يمكن أصعب مرحلة على أي طفل هي مرحلة المراهقة، سواء كان الطفل دا عايش مع أسرة نسبه أو أسرته الكافلة، ولأن كل شخص مكفول بيمر بتحديات كبيرة خلال مراحل حياته، فاحنا منقدرش أبدًا ننكر التحديات اللي بتواجه المكفولين في أصعب مراحل عمرهم وهي مرحلة المراهقة، هنعرض لكم هنا أشهر المشكلات اللي بتقابل بعض المراهقين المكفولين خلال رحلتهم لفهم قصة كفالتهم، مع الوضع في الاعتبار إن مش كل المراهقين بيمروا بالمشكلات دي:
1- سبب الكفالة "أنا ليه مكفول؟؟"
- ايه اللي بيدور في دماغ المراهق: بدء تمييز الخساير المتعلقة بالكفالة ورغبة في معرفة "هل أنا كان فيا شيء غلط كان السبب في تخلي اسرة نسبي عني؟؟"
- المراهق محتاج ايه في الوقت دا: محتاج يعرف تفاصيل أكتر عن كفالته، محتاج فرص يعبر فيها عن حزنه وعن خسارته، محتاج منكم تتقبلوا مشاعر حزنه من غير سخط او زعل ومن غير ما تاخدوا الأمور بمحمل شخصي أو على إنها رفض لشخصكم..
2- هما مخبيين ايه عني؟؟
- ايه اللي بيدور في دماغ المراهق: عدم تقبل إخفاء أي معلومة عنه بحجة إنها معلومة صعب عليه فهمها...
- المراهق محتاج إيه: محتاج يعرف كل التفاصيل المتعلقة بقصته من أول يوم ولادته، وكمان محتاج دعمكم عشان يقدر يتعامل مع المعلومات الجديدة الصعبة
3- الاختلاف "هو أنا مختلف لأي درجة عن اللي حواليا؟"
- ايه اللي بيدور في دماغ المراهق: احساس بالاختلاف عن أقرانه، احساس بإن أسرته غريبة أو مختلفة
- المراهق محتاج إيه: المراهق محتاج لاعتراف منكم باختلافه وفي نفس الوقت محتاج لحوار مفتوح وداعم، ومحتاج تساعدوه يتعرف على أشخاص مكفولين في سنه.
4- الاستدامة "هل ممكن أخسر أسرتي الكافلة زي ما خسرت أسرتي من النسب؟"
- إيه اللي بيدور في دماغ المراهق: قلق وخوف إن علاقته بأسرته الكافلة متستمرش، والقلق دا بيبدأ يظهر لما ينفصل عن أسرته بسبب سفر للدراسة أو غيره.
- المراهق محتاج ايه: محتاج منك كوالد كافل إنك تأكد عليه دايمًا إنك موجود علشانه وعمرك ما هتتخلى عنه، تواصل معاه بعد سفره، وخليك دايمًا على اتصال بيه وقوله إنك منتظر رجوعه بفارغ الصبر.
5- الهوية "أنا مين؟"
- ايه اللي بيدور في دماغ المراهق: انا شبه مين، يا ترى أنا بشبه أسرتي الكافلة ولا أسرتي من النسب أكتر.
- المراهق محتاج ايه: محتاج يعرف كل التفاصيل عن أسرة النسب عشان يقدر يرسم ليهم صورة في خياله، ومحتاج تكلموه عن الحاجات المشتركة بينكم والحاجات اللي بيشبهكم فيها..
6- الولاء "هل أسرتي الكافلة هتضايق لو عرفت إني بفكر في أسرتي من النسب؟"
- ايه بيدور في دماغ المراهق: احساس بالذنب تجاه أسرته الكافلة لو فكر بأسرته من النسب
- المراهق محتاج إيه: محتاج يسمع منكم إن مفيش مشكلة لو حابب يتكلم عن أسرته من النسب أو يسأل عن أي حاجة بخصوصها وإن فضوله دا شيء طبيعي ويحترم، وإنكم مش هتزعلوا أبدًا لو حس بأي حنين لأسرته من النسب..
