أسر كتير من الأسر المقبلة على الكفالة عندها تخوف من إن ابنها لما يكبر يبحث عن أسرته من النسب، وعندهم تصور إن دا نوع من أنواع الخيانة ونكران الجميل، وأحيانًا التخوفات دي بتخلي بعض الأسر تتردد في إنها تاخد قرار الكفالة.
خلينا نوضحلكم حاجة، رغبة الطفل في البحث عن أسرته من النسب رغبة طبيعية غير مرتبطة بمدى قوة علاقته بيكم، وملهاش أي تأثير على العلاقة اللي بتربطكم بطفلكم.
في أسباب كتير بتدفع الطفل إنه يبحث عن أسرته من النسب ومش معنى كدا أبدًا إنه ناكر لجميلكم أو خاين ليكم أو إنه هيبعد عنكم.
وبالمناسبة مينفعش أبدًا تبصوا للطفل على إنكم أصحاب فضل عليه أو ليكم جميل عليه، دا طفلكم اللي اختارتوه بنفسكم، وبقيتوا بيه أب وأم، فمينفعش أبدًا تكون نظرتكم ليه إنكم أصحاب معروف أو فضل عليه.
كمان مش كل الأطفال المكفولين بيسعوا للبحث عن أسرة نسبهم، نسبة قليلة منهم اللي بيدفعها فضولها للبحث، والنسبة الأكبر بتكتفي بالمعلومات اللي عندها وبتقرر تكمل حياتها بدون ما ترجع لماضيها.
واحنا في "كفالة" جمعنا ليكم أشهر الأسباب اللي بتدفع الطفل للبحث عن أسرته من النسب عشان تطمنوا إن دا شيء طبيعي ومش هيأثر على العلاقة اللي بينكم.
1- الفضول الطبيعي: أشخاص كتير بيكون عندهم فضول يعرفوا قصتهم من بدايتها وإزاي وصلوا للوضع الحالي، وإزاي كان ممكن تكون حياتهم لو أهلهم متخلوش عنهم، فضول طبيعي وغالبًا الفضول بيولد فضول وكل ما بيعرفوا معلومة بيكون عندهم فضول يعرفوا أكتر وأكتر.
2- عايز أعرف أنا مين وأصلي منين: في مقولة بتقول "انت مش هتعرف إنت رايح فين غير لما تعرف إنت جاي منين"
ودا شيء صحيح جدًا، أشخاص كتير لما بيكون عندهم جزء مفقود من قصتهم بيكون عندهم احساس بالضياع أو بالتوهان وبإنهم مش قادرين يكملوا من غير ما يعرفوا الجزء اللي ناقصهم. كل شخص محتاج يعرف أساسه وبدايته عشان يقدر يكمل الرحلة لنهايتها.
3- أسباب صحية: أطفال كتير بيكون عندها مشاكل صحية متعلقة بالوراثة، ولما بيكبروا ويكونوا مسؤولين عن نفسهم أو عن أطفالهم بيكونوا مضطرين يدوروا على أسرتهم من النسب عشان يعرفوا التاريخ الصحي المتلعق بأسرتهم من النسب.
وعشان لما طبيبهم أو طبيب أطفالهم يسألهم عن تاريخ عيلتهم المرضي يعرفوا يجاوبوا عليه بإجابة غير أنا كنت مكفول ومعرفش حاجة عن عيلتي.
4- - البحث عن أصل شكله وسماته: لما بيكون في اختلاف كبير بين الطفل وأهله الكافلين في الشكل أو في لون البشرة، أو لو كان الطفل عنده شيء مميز في شكله أو في سماته، أحيانًا دا بيدفعه إنه يدور على أصله اللي بينتمي ليه، يدور على بلده والمكان اللي اتولد فيه والناس اللي تشبه، هو في الوقت دا مش محتاج يوصل لأبوه وأمه أد ما هو محتاج يعرف أنا بنتمي لفين وورثت سماتي وشكلي منين.
أسباب كتير ممكن تدفع طفلك إنه يبدأ يدور على أسرته من النسب لما يكبر، أسباب مش شرط تكون متعلقة بيكم، وفي الغالب بتكون متعلقة برغبته الطبيعية في معرفة بدايته وأساسه، ومش معناها تقصير منكم أو إنه بطل يحبكم أو مش عايز يكمل معاكم، دي رغبة طبيعية عليكم إنكم تحترموها ومتحسسوش الطفل إنه أذنب لمجرد إنه فكر فيها.
متخلوش رغبة الطفل في معرفة حقيقة أهله من النسب سبب أو مبرر إنكم تخفوا عنه حقيقة كفالته، لأن وقتها فعلًا هتكونوا بتخسروه للأبد لما يعرف الحقيقة حتى لو فضل عايش معاكم تحت سقف واحد.
افتكروا إنكم اللي ربيتم وكبرتم، وإن مفيش طفل ممكن يتخلى عن أهله اللي بيحبوه وضحوا عشانه وقدموله كل اللي يقدروا عليه عشان يعيش حياة كريمة، وإنه حتى لو وصل لأسرته ودا شيء يكاد يكون مستحيل، هو عمره ما هيبعد عنكم ولا حبه ليكم هيقل.
الشخص اللي يقدر يسامح أهله اللي اتخلوا عنه ويدور عليهم، مش ممكن أبدًا يتخلى عن أهله اللي حبوه وقدموله كل سبل الحياة.
