعبة اللي بتأثر على علاقتك بشريك حياتك وبأصدقائك، اطلب استشارة معالج متخصص، اتكلم مع شخص حكيم يقدر يفهمك ويوجهك خلال رحلة العلاج عشان تحافظ على صحتك النفسية وعلى علاقاتك بالأشخاص من حواليك.
مشاكل الخصوبة والإنجاب مرهقة جدًا، لكن في طرق كتيرة للتأقلم معاها، ومحاولاتكم للتأقلم هتمنحكم احساس أكتر بالسعادة والوضوح على طول الطريق.
