أحد شروط الكفالة اللي وضعتها وزارة التضامن الاجتماعي هو "أن تلتزم الأسرة البديلة بتيسير مهمة ممثلي وزارة التضامن الاجتماعي في الإشراف والزيارات الميدانية للأسرة البديلة والطفل ومتابعته بطريقة لا تخل بمبدأ السرية والمهنية"
ناس كتير من المقلبين على الكفالة بتسأل الشرط دا معناه إيه؟، هل معناه إن كل شوية حد هيجيلي في بيتي يزعجني، أو إني مش هعرف أعيش حياتي بحرية مع طفلي؟
لأ يا جماعة الموضوع مش كدا خالص، الإشراف بيكون عن طريق زيارة منزلية بتتم كل 3 شهور أو على حسب ما بتحدد موظفة الشئون الاجتماعية، وطبعا موعد الزيارة بيتحدد قبلها عن طريق اتصال تليفوني يبلغوكم فيه بالمعاد.
الزيارة يا جماعة مش رخامة ولا ازعاج خالص، بالعكس دي متابعة عشان مصلحة الطفل، لأن في نوعية من الناس مش بتكون أمينة على الطفل أو بتكفل الطفل ونواياها مش طيبة، كمان في ناس بتواجهها بعض المشاكل بعد الكفالة وبيكونوا محتاجين لدعم أو يسألوا عن حاجة.
المتابعة دي من باب التأكد إن الأمور مستقرة تماًمًا ومفيش أي مشاكل بتقابلكم، المتابعة في البداية بتبقى بشكل منتظم تمامًا، وممكن تقل أو تحصل على فترات متباعدة فيما بعد لو موظفة الشئون بقى متطمنة ليكم ومتطمنة على الطفل معاكم.
ومتقلقوش خالص الموظفات بيكونوا في غاية الذوق وبيحاولوا قدر الإمكان ميكونوش متطفلين عليكم أو على حياتكم، عشان كدا ضروري انتو كمان ترحبوا بيهم وتحطوا في اعتباركم إنهم بيعملوا اللي في مصلحة طفلكم، وبيتأكدوا إنه عايش بأمان في بيتكم وفي حضنكم
