لو بتفكر تكفل طفل، يبقى إنت محتاج تفكر كويس جدا قبل إتخاذ القرار ده وتاخد وقتك وتسأل نفسك ال ٩ أسئلة دول قبل ما تاخد القرار .
إجابه الأسئلة ديه هتخليك واعي أكتر هل الكفالة مناسبة ليك ولا لأ
١- أنا هكفل طفل ليه؟
ضروري جداً قبل ما تكفل طفل تبقى عارف انت بتكفله ليه
إسأل نفسك هل كفالة الطفل اختيارك الأول ولا هي طريقتك الوحيدة عشان يكون عندك طفل؟
هل بتكفله عشان تحقق بيه حلم الأبوة أو الأمومة ولا بتكفله من باب عمل الخير؟
هل المهم بالنسبالك إنك تكوني أم أو إنك تكون أب بصرف النظر عن الطريقة؟
إيه هو السبب الحقيقي اللي علشانه عاوز تكفل طفل ؟
الإجابه الواضحه والصريحة هتخليك واعي جدا بأسبابك
قصة واقعية حزينه :
زورج و زوجة لمده سنين حاولوا الإنجاب ولكن يشاء الله إن ميحصلش إي حمل
الزوجه عرفت عن موضوع الكفالة وقرروا الإتنين إنهم يكفلوا طفل . وفعلا كفلوا طفل و عاش معاهم لمده سنتين .
يشاء الله إن الأم تحمل وتتم الولادة بكل خير .
ولكن للأسف الشديد بعد ولادة المولود الإتنين قرروا يرجعوا الطفل لدار الرعاية بعد ما إتعلق بيهم سنتين .
المشاكل النفسيه والعاطفيه والتحديات اللي هيمر بيها الطفل ده كبيره جدا وهتأثر على حياته بشكل سلبي جداً.
قرار الكفالة قرار مصيري ولازم يكون قرار مسئول .
٢- هل هتقدر تعتني بالطفل؟
اسأل نفسك وجاوب بكل أمانه
هل عندك القدرة المالية على العناية بالطفل، هل عندك القدرة على دعمه عاطفيًا و نفسياً و جسدياً؟
هل هتقدر توفرله حياة كريمة وتعليم جيد؟
هل عندك الوقت الكافي والقدرة الكافية على رعايته ؟
هل هتبقا فعلا أب وأم جيدين للطفل ده ؟
٣- هل عندك إستعداد تكمل الرحلة بحلوها ومرها ؟
كل رحلة أمومة أو أبوة فيها الحلو و المر ، فيها السهل والصعب ، فيها الفرحة وفيها الحزن .
هيا رحلة واقعية مش مثالية. هل عندك القدرة تكمل الرحلة دي بحلوها ومرها وبدون ندم في يوم الأيام ؟
هل عندك القدرة على التضحية و إعطاء الإهتمام والرعاية المطلوبة لطفلك ؟
٤- هل أنا مستوفي الشروط؟
ضروي قبل ما تقدم على الكفالة وتحط عليها آمال كبيرة تتأكد أولاً إنك مستوفي الشروط الخاصة بالكفالة في بلدك
٥- هل عندي استعداد أشارك فكرة الكفالة مع أهلي؟
اسأل نفسك هل الناس القريبه منك هتدعمك ؟
أسرتك . عيلتك . أصدقائك . الناس اللي حوليك
إجابه السؤال ده هتخليك تعرف حجم التحديات اللي ممكن تواجهها
٦- انا عاوز أكفل طفل عنده كام سنه ؟
السؤال ده مهم جدا وتبعاته كتير
إسأل نفسك هل عايز تربي طفل رضيع ؟ ولا طفل أكبر ؟ ولا مراهق ؟
كل إنسان له ظروفه ووضعه اللي يخليه يفضل سن معين مناسب
بس الأكيد إن القرار ده مهم جدا ولازم تبقا عارف إجابه السؤال ده كويس جدا
٧- هل هحس إنه ابني حتى لو مش من صلبي أو شبهي ؟
ضروري تسأل نفسك هل عندك إستعداد تحب طفل وهو مش من صلبك ؟
هل عندك إستعداد تواجه التحديات المرتبطه بالقرار ده ؟
هل عندك استعداد تتكلم وتتناقش عن الموضوع ده ؟
٨- هل هقدر أحكي للطفل حكاية كفالته ؟
إسأل نفسك هل عندك المقدره إنك تعرف طفلك إنه إبنك بالكفالة ؟
هل عندك استعداد تجاوبه عن أسئلته و إستفساراته في المستقبل بخصوص الموضوع ده ؟
“كفالة” معاك وبتدعمك
لأهمية الموضوع إحنا عملنا سلسلة متكامله عن إيه افضل الطرق اللي تقول بيها لطفلك قصته ومعاها سلسله مرئية و خطوات عملية هتساعدك إنك توصل المعلومه بشكل سليم في توقيت سليم بشكل ميسببش أي مشاكل في المستقبل
قصة واقعية حزينه :
أم كفلت طفل و هو رضيع و مقالتش للطفل ده أي معلومه .
بعد سنوات كتيره الطفل بقا مراهق والزوج توفى .
بعد مراسيم العزاء (خاله - أخو أمه) قاله عاوز اشوفك اتكلم معاك .
وفعلا جلس معاه و بكل برود طلب منه أنه يشوف مكان تاني لأنه مش هينفع خلاص يقعد مع الأم لأسباب كتير .
المراهق مكنش فاهم ومش مستوعب .
لحد ما (خاله) بلغه إن أمه مش أمه . وإنه مكفول من دار أيتام .
صدمة المراهق كانت كبيرة جدا وطبيعي أثرت على كل حياته بشكل سلبي
معرفة الطفل بقصته من وهو صغير أفضل حل ممكن تعمله
٩- هل شريك حياتك مع الفكرة ولا ضدها
هل شريك حياتك مشجع للفكرة ؟
هل شريك حياته عنده إستعداد للقرار المصيري ده وتحدياته ؟
هل عنده أفكار مغلوطه عن الموضوع ؟
هل محتاج يعرف معلومات أكتر علشان يقدر يقرر بشكل سليم ؟
١٠- هل إستخرت قبل القرار ده ؟
الإستخاره هيا عمل روحي . الدعاء بالتوفيق و السداد في إتخاذ القرار واحد من أهم الخطوات اللي ممكن تعملها
الكفالة مش قرار سهل، قرار بيغير حياتك وحياة الطفل المكفول تمامًا، قرار محتاج منك تأني وتفكير في كل الجوانب
والأسئلة ديه هدفها إنها بس تفتح مداركك و بتفتح إتجاه المفروض تفكروا فيه قبل ما تقرورا تكفلوا طفل وتوفروا له حياة كريمة
نتمنى تكون إجاباتكم إيجابية تشجعكم تاخدوا القرار وتنوروا حياتكم بطفل يحبكم وتحبوه
