الأطفال بيستكشوا العالم من حواليهم عن طريق الأسئلة، ولما طفلك بيعرف حقيقة كفالته بتدور معظم أسئلته عن المامتهات والأطفال وإزاي كفلتوه، واحنا في كفالة جمعنا ليكم معظم الأسئلة اللي ممكن طفلك يسألها بخصوص الكفالة في كل مراحل عمره ومعاها أفضل الإجابات اللي بينصح بيها الخبراء، كل اللي هتحتاجه إنك تعيد صياغة الإجابات دي بحيث تناسب وضع أسرتك وعمر طفلك، يلا بينا نبدأ..
1- "هو أنا اتولدت من بطنك يا ماما؟"
"لأ، انت اتولدت من بطن مامتك من النسب (مامتك البيولوجية)، ولما اتولدت مامتك وباباك من النسب مقدروش يعتنوا بيك، ووقتها أنا وبابا أخدناك وبقيت ابننا، ودي اسمها كفالة، واحنا مبسوطين جدًا إننا كفلناك وبقيت ابننا"
لأن الطفل في السن الصغير مبيبقاش فاهم إزاي عملية الحمل والولادة بتتم فضروري جدًا إنكم تتكلموا عن الأب من النسب مش الأم من النسب بس، ولأن الطفل محتاج يعرف إنه اتولد زيه زي أي طفل تاني فانت مينفعش تتخطى المعلومة دي وتقوله "لأ، انت متولدتش من بطني، واحنا كفلناك" وقتها الطفل هيوصل لفهمه واعتقاده "أنا متولدتش من بطن ماما، أنا طفل مكفول!" وكأن الطفل المكفول مش بيتولد زي باقي الأطفال.
2- "ليه بابا وماما من النسب اتخلوا عني"؟
"أحيانًا لما الأب والأم بينجبوا طفل مبيكنش عندهم القدرة على رعايته أو رعاية أي طفل تاني في الوقت دا، السبب ملوش دعوة بأي مشكلة أو غلط في الطفل، السبب متعلق بالكبار وبوضعهم في الوقت دا، أي طفل بيتولد بيحتاج لعناية طول الوقت، بليل وبالنهار، بيحتاج أكل صحي، ومكان دافي ينام فيه، ورعاية لما يمرض، محتاج حد يشيله لما يعيط، وباباك وماماتك من النسب مكنش عندهم القدرة يقدمولك كل الحاجات دي، فاختاروا إن يكون ليك أسرة تانية قادرة تقدملك كل اللي انت محتاجه"
3- "هي أمي من النسب كانت زعلانة لما سابتني؟"
"أكيد طبعًا كانت زعلانة يوم ما ودعتك، بس هي كانت عارفة إنها مش هتقدر توفرلك كل اللي انت محتاجه عشان تعيش مبسوط وبصحة كويسة، فعشان كدا هي أكيد هتبقى مبسوطة لما تعرف إنك عايش مع أسرة بتوفرلك كل حاجة انت محتاجها"
4- "كان نفسي أتولد من بطنك انتي يا ماما"
"انت زعلان عشان متولدتش من بطني، أنا كمان كان نفسي تتولد من بطني، بس مفيش مشكلة أنا حاسة إنك قريب مني كأنك كنت في بطني في يوم من الأيام، أنا فعلًا بحبك جدًا"
ملاحظة: متقلقيش لو طفلك عبر عن حزنه لما تكلميه عن كفالته، دي مشاعر طبيعية، الطفل في مرحلة قبل المدرسة بيكون أهم حاجة عنده إنه يحس بالقرب من مامته، الحزن أو حتى الغضب شيء طبيعي خصوصًا في مرحلة الطفولة ويعتبر طريقة لتعبير طفلك عن حبه ليكي.
5- "انتو ليه كفلتوني/ أنا ليه طفل مكفول؟"
"أنا وبابا مكناش قادرين ننجب طفل، ولما انت اتولدت مامتك وباباك من النسب مكنوش قادرين على رعايتك ومكنوش مستعدين عشان يكونوا أسرة، وأنا وبابا كنا جاهزين عشان نكون أب وأم وكان عندنا القدرة على رعايتك عشان كدا كفلناك وكوّنا سوا أسعد أسرة للأبد"
أو : "أنا وبابا كان عندنا مكان في قلبنا وأسرتنا يسع طفل كمان بعد ما أنجبنا أخواتك، ولما انت اتولدت مامتك وباباك من النسب مكنوش قادرين على رعايتك ومكنوش مستعدين عشان يكونوا أسرة، وأنا وبابا كنا جاهزين عشان نكون أب وأم وكان عندنا القدرة على رعايتك عشان كدا كفلناك وكوّنا سوا أسعد أسرة للأبد"
6- "هو إيه اللي حصل يوم ولادتي؟"
"انا كان نفسي أكون موجودة اليوم دا وأحكيلك، بس أنا للأسف مكنتش موجودة ومعنديش أي معلومة، بس أنا متأكدة إنك كنت طفل جميل"
7- "هو أنا كنت طفل وحش، هو أنا كنت بعيط كتير عشان كدا ماما سابتني؟"
"طبعًا لأ، مفيش طفل وحش، كل الأطفال بتعيط عشان تعبر عن احتياجاتها، بتعيط لما بتكون جعانة أو عطشانة أو عايزة تنام أو تعبانة، والكفالة مش بتحصل بسبب الطفل، الكفالة بتحصل لأسباب ليها علاقة بالكبار، أحيانًا لما الطفل بيتولد مامته وأبوه من النسب مبيكنش عندهم القدرة على رعايته أو توفير احتياجاته، فبيكون الأفضل ليه إنه يعيش مع أسرة تانية قادرة توفرله اللي هو محتاجه عشان يكبر بصحة كويسة ويعيش حياة حلوة"
8- "هو أنا شبه مامتي من النسب؟"
"أنا معرفش شكلها إيه، بس إنت أكيد فيك شبه كبير منها، عشان كدا هي أكيد جميلة، إيه رأيك لو نتخيلها سوا ونرسملها رسمة"
9- "أتمنى إني أقدر أشوف مامتي من النسب وأسألها عن_________"
"إيه رأيك لو تكتبها جواب أو رسالة فيها كل اللي عاوز تسألهولها، وتقولها أي حاجة انت عاوز تقولهالها، بس احنا مش هنقدر نبعتلها الجواب دا عشان احنا منعرفش مكانها ومش هنعرف نوصلها، إيه رأيك نعمل بوكس تجمع فيه صورتها اللي رسمناها وتحطلها فيه كل الجوابات اللي حابب تكتبهالها بعد كدا"
10- "هو انا ليه لون عيني أخضر وانتي وبابا لون عينيكم بني؟"
"أكيد حد من باباك أو مامتك من النسب كان لون عينيه أخضر، أنا أخدت لون عيني من مامتي، وبابا أخد لون عينيه من باباه ومامته، كل واحد بيورث شكله من مامته وأبوه اللي ولدوه، زي لون العين ولون الشعر، ولون البشرة، عشان كدا الناس بتختلف عن بعضها، وأنا بحب لون عينيك جدًا وكمان لون شعرك، وأيًا كان شكلك سواء شبهي أو لأ فأنا بحبك عشان انت ابني"
11-"هو ليه محدش نصح ماما إزاي تكون أم أو ساعدها عشان تقدر تخليني معاها؟"
"أحيانًا لما الطفل بيتولد، مامته مبيكنش عندها استعداد إنها تكون أم وترعاه، وبتحتاج إن طفلها يتربى مع أسرة تانية عندها استعداد لرعايته، ومامتك اختارت الأحسن ليك لما أدركت إنها مش مستعدة لرعايتك"
12- "لو انتي أمي من النسب، كنتي هتسبيني برضو؟"
"مممممممممم دا سؤال كبير شوية، حبيبي مامتك اضطرت تاخد قرار صعب جدًا، لكن انا مفيش حاجة هتضطرني إني آخد القرار دا أبدًا، انت ابني وأنا مامتك ودي أسرتك للأبد، ومفيش أي سبب في الدنيا ممكن يغير دا"
13- "أهلي الحقيقيين كانوا هيسيبوني أخرج واتأخر برا براحتي"
"احنا مش بنتكلم دلوقتي عن مين حقيقي ومين مش حقيقي، احنا بنتكلم عن قواعد البيت وعن مواعيد مينفعش نتأخر عنها، وهنبقى نتكلم عن إذا كنا أهلك الحقيقيين ولا لأ في وقت تاني"
وبعدها بيوم أو اتنين ممكن تقوله "فاكر لما كنت غضبان عشان موافقناش إنك تتأخر برا البيت، أنا عارفة إنك كنت مضايق جدًا عشان كدا لمحت إني مش مامتك الحقيقية، دلوقتي بعد ما هدينا تحب تسألني عن حاجة بخصوص أسرتك من النسب، أو في أي حاجة تانية حابب تسأل عنها، قولي أقدر أساعدك إزاي؟"
الطريقة اللي هتجاوب بيها على أسئلة طفلك مهمة اكتر من الكلمات اللي هتقولهاله، خصوصًا مع الأطفال الأصغر في السن، ابدأوا الكلام معاهم عن الكفالة في سن مبكرة عشان يعتاد طفلك على كلمات زي "الكفالة" و "الآباء من النسب"
وهنا هنقدملك 10 قواعد هتساعدك تجاوب طفلك على الأسئلة الخاصة بالكفالة:
1- استخدم النغمة الصح في الكلام:
خلي صوتك هادي وجسمك مسترخي تمامًا، خلي طفلك يعرف إن مناقشة الكفالة شيء مريح بالنسبالك، وإنك سعيد بالكفالة كطريقة لبناء أسرتك.
2- اللعب:
اللعب من أحسن الوسايل اللي بيقدر الطفل يعبر بيها عن مشاعره بخصوص الكفالة، باستخدام العرايس ممكن تعملوا سيناريو عن الكفالة وتفتح لطفلك مساحة يحكي فيها عن مشاعره، زي مثلًا "الدب الصغير لوحده وعايز ماما" أو "العروسة باربي عايزة طفل تربيه وتحبه" وهكذا، وبعدها هتتفاجئ بالمشاعر اللي بتطلع من طفلك في اللعب.
3- افهم بالظبط طفلك بيسأل عن إيه:
ممكن يكون سؤال طفلك أبسط مما تتخيل او معقد أكتر مما تتخيل، فانت محتاح تفهم المعزى من سؤاله عشان تقدر تجاوبه صح، لما طفلك يسألك "أنا جيت منين؟" انت محتاج تسأله "قصدك المكان اللي اتولد فيه؟" ممكن دا فعلًا يكون قصده وممكن يكون قصده الطريقة اللي بيجي بيها الأطفال الدنيا، أو ممكن يكون قصده يسأل عن أهله من النسب، عشان كدا افهم كويس قصد طفلك من سؤاله.
4- ادي نفسك فرصة للتفكير:
كرر سؤال طفلك على ما تفكر، لو لسه مش متأكد من اجابتك، قول لطفلك "سؤالك جميل جدًا، بس أنا محتاج فرصة أفكر قبل ما أجاوبك" أو قول لطفلك "خليني أجاوبك بعد ما أخلص اللي في إيدي/ لما نروح البيت، وهكذا" بس طبعًا توفي بوعدك وتجاوبه مش تتهرب من الإجابة.
5- اعترف لو مش عارف الحقيقة:
لو مش عارف أي معلومات عن طفلك قبل كفالته ولا عن سبب وجوده في دار الرعاية قوله "احنا منعرفش الحقيقة بالظبط بس اللي نعرفه إن أمهات كتير من النسب مش بتقدر تحتفظ بطفلها بسبب الفقر أو صغر السن، وعدم قدرتهم على توفير حياة كريمة لطفلهم وأظن دا اللي حصل معاك" أو اعرض سبب تاني.
6- ادي طفلك كل اهتمامك وانت بتكلمه:
الأطفال وهما صغيرين بيحتاجو منك تديهم كامل اهتمامك وانت بتكلمهم أو لما يسألوك عن حاجة، محتاجين منك تنزل لمستواهم وتبص في عينهم، لما الطفل يكبر ويدخل في مرحلة المراهقة وقبلها كمان، بيكون التواصل البصري أصعب عليه وبيحتاج عشان يتواصل معاك إنك متبصش أوي في عنيه زي وقت ما كان طفل صغير، ممكن تستخدم المحادثات الموازية زي مثلًا وانت سايق أو وانتوا بتتمشوا، أو وانتو مع بعض في المطبخ عشان تتكلموا براحة عن أهله من النسب أو عن أي موضوع متعلق بكفالته.
7- خليك مستعد لتغيير الموضوع:
برغم إن طفلك ممكن يوجهلك سؤال صعب والمناقشة بينكم ممكن متعديش 5 دقايق على بعض، بس توقع في أي لحظة إن طفلك يغير الموضوع تمامًا، لو دا حصل سيب لطفلك السلطة في قيادة المحادثة زي ما هو عايز.
8- عيد التفكير في المحادثة:
طفلك هيكرر نفس السؤال بطريقة مختلفة واكتر من مرة في مراحل مختلفة من عمره، عشان كدا بعد كل محادثة بينك وبين طفلك، فكر فيها وافتكر هل كانت إجابتك ليه وافية وكفاية ولا لأ، ولو افتكرت حاجة مهمة حابب تضيفها أو تعدلها، قول لطفلك "فاكر لما سالتني عن ____ أنا فكرت في الموضوع أكتر شوية وحابب أقولك _____"
9- خلي المناقشة مناسبة لعمر طلفك، بس متكذبش أبدًا:
طفلك في مرحلة طفولته مش هيبقى فاهم يعني إيه طفل مجهول النسب، فانت محتاج تكشف عن التفاصيل بطريقة تناسب سن طفلك، بدون ما كلامك يناقض بعضه لما طفلك يكبر ويفهم، بس حط في اعتبارك إنك تشارك كل المعلومات اللي تعرفها مع طفك قبل وصوله لسن المراهقة، لأن طفلك هيعرفها يعني هيعرفها سواء منك أو من غيرك، فانت محتاج تكون صريح من بدايتك معاه بس بطريقة تناسب كل مرحلة من مراحل عمره.
10- ارمي الطعم:
لو طفلك بطل يسأل مؤخرًا عن الكفالة وعن أي حاجة متعلقة بيها، فانت محتاج ترمي سؤال كطعم يساعدك تبدأ المحادثة معاه زي مثلًا "تعرف أنا دايمًا بفكر في مامتك في عيد الأم" أو "تفتكر إنت شبه مين أكتر، باباك ولا مامتك من النسب" أو "يا ترى انت وارث الحس الفكاهي دا من مين، بابك ولا مامتك من النسب؟"
القاعدة بتقول لو مش فاكر امتى آخر مرة اتكلمت مع ابنك عن الكفالة، فدا وقت المحادثة..
