واحدة من أشهر التحديات اللي بتواجه الأسر الكافلة هي التعليقات والأسئلة المحرجة المتعلقة بالكفالة من المحيطين بيهم، عشان كدا لو تعرف أسرة كافلة في محيطك سواء كان قريب أو صديق فانت محتاج تتعرف على 9 تعليقات مينفعش تتقال للأسر الكافلة:
- زعلان بجد إنك مقدرتش تخلف ابن من نسبك
تعليق زي دا بيقلل من قيمة العلاقة بين الأسرة الكافلة وطفلها، وعلاقتهم بطفلهم من الكفالة متقلش شيء عن علاقتك بطفلك من النسب، وكمان عدم القدرة على الإنجاب مش هي الدافع الوحيد لكفالة الأطفال..
- أنا سمعت قصص كتير قبل كدا مخيفة بخصوص الأطفال المكفولين
تعليق مش لطيف، بالرغم إن في أطفال مرت بتجارب سيئة قبل الكفالة، وواجهوا صعوبة في التكيف مع أسرهم الجديدة بعد الكفالة، بس دا مش شرط ولا قاعدة عامة، وكل أسرة عندها القدرة على التعامل مع قصة كفالتها، ومعالجة مشاكلها وتحدياتها، وتعليق حساس زي دا بيزود التحديات والصعوبات عليهم..
- كفالة طفلك كلفتك كام؟
بغض النطر عن طريقة دخول الطفل الأسرة سواء كان بولادة أو بكفالة، فالوالدين مش بيحسبوها ماديًا أبدًا، وعمرهم ما بيفكروا في التكلفة، ولا بيحبوا حد يبص لأولادهم من منظور "هو كلفهم كام؟".
- تفتكر ليه أهله الحقيقين اتخلوا عنه؟
أولاً الأسرة الكافلة هما أهل الطفل الحقيقيين ومينفعش تعلقوا بأي تعليق يوحي إنهم مش أهل الطفل الحقيقيين، ثانيًا أسباب تخلي الأهل من النسب عن طفلهم كتيرة، ومعقدة، ويفضل عدم الكلام في الجزئية دي إلا لو أهل الطفل هما اللي اتكلموا فيها، ودا غالبًا مش هيحصل.
- هل بتحب ابنك من النسب (البيولوجي) أكتر من ابنك المكفول؟
النقطة دي بتكون من أكبر مخاوف الوالدين اللي عندهم أطفال من النسب وأطفال مكفولين خصوصًا في البداية، بس في النهاية بيكتشفوا إن مفيش أي اختلاف في حبهم لأولادهم سواء كانوا مكفولين أو من نسبهم، فانتوا متحطوهمش في زاوية ضيقة بسؤالكم.
- انت طيب أوي إنك فكرت تكفل طفل/ طفلك محظوظ جدًا
الحقيقة إن الأسرة الكافلة بتحس بالسعادة والامتنان لكفالة طفلهم أكتر ألف مرة من الطفل المكفول، وبيحسوا بإن طفلهم معجزة ربنا ليهم، وإنهم اللي مديونين للطفل مش هوا اللي مديون ليهم.
- انت شكلك كأنك أبوه/أمه الحقيقي، الطفل فعلًا شبهك أوي كأنه ابنك الحقيقي
الأسرة الكافلة هما الأب والأم الحقيقين، ومينفعش تعلقوا بأي تعليق يوحي إنهم مش أهل الطفل الحقيقين، كلمة زي دي مفجعة بالنسبالهم إنهم يسمعوها كل شوية، ولو فعلًا في شبه بينهم وبين طفلهم، فـ مش الشبه هو اللي هيخليهم الأبوين الحقيقين، اللي هيخليهم أبوين حقيقيين هو إنهم فعلًا الأبوين الحقيقيين.
- هو انت ناوي امتى تقوله على حقيقة إنه طفل مكفول؟
أولاً دي مشكلة صعبة على الأبوين الكافلين وبتبقى مصدر ضغط عليهم، وبتحتاج منهم وقت ومجهود، وبتختلف باختلاف عمر الطفل وقت كفالته، ثانيًا: النقطة دي بتكون شخصية جدًا وخاصة بكل أسرة
- انت جايبه من سوبر ماركت السود/ التخان/ القصيرين؟
حتى لو قصدك هزار، دي مش نقطة أبدًا للهزار، دا تنمر واستهزاء واضح وصريح.
في النهاية أحيانًا بيكون الكلام مش مقصود بيه مضايقة أو تعليق سخيف، بس يا جماعة مجرد التعليق بيحسس الأسر الكافة إنها مختلفة، وهما عايزين يحسوا بس إنهم طبيعين زيهم زي أي أسرة رزقت بأولاد عن طريق حمل وولادة.
