أسر كتير بسبب الروتين اليومي والمسؤوليات الكتيرة على مدار يومها بتحس إنها مش قادرة تستمتع بحياتها الأسرية، ونفسها لو الحياة تبطأ شوية عشان تلاقي وقت تتواصل فيه مع أولادها وتقضي معاهم أوقات تكسر التوتر وتحسن مزاجها ومزاج أولادها، وتحسس أطفالها بالرضا عن نفسهم وتحسسهم بالثقة وبكفاءتهم كوالدين
هنا في كفالة بنقدملكم 10 طرق للسعادة الفورية، الطرق دي مش هتحتاج منكم وقت كبير ولا تخطيط مسبق ولا حتى مصاريف كتير، لكنها قادرة على تغيير حياتكم بصورة كبيرة، الطرق دي هتنفع مع أولادكم البيولوجيين والمكفولين
1- وقت الأحضان:
استغلوا يوم الجمعة أو يوم أجازتكم وخلوا أطفالكم ينضموا ليكم على سريركم الصبح لمدة ربع ساعة، في الغالب كل يوم في الأسبوع بتبقوا مستعجلين لما تصحوا الصبح عشان الكل يجهز لحضانته أو لمدرسته أو لشغله، لكنكم ممكن تستغلوا يوم الأجازة عشان تقضوا وقت مع بعض وتقربوا من بعض من غير ما يكون في حد مستعجل على حاجة.
2- الموسيقى والألعاب:
لو أسرتكم من النوع اللي بيهتم بالموسيقى، ممكن تستخدموها كوسيلة لتهدئة أعصابكم أو لتحفيز العواطف بينكم في البيت، أو لو عندكم أطفال مراهقين اكتشفوا ايه ألعابهم المفضلة والعبوها معاهم، وهتتفاجئوا من جو الضحك الجميل اللي هيملى بيتكم.
3- المجاملات غير المباشرة:
لو حابب تمدح طفلك خليه يسمعك وإنت بتتكلم عنه بشكل جميل مع شخص تاني، أحيانًا الأطفال بيتجاهلوا المدح المباشر بسبب شعورهم بالإحراج، لما طفلك يسمعك وإنت بتمدحه قدام شخص تاني، دا هيكون دافع قوي ليه لزيادة ثقته في نفسه وتقدير ذاته لأنه عارف إن مدحك ليه من قلبك.
4- اللعب الممتدة:
خصص عشر دقايق في معاد ثابت في كل يوم تلعب فيهم مع طفلك لعبة ممتدة تكملوها تاني يوم، زي ألعاب البازل الـ 1000 قطعة، أو ألعاب الطاولة، أو قراءة جزء معين من قصة أو كتاب، الألعاب القصيرة الروتينية هتساعدكم انتم وأطفالكم على الهدوء والتواصل.
5- بالدور:
خصص لكل طفل من أطفالك ساعة محددة كل أسبوع، تكون خاصة بيه لوحده تعملوا فيها سوا أي حاجة هو عايزها، بالطريقة دي هتعلم أطفالك المشاركة واحترام الوقت الخاص بكل واحد منهم لأنهم عارفين إن كل واحد منهم ليه دوره اللي هيجذب فيه كل اهتمامك ووقتك.
6- تعداد النعم:
اطلب من أطفالك كل يوم على العشا إن كل واحد منهم يقول إيه أحلى الحاجات اللي حصلت في يومه، وشاركهم إنت في تعداد النعم اللي ممكن يكونوا مش واخدين بالهم منها، تعداد النعم وتذكرها طريقة جميلة جدًا لإنهاء يومكم بطريقة إيجابية.
7- الاحتفالات:
متنتظروش الأعياد عشان تحتفلوا، أي سبب للاحتفال حتى لو كان بسيط هيفرق جدًا في الجو الأسري العام، وهيرفع من روحكم المعنوية وهيفك الجو الروتيني، احتفلوا بأعياد الميلاد وبنجاح أطفالكم وبدرجاته الكويسة، احتفلوا بأول جون جابه ابنكم وبأول رقم قياسي ليه في السباحة، احتفلوا بيه لما يحفظ سورة من القرءان أو حديث نبوي، متكلفوش الاحتفالات بشكل مبالغ فيه، يكفي كيكة معمولة في البيت وجو احتفال بسيط وسهرة جميلة تسهروها سوا.
8- حفلة نهاية الأسبوع:
غالبًا في نهاية الأسبوع التلاجة بتبقى فاضية مفيهاش غير بواقي أكل، وكدا كدا هتنضفوا الشقة تاني يوم، اقترح على أطفالك تعملوا حفلة عشا مشتركة يعزموا فيها أصحابهم وأولاد الجيران وكل واحد منهم يجيب بواقي الأكل اللي عندهم في التلاجة، التجمع الاحتفالي البسيط دا هيسعد أطفالك جدًا وهيزيد من البهجة في بيتكم.
9- ليلة بدون تكنولوجيا:
حدد لأطفالك ليلة من كل أسبوع محدش يشغل فيها التلفزيون أو يستخدم أجهزة الكمبيوتر، بحيث يكون عندكم وقت كافي في الليلة دي تلعبوا مع بعض ألعاب تفاعلية حقيقية زي ألعاب زمان، زي التمثيل أو إلقاء النكت، أو العزف أو الغنا أو حتى مجرد الكلام.
10- التأمل في الكون:
شارك طفلك بعض اللحظات في تأمل النجوم بليل قبل ما ينام، أو الفت انتباهه لاختلاف أشكال الشجر ولألوان الورود وريحتها وانتم في طريقكم للبيت او للمدرسة، الممارسات الصغيرة دي مش بس هتساعد طفلك على الاسترخاء والهدوء، لأ كمان هتساعده يفهم إنه جزء صغير من عالم كبير وإنه مش مركز الكون، ودا بدوره هيقلل شعوره بالقلق وهيزيد شعوره بالأمان.
