١٠ إجراءات لازم تعملهم عشان تكفل طفل
بعد ما عرفت شروط الكفالة بنقدملك هنا الإجراءات العشرة اللي هتمر بيها من لحظة التقديم على الكفالة لحد ما تستلم طفلك :
١- إجراء التقديم:
هتقدم عن طريق الموقع الإلكتروني للوزارة ، هتملى الطلب بكل البيانات المطلوبة وهتستنى حد يتصل بيك من الشؤون الإجتماعية التابعة لمنطقتك في خلال أسبوعين من تقديم الطلب. ويفضل لو حد متصلش بيك في خلال أسبوعين إنك تتوجه لأقرب مكتب شئون اجتماعية في منطقتك للمتابعة.
٢- إجراء تجهيز الأوراق:
بعد ما يتواصل معاك حد من الشئون الإجتماعية هاتفياً بيطلب منك تحضر أوراق محددة و تقدمها في مكتب الشئون التابع لمنطقتك والأوراق دي كالآتي:
- صورة بطاقة الرقم القومي للزوج والزوجة .
- صورة عقد الزوج (في حال أسرة مكونة من زوج وزوجة).
- صورة قسيمة الطلاق (في حال التقدم من سيدة مطلقة).
- شهادة وفاة الزوج (في حال التقدم من قبل سيدة أرملة).
- صحيفة الحالة الجنائية للزوج والزوجة.
- صورة المؤهل الدراسي.
- شهادة صحية حديثة تثبت خلو مقدمي الطلب من فيروس C.B .
- كافة المستندات المطلوبة للتأكد من صحة البيانات الواردة بالطلب مثل ( شهادات ميلاد الابناء المميكنة "إن وجد" بيان بالممتلكات ، مفردات المرتب أو المعاش ومصادر الدخل الاخرى، بيان بالمسكن (فاتورة كهرباء أو صورة ملكية/ عقد الإيجار ، صورة بطاقة الرقم القومي للضامنين)
٣- إجراء الزيارة المنزلية:
بيزوركم في البيت موظفات تابعين لوزارة التضامن الإجتماعي علشان يتعرفوا عليكم بشكل أكبر وكمان يقيموا المكان اللي الطفل المفروض هيعيش فيه ، كمان بيتأكدوا من صحة الأوراق المقدمة، من خلال حوار لطيف و بسيط بيستفسروا منك ومن شريك حياتك عن معلومات عامة عنكم وعن سبب الكفالة وعن تصوركم لحياتكم فيما بعد بعد وصول طفلكم . الهدف من الزيارة ديه معرفة معلومات مهمة بتصب كلها في مصلحة الطفل.
٤- إجراء البحث الاجتماعي:
بعد الزيارة المنزلية والتأكد من صحة الأوراق المقدمة و الإستفسار عن بعض التفاصيل بيقوم الموظفين بعمل تقرير البحث الاجتماعي اللي بيتقدم مع جميع الأواق للجنة .
٥- إجراء اللجنة:
بيتم عرض طلبكم على اللجنة وعرض جميع أوراقكم وتقرير البحث الاجتماعي، بعد كدا بتاخد اللجنة قرارها ولو كان قرار بالموافقة بيصدر جواب المشاهدة
في حالة أحد الزوجين غير مصري يجب أخذ الموافقة الأمنية بعد موافقة اللجنة العليا.
٦- إجراء جواب المشاهدة:
بعد إبلاغكم بالموافقة بيتم إبلاغكم لإستلام جواب المشاهدة الخاص بيك وهو كتاب رسمي من الوزاره تقدر من خلاله تروح تختار طفلك من دار الرعاية .
٧- إجراء اختيار الطفل:
بتاخد جواب المشاهدة وتطلع بيه على دار الرعاية عشان تقدر تختار طفلك على حسب الجنس والسن اللي انت محدده، وفي حالة لو مكنش فيه طفل مناسب ليك بتقدر تنتظر أو تكمل بحث لحد ما تلاقي طفلك بالكفالة.
الفتره المسموح فيها للبحث وإتخاذ القرار ١٢ شهر من تاريخ موافقه اللجنه.
٨- إجراء العقد:
بعد اختياركم للطفل بيتطلب منكم تفتحوا حساب باسم الطفل في البريد أو في بنك ناصر و يتم إيداع كحد أدنى مبلغ ٣٠٠٠ جنيه مصري وبعدها بيتم توقيع عقد بينكم وبين مديرية التضامن الاجتماعي في وجود ٢ ضامنين للتوقيع كشهود على العقد القائم بين الأسرة البديلة وإدارة الأسرة والطفولة بمديرية الشئون الاجتماعية، وبعد كدا بتقدروا تستلموا الطفل وبتاخدوا كل الأوراق الخاصة بيه من دار الرعاية أو من الشئون الاجتماعية.
٩- إجراء استلام الطفل:
بعد ما إخترت طفلك يفضل إنك تقضي معاه فترة كافية في الدار من خلال زيارته على الأقل ٦ مرات وده هدفه إنك تتعرف بشكل أعمق على روتين حياته من كل النواحي وتتفهم شخصيته وطباعه بشكل أكبر.
١٠ - إجراء مدى الحياة ( إعمل إسرة سعيدة)
مشاركة المسئولية هو أهم وأطول إجراء . هو إجراء يومي لمدى الحياة.
“كفالة” بتقولك مبروك وبنكون سعداء جدا إذا شاركتنا لحظه إحتفالك . إحنا فخورين بيكم لأنكم بتعملوا عمل نبيل هيؤثر بشكل حقيقي وجذري على مستقبل طفل . إحتفلوا بطفلكم وإستمتعوا معاه بكل مراحل حياته .
كفالة هتدعمك في كل مرحله من مراحل الكفالة و هتساعدك إزاي تقدر تتعامل سواء مع الطفل او أسرتك أو المجتمع
في النهاية لازم تعرف إن الإجراءات حاليًا وبعد تطبيق النظام الجديد للأسر الكافلة مش هتاخد وقت طويل هتبقى في حدود من شهرين لـ ٤ شهور في حالة استيفاءكم للشروط
إحتمال إن طلبكم يترفض لأسباب تتعلق بعدم إستيفاء الشروط . في الحالة دي تقدروا تقدموا تظلم أمام اللجنة العليا للأسر البديلة خلال 30 يوم من تاريخ إبلاغكم بالقرار، وبيتم البت فيه خلال .ستين يوم عمل من تاريخ تقديم الطلب ويكون قرار اللجنة نهائيا
