لو ابنك المراهق بدأ يتكلم ويسأل عن أسرته من النسب، خليك داعم ليه مهما كانت النتايج.
واحد من المواضيع اللي بتزعج الأسر الكفالة هو سؤال ابنهم عن أسرة نسبه، لأنه بيخلق جواهم تخوفات وقلق كبير من تعرض استقرار أسرتهم للخطر خصوصًا لو بدأ ابنهم رحلة البحث عن أسرة نسبه، في الحقيقة إن البحث عن أسرة النسب أو مجرد تجميع المعلومات عنهم بالنسبة لمعظم المراهقين المكفولين مش معناه أبدًا قلة حبهم لوالديهم الكافلين ولا رغبتهم في الانفصال عنهم، لكنه جزء من عملية اكتشاف ذاتهم الطبيعية اللي بتحصل في المرحلة دي من حياتهم.
عالم المراهق الداخلي:
البحث عن الذات أو الهوية هو شغل المراهق الشاغل، سواء كان مكفول أو لأ، لكن بالنسبة للمكفولين عملية اكتشاف الذات بتكون معقدة أكتر من غيرهم، بيبدأ المراهق يفكر "إزاي هعرف أنا مين من غير ما أعرف أنا أصلي إيه؟" "يا ترى هيبقى إيه تأثير اللي فات على اللي جاي من حياتي؟"
لو ابنك المراهق عبر عن رغبته في البحث عن أسرة نسبه دا معناه إنه بدأ رحلة بحثه عن ذاته الداخلية، معناه إنه بدأ يفكر في جوانب قصة كفالته بشكل مكثف، عايز يعرف هوية أسرة نسبه، ومدى تشابهه أو اختلافه عنهم، عايز يعرف سبب كفالته وليه أسرته مقدرتش تحتفظ بيه، وممكن يصاحب فضوله دا بعض الخوف من اكتشاف أي معلومة غير متوقعة.
لو ابنك المكفول طرح فكرة البحث عن والديه من النسب، ساعده قدر الإمكان على استكشاف أفكاره ومشاعره، وحط في اعتبارك إن كتير من المراهقين بيبقى صعب عليهم يطرحوا أفكارهم عن والديهم من النسب خوفًا على مشاعر والديهم الكافلين، الحوار المفتوح واحترام أفكار ابنك المراهق هيساعد كتير على تخفيف مخاوفه خصوصًا لو وضحت لابنك إنك داعم ومتفهم جدًا للي هو بيمر بيه، وإنك فاهم كويس إن بحثه أو أسئلته عن أبويه من النسب شيء منفصل تمامًا عن العلاقة اللي بتربطكم ببعض.
ممكن في البداية تكتشف إن رغبة ابنك في البحث هي مجرد بحث عن المعلومات، أو وسيلة للتعبير عن الحزن أو الغضب أو الارتباك، ولو فعلًا بدأ رحلة بحثه فالأفضل تستعين بمتخصص علاجي يقدمله الدعم، عشان طفلك يكون مستعد لأي نتيجة يوصلها، سواء اكتشف إن اهله اتخلوا عنه برغبتهم أو اكتشف وفاتهم.
فمهما كان اللي طفلك هيوصله فهو محتاج لمعالج يدعمه ويساعده على تقبل الحقايق اللي هيوصلها.وحتى إن قدر طفلك يوصل لأسرة نسبه، فضروري جدًا إنكم كأسرة كافلة تحطوا حدود مناسبة لعلاقة طفلكم بأسرة نسبه، وكمان توجهوه خلال عملية البحث.
نقاط الحديث بينك وبين ابنك المراهق عن أسرة نسبه:
لما تيجي تتكلم مع ابنك المراهق عن رغبته في البحث عن أسرة نسبه متسألوش أسئلة تبدأ بـ "ليه...؟"، النوع دا من الأسئلة بيخلي ابنك في موقف دفاعي خلال رده على أسئلتك، وبدل من كدا ممكن تستخدم الأسئلة المفتوحة زي:
1. لو وصلت لأبوك وأمك من النسب، عايز تسألهم عن ايه؟ وعايز تعرف إيه منهم؟؟
2. إيه تخيلاتك عنهم وعن شكلهم؟ تتمنى تلاقي إيه؟؟
3. تفتكر هيكون إيه رد فعلهم لما يشوفوك؟؟ تفتكر إيه شعورهم تجاه رغبتك في مقابلتهم؟؟
4. تفتكر علاقتك بيهم هتبفى عاملة إزاي لما تقابلهم؟؟
5. ممكن نساعدك إزاي؟؟
