logo

إزاي تتعاملوا مع الأسئلة الموجهة ليكم عن كفالة طفلكم

لو انتوا أسرة كافلة فأكيد اتعرضتوا لأسئلة كتير حساسة ومزعجة بخصوص الطفل وأهله والمكان اللي جه منه، ضروري تحطوا في اعتباركم إن الأسئلة دي بتكون بسبب جهل من الناس أو فضول منهم وغالبًا مش بيكونوا متعمدين يضايقوكم او يزعجوكم..

عشان كدا حاولوا متخدوش الأمور بشكل شخصي، وجاوبوا بهدوء عشان تثقفوا غيركم عن الكفالة، مع الحفاظ على خصوصية طفلكم طبعًا، واعرفوا إن الرد بغضب أو عصبية هيسبب لطفكم الإحساس بإن في حاجة غلط بخصوص كفالته، أو إن كفالته سبب إحراج لأهله.

واحنا في "كفالة" جمعنا ليكم أشهر الأسئلة اللي ممكن تتوجه ليكم من الناس في محيطكم، وكمان زودنا كل سؤال بأكتر من إجابة تتناسب مع مدي قوة علاقتكم بالشخص اللي بيسألكم.

 

1- أسئلة بخصوص الابن الحقيقي موجهة للآباء:

السؤال: "مين فيهم ابنك الحقيقي، أكيد دا، شكله مش شبهكم خالص؟"

الإجابة:

  • "كلهم أولادي، مفيش فرق بينهم"
  • "كلهم أولادي الحقيقيين، قصدك يعني ابني من النسب، دي حاجة مش مهمة خالص عشان نتكلم فيها"
  • "كلهم أولادي الحقيقين، بذمتك مش محظوظ بيهم؟"

 

السؤال: "عندك كام طفل من نسبك، أو عندك كام طفل مكفول؟"

الإجابة:

  • "أنا عندي 3 أطفال من الكفالة والنسب"

 

السؤال: "هو فعلًا الولد دا ابنك بالكفالة؟"

الإجابة:

  • "في الحقيقة احنا الاتنين تكفلنا ببعض"
  • "آه، واحنا محظوظين جدًا إنه ابننا"
  • "أنا متفهم فضولك، بس دا سؤال شخصي شوية"

 

2- أسئلة عن أب وأم الطفل من النسب:

السؤال: "هو أهله متوفيين، ولا هما اتخلوا عنه، ولا هو مجهول النسب؟"

الإجابة:

  • "أكيد مكنوش قادرين يعتنوا بيه لسبب من الأسباب، واحنا قادرين الحمد لله"

 

السؤال: "تعرفوا إيه عن أسرته الحقيقية؟"

الإجابة:

  • "قصدك أسرته من النسب، أظن دا سؤال شخصي"
  • "لو قصدك باباه ومامته من النسب، فدي حاجة خاصة بالطفل منقدرش نشاركها مع حد"

 

السؤال: "هو أهله الحقيقيين كانوا مدمنين؟"

الإجابة:

  • "في الحقيقة احنا بالفعل أهله الحقيقيين دلوقتي، وكمان احنا مش بنشارك أي معلومات تخص أسرة الطفل من النسب برا البيت، دي حاجة تخصه هو"

 

3- أسئلة مبنية على مفاهيم خاطئة عن الكفالة:

السؤال: "دلوقتي بعد ما كفلتي طفل، فرضًا حملتي، هتعملي إيه"

الإجابة:

  • "وإيه المشكلة، احنا هنرحب بأي طفل يدخل أسرتنا مهما كانت الطريقة"
  • "وإيه العلاقة، هيبقوا أجمل اخوات "

 

السؤال: "مش كنتي كفلتي طفل رضيع بدل طفل كبير/ مش كنتي صبرتي شوية لحد ما تحملي؟"

الإجابة:

  • "احنا كنا محتاجين لطفل نحبه ويحبنا، والحمد لله ابننا مناسب جدًا لينا ولأسرتنا"
  • "وقت ما ربنا يأذن، نتمنى يكون عندنا بدل الطفل اتنين"

 

السؤال: "هو مفيش فترة تجربة، يعني لو مرتاحتيش مينفعش ترجعي الطفل تاني؟"

الإجابة:

  • "أولًا دي مش طريقة للتعامل مع طفل، ولا الأمور بتمشي كدا، الكفالة التزام دايم مدى الحياة مع طفل بقى جزء من أسرتنا خلاص"
  • "احنا مش بنشوف الأمور بالطريقة دي، زي بالظبط كدا إن مفيش فترة تجربة للطفل المولود، مهما كان مزعج أو مرهق لأهله"

 

السؤال: "أنا بجد عمري ما هقدر أحب/ أربي طفل غير أولادي؟

الإجابة:

  • "ما هو عشان كدا مش أي حد ينفع يكفل طفل، "
  • "عشان كدا الكفالة مش هتنفع معاكي، بس الحمد لله نفعت معانا جدًا"

 

السؤال: "إنت ليه عاوز تتحمل غلطة حد تاني وتربيله طفله؟"

الإجابة:

  • "احنا مش بنشوف الأمور بالطريقة دي، والكفالة طريقة جميلة جدًا لبناء الأسرة، واحنا مبسوطين جدًا"

 

السؤال: "مش خايف إن الطفل يكون عنده شوية مشاكل من أي نوع؟"

الإجابة:

  • "كل أب وأم عايزين الأفضل لأولادهم وهيقدمولهم المساعدة لو ظهر أي نوع من المشاكل"

 

السؤال: "إزاي حد يقدر يتخلى عن طفل جميل كدا؟"

الإجابة:

  • "أكيد طبعًا كان اختيار صعب، بس أكيد والدته من النسب كان عندها أسبابها واختارت إن الطفل يعيش مع حد يقدر يرعاه ويوفر احتياجاته"

 

السؤال: "إنت ليه قررت تكفل طفل"

الإجابة:

  • "عشان كان نفسنا نكون أب وأم"
  • "عشان كنا عاوزين طفل، والكفالة كانت خيار مناسب لينا ولظروفنا"
  • "عشان عندنا القناعة إن الكفالة وسيلة جميلة جدًا لبناء الأسر"

 

نصيحتنا ليكم:

رحلة الكفالة رحلة عظيمة ليها تحدياتها وليها إيجابياتها وسلبياتها، والرد على الملاحظات والتعليقات المحرجة يعتبر جزء بسيط من عملية الكفالة وجزء بسيط من المخاوف اللي بيواجها الآباء والأبناء في الكفالة

تقدروا تحطوا حدود معينة للمعلومات اللي الطفل حابب يشاركها مع الناس عن طريق الاجتماعات والمناقشات الأسرية... وممكن أطفالكم بردودهم الجميلة يعلموا الناس يعني إيه كفالة، ويعني ايه أسرة كافلة سعيدة...

التواصل مع أشخاص تانية غير الأب والأم ومناقشة الكفالة معاهم هيساعد الطفل إنه يتقبل الفكرة ويهضمها، والأجمل لو الطفل اتعرف على أطفال زيه مكفولين هيحس إنه مش مختلف وإن في زيه كتير..

لازم تكونوا كأب وأم قدوة لأولادك في الرد بطريقة محترمة على الأسئلة والتعليقات المحرجة، ولازم تعززوا فكرة انكم فخورين بكفالة ابنكم عند الطفل وعند الناس من حواليكم، وتوصلوا للناس إنكم بتحترموا خصوصية طفلكم ومش قاصدين تحرجوهم أو ترفضوا الإجابة على أسئلتهم..

وأهم حاجة إنكم تكونوا مؤمنين بإن الكفالة طريقة جميلة لبناء أسرة، وتقولوها للناس بصوت عالي..

مقالات اخري