مفيش والد كافل إلا وكان شغله الشاغل "إزاي هعرف ابني إنه مكفول؟" "إزاي أقدر أقوله إنه مش ابني من النسب بطريقة إيجابية متأثرش على علاقنا ببعض؟" "إزاي هفهمه إن بالرغم من الكفالة فهو ابني تماما؟" "طب امتى أبدأ أتكلم معاه عن كفالته؟"
أسئلة كتير بتدور في بال كل والد كافل، وعشان احنا في "كفالة" بنشجع الأسر الكافلة على الصراحة والصدق مع طفلها المكفول، عشان كدا بنقدملكم 5 نصايح هتساعدكم تقولوا لطفلكم حقيقة كفالته بطريقة إيجابية وصحية تمامًا.
1- إبدأ من اللحظة الأولى لدخوله بيتك:
أهم شيء في معرفة الطفل عن كفالته إنها تكون في أصغر سن ممكن وإنها متكنش سر هيعرفه في وقت معين، كلموه عن كفالته بكلام يناسب سنه من لحظة وصوله، متترددوش تكلموه عن الكفالة، حتى لو صغير ومش هيفهم دلوقتي، هيفتكر كلامكم وهيفهم بعدين، لازم تكون دي هويته اللي هيكبر عليها، مش خبر هيعرفه في وقت معين، وعمومًا كل ما اتأخرت في إنك تعرف الطفل، كل ما كان أصعب عليك إنك تقوله.
2- كلامك يناسب سنه:
كل مرحلة من مراحل الطفل ليها كلامها اللي يتناسب مع إدراك الطفل، وضروري جدًا إنك مع كل مرحلة تتكلم مع طفلك عن كفالته، فمثلًا لو طفل لسه صغير معداش ال 3 سنين مش هتروح تحكيله عن كل تفاصيل كفالته والمكان اللي جبتوه منه وإزاي قابلتكم صعوبات لحد ما كفلتوه، الكلام دا ممكن يتقال في مرحلة أكبر يكون الطفل فيها واعي وفاهم، إنما يكفي جدًا مع الطفل الصغير إنك تقوله مثلًا إن مامتك اللي ولدتك توفت إذا كان يتيم أو مقدرتش تهتم بيك إذا كان معثور عليه عشان كدا احنا حبينا نهتم بيك احنا ونكون ليك ماما وبابا..
3- سعة الصدر والأمانة:
ضروري جدًا يكون عندك سعة صدر كبيرة تسمحلك بالإجابة عن كل أسئلة طفلك عن أبوه وأمه من النسب، كمان بجانب سعة الصدر لازم تكون إجابتك صادقة تمامًا وبمنتهى الأمانة، متخبيش عنه حاجة بحجة إنك بتحميه، متضايقش لما يسألك عن أسرته من النسب، دا مش معناه خالص إنكم مقصرين، دا فضول طبيعي عند الطفل مينفعش تتجاهله، ابذلوا أقصى جهدكم وجاوبوا على أسئلته بأمانة وبطريقة تناسب عمره، واعرفوا إن الأسرار هيكون ليها نتايج عكسية لو عرفها متأخر..
4- أنا ممتن لوجودك في حياتي:
ضروري جدًا إن الطفل يسمع منك إنك بتحبه جدًا وفخور بتجربة كفالته ومندمتش عليها لحظة، وبكدا هتساعد طفلك على مواجهة أي كلام سلبي ممكن يسمعه من برا سواء في المدرسة أو الشارع، وهيزيد من علاقة الحب اللي بينكم..
5- مش مرة وخلاص:
كتير بيسألوا "إمتى أقول لطفلي إنه مكفول؟" ... الإجابة دايما يا جماعة، ومش المقصود إني كل شوية أفكره، لأ المقصود إن الموضوع ميكنش مرة واحدة ونقفل الموضوع على كدا، لأ دي هوية كاملة لطفل لازم يكبر عليها، حوار دايم بينا وبين الطفل طول حياته، اسمحولهم يسألوا أسئلتهم في أي وقت وجاوبوهم، خليكم منفتحين ومستعدين تشبعوا فضولهم...
دي بعض النصايح اللي ممكن تساعدكم في بناء هوية طفلكم المكفول بطريقة إيجابية وصحية تساعده على تقبل الأمر تمامًا والتعامل معاه بطبيعية، واعرفوا دايمًا إن الكفالة مش سر، دي حاجة تفخروا بيها انتوا وطفلكم..
