تقديم طفلك المكفول للعيلة والأصدقاء
أسر كتير يوم وصول طفلها المكفول بتعمل حفلة تعزم فيها كل قرايبها وأصحابها عشان تعرفهم على طفلها الجديد، وأسر تانية بتفضل إنها تستنى كام يوم أو كام أسبوع أو حتى كام شهر وبعدين تبدأ تقدم طفلها للناس بشكل تدريجي..
طب ايه أفضل طريقة تقدم بيها طفلك المكفول لعيلته الجديدة وتعرفه عليها؟؟ وهل تقديم الطفل المكفول لعيلته يتختلف عن الطفل البيولوجي؟ دا اللي هناقشه معاكم في "كفالة"
برغم إن ممكن علاقة الحب بينك وبين طفلك تحصل من أو نظرة ومن أول لقاء بينكم، لكن متتوقعش إن دا هيحصل بين طفلك وبين باقي أفراد عيلتك زي اخواتك ووالدك ووالدتك وحتى أطفالك التانيين لو كان عندك أطفال غير طفلك المكفول، طبيعي إنهم يحتاجوا لوقت عشان يقدروا يحبوا طفلك، وحتى طفلك نفسه مش هيحبهم بمجرد ما يشوفهم، هو كمان هيحتاج لوقته، وافتكر إن قد يكون شيء مخيف على طفل إنه يقابل حشد من الأقارب والأصدقاء مرة واحدة في بيت أول مرة يدخله..
ممكن تسهل تقديم طفلك لعيلتك عن طريق بعض الطقوس الخاصة بيكم كأسرة، زي الاحتفال بطريقة معينة خاصة بيكم أو في مكان معين مميز بالنسبالكم..
في بعض الأسر بتختار إنها تحتفل بوصول طفلها في أقرب وقت بعد وصوله، وأسر تانية بتفضل إنها تنتظر فترة لحد ما تحس بالاستقرار مع طفلها، في العموم انت لوحدك اللي تقدر تحدد ايه الأفضل ليك ولطفلك، هل هيبقى أفضل ليه لو احتلفت بيه بمجرد وصوله وعرفته على أفراد عيلته وأصدقاءك، ولا واضح على طفلك إنه لسه مش مطمن وهيبقى أفضل لو انتظرت فترة لحد ما الطفل يحس بالاستقرار والأمان...
فقرة الأسئلة:
طبعًا هتتفاجئ من كم الأسئلة اللي هتتوجه ليك عن طفلك وعن الكفالة بوجه عام خلال رحلة الكفالة، من أول ما تعلن الخبر بإنك هتكفل طفل، ولحد ما لا نهاية تقريبًا، لكن لما تيجي تقدم طفلك لعيلتك وأصحابك في أسئلة معينة هتواجها..
ودي أشهر الأسئلة اللي بتتوجه لأي أبوين كافلين خلال تقديم طفلهم للناس، جهز نفسك واستعد للإجابة:
- "هل متأكد إنك هتقدر تحتفظ بالطفل مدى الحياة؟"
يمكن السؤال يكون مزعج أو مستفذ بالنسبالك، بس الناس بتسمع عن الأطفال المكفولين اللي أسرهم الكافلة رجعتهم للدار بعد فترة ومقدرتش تكمل، فلما حد يسألك إذا كنت متأكد من إنك هتقدر تحتفظ بالطفل للأبد هو مش قصده يزعجك أو يضايقك، هو في الغالب مهتم بيك بصدق وعايز يتأكد إنك بتعمل الشيء الصح..
في العموم إنك ممكن تجاوبه بإن الكفالة التزام مدى الحياة، وإن أسرتكم أسرة دايمة، وإن العلاقة بينك وبين طفلك مش هتفرق عن العلاقة بينه وبين طفله من النسب، وإنك قادر على الاحتفاظ بيه زي اي أب قادر على الاحتفاظ بابنه من نسبه، ولو حسيت إنك مش مرتاح للكلام أو الشرح في الوقت دا ممكن تجاوب بـبساطة بـ "كل حاجة تمام جدًا، متقلقش"
- "طفلك جميل أوي، إزاي والدته قدرت تتخلى عنه"
لما أي حد يسألك إزاي أم تقدر تتخلى عن طفل جميل بالشكل دا، اشرحلهم إن القرار دا في الغالب بيكون قرار الأم من قبل ما تولد طفلها، وبالتالي جمال الطفل مش هيبقى ليه أي عامل ولا تأثير على قرارها، حاول تخلي إجاباتك معممة ومتقدمش لأي شخص تفاصيل خاصة بحياة طفلك لأنها شيء يخصه وهو لوحده اللي مفروض يقرر مين حقه يعرف المعلومات اللي تخصه...
- "انت متأكد إن والدته من النسب مكنش عندها أي أمراض أو مكنتش مدمنة للمخدرات؟"
طبعًا دا سؤال تطفلي جدًا وظالم تمامًا، لما أم بتنجب طفلها مفيش حد بيفكر يسألها إذا كان في شيء غلط في صحتها ممكن يضر طفلها، فـ ليه بقى الناس بتفترض إن لمجرد إن الطفل مكفول، فلازم مامته من النسب تكون مريضة أو مدمنة؟
تقدر تجاوب على السؤال ببساطة بإن طفلك صحته كويسة جدًا الحمد لله...
- "دفعت كام في موضوع الكفالة دا؟"
طبعًا دا سؤال مزعج جدًا، لان الأطفال مش للبيع ولا الشرا، وحتى الفلوس اللي بتدفعها خلال عملية الكفالة هي رسوم إدارية، يمكن كمان تكون الرسوم دي أقل من تكاليف الحمل والولادة بمراحل، نصيحتنا ليك إنك متتكلمش مع حد بخصوص الفلوس اللي دفعتها خلال رحلة الكفالة، عشان محدش يعاير طفلك فيما بعد بالفلوس دي، أما لو حسيت إن حد بيسألك عشان عايز يعرف المعلومة بصدق ويستفيد منها، فانت ممكن تقوله التكاليف في صورة معلومات مش في صورة رقم انت دفعته...
فكر قبل ما تتكلم:
أكبر غلط ممكن يغلطوا الأبوين الكافلين إنهم يتكلموا مع كل الناس من حواليهم عن التفاصيل الدقيقة الخاصة بطفلهم، للأسف الناس مش بتنسى التفاصيل اللي زي دي، وأي معلومة بخصوص طفلك ممكن يتم استغلالها ضد طفلك لسنين حتى بعد ما يكبر
مش ضروري أبدًا إنك تشارك معلومات خاصة عن طفلك وعن حياته قبل الكفالة أو عن أسرة نسبه مع كل الناس بما فيهم والدك ووالدتك، معلومة عن طفلك وعن كونه طفل يتيم الأبوين أو مجهول النسب مش هتفيد حد في شيء، معلومة عن حادثة العثور على طفلك أو عن والدته من النسب ملهاش أي معنى في حياة الناس من حواليكم، متديش لحد معلومة ممكن تنعكس على طفلك فيما بعد.
في أسر بتبقى متخيلة إنها لازم تجاوب على كل أسئلة ببتوجه لها سواء كان عن الكفالة وعن عن طفلها، ممكن يكون دا سببه إنهم لسه مش حاسين بكامل استحقاقهم لطفلهم، بس احنا نصيحتنا ليك متعملش كدا، الكفالة مش سر ومش بتستخبى لأنها مش حاجة تكسف ولا حاجة نخجل منها، لكنها فيها خصوصية كبيرة، احمي خصوصية طفلك قدر الإمكان وبلاش تخليه كتاب مفتوح، فكر في كل معلومة قبل ما تشاركها مع غيرك وإيه ممكن يكون تأثيرها على حياة طفلك لما يكبر.
الخلاصة:
- قرر بنفسك أفضل طريقة وأفضل وقت لقديم طفلك لعيلتك..
- ادي عيلتك وقتها عشان تعتاد على طفلك الجديد، وادي طفلك وقته عشان يعتاد على عيلته الجديدة.
- طقوس احتفالات بالكفالة ممكن تكون مفيدة لطفلك.
- احمي خصوصية طفلك واحتفظ بالمعلومات السلبية عنه وعن أسرة نسبه.
