لو تعرف أسرة مقدمة على الكفالة وهتستلم طفلها قريب وحابب تدعمها فاحنا في "كفالة" بنقدملك 5 طرق عملية لدعم الأسر الكافلة:
1- رحبوا بيهم في البيت: اعملولهم مفاجأة بالبلالين أو الديكورات اللي بترحب بوصول الطفل الجديد على باب البيت، ولو كنتوا فرد من أفراد العيلة أو على علاقة مقربة بالأسرة الكافلة ممكن تنضفوا البيت وتزينوه من جوا، حاولوا تتجنبوا أنواع الزينة اللي بتحتاج تنضيف بعد كدا...
2- اعرض المساعدة المنزلية: اعرض على الأسرة الكافلة إنك تيجي تنضف لهم البيت وتشوف لو محتاجين أي مساعدة، وقولهم إنك متاح في أي وقت لو احتاجوا لأي حاجة.
اعرض على الأبوين إنك تقوم بمهام بدل منهم، زي التسوق أو أي مشوار تقدر تقوم بيه مكانهم، بالطريقة دي هتديهم فرصة يقضوا وقت أكبر مع طفلهم وكمان يلاقوا وقت ياخدوا فيه قيلولة ويرتاحوا شوية.
حاجة من الحاجات اللي ممكن تساعد بيها الأسر الكافلة إنك تساعدهم في تحضير وجبات يومية خصوصًا لو كان الطفل رضيع ومحتاج لوقت ورعاية، اتفق مع أفراد العيلة والأصحاب إن كل يوم حد منكم يحضر وجبة أو وجبتين واعملوا جدول.
3- اعرض الاهتمام بالطفل لبعض الوقت: اعرض على الأبوين إنك تعتني بالطفل في أي وقت يحتاجوك فيه سواء عشان كان وراهم مشوار أو عشان يرتاحوا شوية، ومتضايقش لو كان الوالدين عندهم تعليمات معينة للرعاية بطفلهم، هما أبوه وأمه وأدرى بيه ودي حاجة متزعلش.
4- خلي بالك من أسئلتك: من الطبيعي إن يكون عندك فضول بخصوص الطفل وأسرته من النسب، لكن حاول تتغلب على فضولك وتركز كلامك على أحوال الأسرة الكافلة بعد الكفالة وعن احتياجاتهم، حاول تتجنب أسئلة زي "ليه أهله اتخلوا عنه؟؟" أو "اشمعنى الولد دا اللي اختارتوه؟؟"
حاول تتجنب السؤال عن أي تفاصيل ومتضايقش ولا تحس بالإحراج لو سألت عن حاجة ولقيت الإجابة "دا شيء خاص ومش حابين نتكلم عنه دلوقتي".
5- خليك حسيس: اخترم رغبة الوالدين في إنهم عايزين يقضوا وقت مع طفلهم لوحدهم، لو حاسس إن مفيش احتياج ليك ممكن تنسحب، احترم رغبتهم في إنك تغسل ايديك قبل ما تلمس الطفل وإنك متبوسهوش عشان الأمراض.
افتكروا دايمًا إن الأسر الجديدة محتاجة للمساعدة بصرف النظر عن طريقة تكوينها، وكل الآباء والأمهات محتاجين للدعم والتشجيع خصوصًا في الأسابيع الأولى.
