أحيانًا هتحتاج تتكلم مع أطفال تانيين غير طفلك المكفول عن الكفالة، ودا غالبًا بيحصل لما طفلك بيحكي للأطفال عن حقيقة كفالته ويبدأوا في توجيه الأسئلة لطفلك، قبل ما تندفع في شرح الكفالة وإجابة أسئلتهم، اتكلم مع طفلك المكفول الأول واسأله حابب يقول ايه لأصحابه.
يعني مثلًا لو حد سأل عن سبب كفالته، هل مناسب لطفلك إنك تجاوب بإن أحيانًا الآباء والامهات من النسب مبيكنش عندهم قدرة على رعاية أطفالهم، ومحتاجين لحد تاني يرعى طفلهم، اسأل طفلك هل الإجابة دي مريحة بالنسبة ليه ولا لأ، لو طفلك قالك إنه مش عارف وعايزك تجاوب زب ما انت عايز، فحاول تقدم شرح عام ومبسط وتتجنب أي تفاصيل شخصية خاصة بقصة كفالة طفالك.
إزاي تكلم طفلك من النسب عن الكفالة لو هتكفل طفل؟
لو هتكفل طفل وكان عندك أطفال من نسبك، فأطفالك محتاجين يفهموا معنى الكفالة بطريقة مناسبة لسنهم، كمان متفترضش إن أطفالك عارفين دافعك للكفالة، قولهم دوافعك وأسبابك.
خلي بالك من المعلومات اللي هتقولها لأطفالك من النسب عن طفلك المكفول، لو كان طفلك اتعرض قبل كفالته لأي نوع من أنواع الإساءة أو الاعتداء أو العنف، فدي معلومة أطفالك مش في حاجة ليها، حط في اعتبارك إن لما الأخوات بيختلفوا مع بعض كل واحد بيستخدم السلاح الي في إيده بغض النظر عن مدى الحب اللي بينهم، وممكن أطفالك يستخدموا المعلومات اللي عندهم عشان يضايقوا أخوهم المكفول، عشان كدا متقدملهمش أي سلاح يقدروا يستخدموه ضد أخوهم المكفول في أي موقف.
إزاي تكلم طفلك المكفول عن الكفالة لو هتكفل طفل تاني؟
لو قررت تكفل طفل للمرة التانية، أكيد الطفل الأول هيبقى عايز يعرف إيه سبب رغبتك في كفالة طفل تاني، وممكن يتساءل في نفسه إذا كان غير كافي بالنسبالك وعشان كدا إنت بتدور على طفل أفضل منه؟، عشان كدا ضروري تأكد على طفلك الأول إنك بتحبه جدًا لكن لسه في مكان في قلبك لطفل تاني..
وقبل ما يوصل طفلك التاني، كلم طفلك الاول عن يوم وصوله البيت وإزاي انت وشريك حياتك كنتوا متحمسين وفرحانين بوصوله، حط في اعتبارك إن طبيعي يكون في غيرة مع وصول طفل جديد للبيت، عشان كدا حاول تخصص وقت لطفلك الأول لوحده بعد وصول طفلك التاني للبيت.
