تعمل إيه قبل و خلال وبعد الزيارة
٥ نصايح قبل الزيارة
٧ أسئلة خلال الزيارة
٥ نصايح بعد الزيارة
أسر كتير قدمت على الكفالة وفي إنتظار حد يكلمها عشان يبلغها بموعد الزيارة المنزلية، وأسر بالفعل قدمت وكلموها بلغهوها بموعد الزيارة المنزلية، والاتنين بيسألوا إزاي نستعد لزيارة البحث المنزلي؟
إيه هيا زيارة البحث المنزلي ؟
زيارة البحث المنزلي هي جزء من البحث الميداني اللي بتقوم بيه أخصائية الشئون الاجتماعية عشان تتأكد من صحة المعلومات والأوراق اللي قدمتها ، وده عن طريق زيارة للبيت وعمل مقابلة بسيطة مع الأسرة المقبلة على الكفالة.
قبل الزيارة :
٥ نصايح مهمه
١- مفيش اي داعي للقلق . المقابلة هتكون سلسة و لطيفه جدا بهدوئك وبإسلوبك المحترم.
٢- جهز البيت لإستقبال أخصائيات البحث الإجتماعي كأن جايلك ضيف مهم.
٣- خلي البيت مكان آمن للأطفال زي إنك تغطي الفيش بتاعت الكهربا . تشيل أي أدوات حاده أو مواد كيمائية أو منظفات من متناول الأطفال.
٤- اذا فيه غرفه للطفل حاول إنها تكون شبه جاهزه و مرتبه ولو لسه مش جاهزه توضح خطتك في تنظيم شكل الغرفه وتخطيطك للمستقبل في حال الحصول على موافقه الكفالة. متقلقوش أبداً لو البيت مساحته مش كبيره او الاثاث مش جديد . طفلكم محتاج لحبكم ومحتاج لمكان صحي يكبر فيه وسط مشاعر حقيقية و دفا البيت وأسرته.
٥ - إشرح بشكل واضح جدا العنوان لأخصائية البحث الإجتماعي بحيث الوصول للبيت يكون تجربه سهله.
خلال الزيارة:
الذوق و الكرم والترحاب ده إنطباع أولي جميل أكيد هيترك أثر طيب في نفس أي حد . خليك طبيعي في كل تصرفاتك ومتكنش مصطنع . إنتوا أسرة عندكم نية طيبة ومهم جدا توضحوا نيتكم ديه بشكل سليم.
٧ أسئلة ممكن تتسألوها خلال الزيارة
١- عاوزين تكفلوا ليه ؟
٢- ممكن نشوف البيت ؟
٣- كانت فكره مين في الأول ؟
٤- عاوزين نعرف معلومات عامه عنكم . إتجوزتوا امتا ؟ بتشتغلوا إيه ؟
٥- ممكن نراجع مع بعض كل الاوراق اللي قدمتوها ؟
٦- هل مكان سكنكم الحالي هو المكان اللي هتستقبلوا فيه الطفل ؟
٧- هل فيه نية للسفر ؟
بعد الزيارة :
٥ نصايح مهمة
١- متقلقوش من الزيارة أبدًا
٢- متتصلش بموظفة الشئون بشكل مستمر إلا إذا كان في مشكلة أو موضوع معين للمناقشة.
٣- متتصلش بالموظفة في أيام الأجازات، الناس كلها في الأجازات مبتبقاش مستعدة لاستقبال تليفونات.
٤- الإجراءات بتاخد شويه وقت الموضوع محتاج منك شوية صبر
٥- تفائلوا خيراً تجدوه
