رحلة الـ ٥ مراحل
لما بينزل خبر عدم القدرة على الإنجاب على الزوجين بيكون تقبل الخبر في الأول صعب جدًا،
ودا شيء طبيعي بعد كل محاولاتهم إنهم يبقوا أب وأم ويلاقوا الأبواب كلها بتتقفل .
بعد ما بيسمع الزوجين الخبر بيمر كتير منهم بخمس مراحل لحد ما يتقبلوا فكرة عدم القدرة على الإنجاب و كمان يتغلبوا عليها بشكل إيجابي و فيه منهم اللي بيوصل لقرار بديل للإنجاب زي قرار الكفالة.
المرحلة الأولى : مرحلة الإنكار
بتحصل أول ما الزوجين بيسمعوا الخبر من الدكتور المعالج ، وقتها حزنهم بيدفعهم للإنكار ولعدم التصديق إنهم مش هيبقى ليهم إبن من صلبهم في يوم من الأيام، ويفضلوا يفكروا إن اكيد فيه حل تاني ، أو أكيد في حاجة غلط .
المشاعر في المرحلة دي بيكون صعب جدًا السيطرة عليها خاصة عند الزوجه والتعامل مع الموضوع بيكون حساس جدا ولكن دعم الإتنين لبعض و الإيمان بيساعدهم على إجتياز المرحلة.
المرحلة التانية : مرحلة الغضب
للأسف مرحلة صعبة على الزوجين، بتظهر على الزوجين في صورة إستياء من نفسهم أو من شريكهم أو في صورة إحساس بالعار (و هو إحساس خاطئ) و يمكن يكون سبب في وجود مشاكل كتير بين الزوجين ملهاش داعي ،
وللأسف الشديد فيه بعضهم بيعبر عن ده بصوره إنتقاد لشريك حياتهم أو حتى بتأنيب نفسهم وده فعل خاطئ ومدمر ومش هيضيف أي شيء إيجابي للعلاقة ده كدا بيهدم مش بيبني .
طبيعي إن يكون في مشاعر غضب ، بس ضروري جدًا يكون التعبير عن المشاعر دي بصورة غير مؤذية لحد من الزوجين ،
ويكون التعامل معاها بحكمة و يكون الإحتواء والدعم و الحب و التعاطف و الإيمان بقضاء ربنا وحكمته هو الغالب على تفكيركم .
المرحلة التالتة : مرحلة المساومة
هنا بيبدأ الزوجين يتجنبوا مشاعر الإنكار والغضب و يبدأوا يبحثوا عن حلول، زي تجريب طرق علاج جديده و مختلفة، أو تغيير الدكتور إيمانا منهم بالأمل ، والدعاء المستمر لربنا لطلب الإستجابة .
المرحله ديه بتكون مرحله مهمة جدا للزوجين لإنهم فعليا إستوعبوا التحدي اللي عندهم في عدم القدرة على الإنجاب و بيحاولوا مع بعض بكل الطرق إنهم يواجهوا التحدي ده.
المرحلة الرابعة : مرحلة الحزن
ودي مرحلة طبيعية ومشاعر صحية جدًا، خصوصًا لو فشل الزوجين في مرحلة المساومة إن يحصل أي حمل ،
وبالرغم إن مشاعر الحزن دي بتأثر على نفسيتهم وأحيانًا بتأثر على الحالة الجسدية ،
إلا إنها شيء طبيعي مع الخسارة اللي إتعرضوا ليها.
أهم شيء إن مشاعر الحزن ديه متوصلش للإكتئاب ، متوصلش إنها تشِل حياتك أو تؤثر بشكل مباشر أو غير مباشر علي حياتك وعلى حياة شريك حياتك.
في بعض الاحيان بعض حالات الحزن بتحتاج تدخل ومتابعة مع طبيب نفسي . تجاهل الإكتئاب هيزوده.
المرحلة الخامسة : مرحلة التقبل والسعي للكفالة
خلينا متفقين إن التقبل والرضا من الزوجين ساعات بيكون صعب جدا،
بس التقبل ممكن تحقيقه لو الزوجين اعترفوا بمشاعرهم وإنتقلوا من مرحلة لمرحلة وقدروا يتعاملوا مع كل مرحلة صح عن طريق إقرارهم بمشاعر الحزن والسيطرة على مشاعر الغضب.
إن يكون الإتنين أو واحد منهم إيجابي و متفائل ومتقبل قضاء ربنا وعنده إيمان حقيقي ده هيخلي قرار التقبل و السعي لوجود حلول بديلة من أسهل ما يكون .
الكفالة قرار مهم جدا لكل زوج و زوجه نفسهم في طفل يكبر قدامهم و يحبهم ويحبوه.
في النهاية مش شرط إن كل زوجين مروا بتجربة عدم الإنجاب إنهم يمروا بالخمس مراحل بنفس الترتيب،
ممكن زوجين يمروا بمرحلتين بس من الخمسة ويوصلوا لمرحلة التقبل،
وفي حالات بعد ما توصل لمرحلة التقبل بترجع تمر بباقي المراحل.
الفكرة مش في ترتيب المراحل ولا عددها، الفكرة في تقبل مشاعر كل مرحلة والاعتراف بيها والتعامل معاها بشكل صحي قبل الإقبال على الكفالة، مع الوضع في الإعتبار الإختلافات الفردية اللي بتخلي التعامل مع خبر عدم الإنجاب مختلفة من شخص للتاني.
التقبل مش معناه إني أتجاوز فكرة إني أكون أم أو أب، التقبل يعني أتجاوز فكرة العلاج وأبدأ أدور على حل بديل أكون بيه أب أو أم زي الكفالة
إنك تكفل طفل في بيتك يعني تكون الأب و الأم اللي كان نفسك تكونهم من زمان وفي نفس الوقت هو من أحب الأعمال الخيرية واللي فعلا بتغير حياة بمعني الكلمة.
اليوم اللي هتكفل فيه طفل، هتحس إنك بقيت أب وأم بشكل حقيقي
