سواء كنت شخص كافل أو كنت بتتمنى تكفل طفل، أو عندك فضول في التعرف على الكفالة، فاحنا في "كفالة" هنناقش معاك كل شيء خاص بالكفالة، وهنقضي على كل المفاهيم الغلط المنتشرة عنها.
"منى سيدة متزوجة اتحرمت من نعمة الأطفال، في يوم شافت في أحد مواقع التواصل الاجتماعي بوست عن طف تم العثور عليه جمب صندوق زبالة، منى دمعت لأنها مش مستوعبة إزاي حد يرمي طفله برغم إن في ناس زيها هتموت على طفل ومش عارفة تنجبه، ولما هديت فكرت إزاي تقدر تكفل طفل ملوش أسرة وتكون هي وزوجها للطفل دا أبوه وأمه"
"هدى، آنسة تمت ال 30 سنة ومتزوجتش حتى الآن لأنها مش لاقية شخص يناسبها، لكنها في نفس الوقت نفسها تبقى أم، حاسة العمر بيجري بيها وخايفة متلاقيش الشخص المناسب، وتكمل حياتها لوحدها بدون زوج أو أطفال تحبهم ويحبوها، فكرت هدى إزاي تقدر تبقى أم من غير ما تتزوج، ولما بحثت عرفت عن الكفالة وإنها تقدر تبقى أم من غير ما تتزوج وتنجب أطفال"
قصص كتير مشابهة للقصص دي حصلت وبتحصل يوميًا، وكلهم بيجمعهم شيء واحد مشترك، وهو بناء أسرهم عن طريق الكفالة، تعتبر الكفالة وسيلة ناجحة لبناء الأسر، وبسببها اتكونت آلاف الأسر السعيدة في مصر وخارج مصر، ومعظم الأسر الكافلة عبرت عن الكفالة بإنها وسيلة ناجحة وإيجابية جدًا لبناء الأسر.
حتى الآن تم كفالة حوالي .14 ألف طفل مصري لـ 14 ألف أسرة كافلة تقريبًا، ومازالت التقديمات مستمرة وفي ازدياد شديد جدًا في الفترة الأخيرة، حتى إن وزارة التضامن أعلنت مؤخرًا إنها استقبلت في شهر واحد أكتر من 1000 طلب.
يمكن نكون متخيلين إن عشان في محيطنا مفيش أسر كافلة، فمعنى كدا إن الكفالة مش منتشرة، في الحقيقة إن في أسرة كافلة واحدة على الأقل في محيطنا أو في محيط حد نعرفه، لكن مش كل الناس بتحب تتكلم عن كفالة طفلها أو تظهرها للناس لأنها بتعتبر دا شيء خاص بأسرتها بس، وفي بعض الأسر بتخفي حقيقة كفالة طفلها تمامًا وبتتظاهر كأنه ابنها من نسبها عشان تتجنب الأسئلة والتعليقات المحرجة النابعة عن سوء فهم الكفالة وعن الخرافات والمفاهيم المغلوطة المتعلقة بيها، ودا طبعًا مش شيء صحيح لأن الكفالة مش حاجة عيب ولا حاجة غلط عشان نخبيها.
الكفالة بتتم في مصر عن طريق نظام الأسر الكافلة البديلة اللي أنشأته وزارة التضامن الاجتماعي عام 1959، وبيتم العمل بيه حتى الآن مع اجراء بعض التعديلات على النظام كل فترة لتسهيل الشروط وتيسير كفالة أكبر عدد من الأطفال..
