في أي رحلة كفالة هتلاقي حد من الزوجين متحمس جدًا والتاني مش بنفس درجة الحماس
حد عاوز الطفل يوصل البيت حالًا وحد عنده مخاوف ولسه مش متأكد
النهاردة هتكلم معاكم عن إزاي تقنع شريك حياتك بالكفالة؟
الطرف المتردد سواء كان الزوج او الزوجه غالبًا بيكون تردده ده نابع عن مخاوف زي” إيه مدى الخساير اللي ممكن تحصل مع الخطوة ديه ؟ “
أحد الاستشاريين الأسريين بيقول: "إن نادراً ما بيكون الزوجين على نفس الدرجة من الوفاق في نفس الوقت خصوصًا مع حدث كبير زي الكفالة وحتى في فكرة الجواز نفسها بيكون نفس الموضوع، ودا مش بالضرورة يكون تردد ولكن ممكن يكون اختلاف في تزامن التوقيت مش أكتر"
وأحيانًا بيكون التردد دا سببه إحساسهم بالإخفاق في تحقيق حلمهم في تكوين أسرة، فمثلًا كتير من الناس بيلجأوا للكفالة بعد عدم قدرتهم على إنجاب طفل من صلبهم، أو عدم قدرتهم على إيجاد شريك حياة مناسب يكونوا معاه أسرتهم اللي بيحلموا بيها، فدا بيخلي عندهم مشاعر أصلًا سلبية من قبل ما يقدموا على الكفالة أصلاً
لأن مش دي الطريقة اللي توقعوا بيها تكوين أسرة
عشان كدا قبل ما تاخدوا قرار الكفالة بشكل نهائي، إدوا شريك حياتكم فرصة، ارجعوا خطوة لورا ومتضغطوش عليه، وهو هيفاجئك لما ياخد قراره لوحده
وهنا بنقدملكم ١٠ استراتيجيات تقدروا تتبعوها أثناء محاولاتكم لاقناع شريك حياتكم بفكرة الكفالة:
١- التواصل هو المفتاح:
خلي دايمًا في تواصل بينكم، اتكلم مع شريك حياتك بخصوص الكفالة أكتر مما هو عايز يتكلم بس أقل مما انت عايز، اطلب اذنه إنك تشارك معاه أبحاثك وكل الحاجات اللي توصلتلها، حاول تفهم مخاوفه أكتر ما تحاول اقناعه، التواصل هو أول وأهم وسيلة هتقرب وجهات نظركم المختلفة .
٢- ثقف نفسك:
قبل ما تعرض الكفالة على شريك حياتك وقبل ما تدخلوا في نقاشات سوا عن إذا كانت الكفالة مناسبة ليكم أو لأ، ضروري انك تبقى عارف كويس كل حاجة عن الكفالة وعن اجراءاتها وعن شروطها وعن تحدياتها وعن قدرتكم على مواجهة التحديات دي، ادرس الكفالة وادرس وضعكم وحالتكم قبل ما تعرض فكرتك، لأن ممكن تكتشف انتا نفسك انك لسه مش مستعد للكفالة .
٣- حاول تعرف سبب تردده أو مخاوفه:
متفترضش إنك عارف سبب تردده، هو في الغالب بيفكر في الأسئلة دي :
- هل أنا كبير كفاية عشان أكون أب أو أم؟
- هل هيبقى عندي الطاقة الكافية؟
- هل هكون صابر بشكل كافي؟
- هل هقدر أوفرله تعليم كويس؟
- وهل هنقدر ناخد أجازات ونسافر براحتنا؟
- هل الطفل هياخد كل وقتي؟
- هل هحتاج أقلل عدد ساعات شغلي؟
- هل أهلي هيتقبلوا فكرة الكفالة؟
- هل هحبه بشكل حقيقي ؟
اسأل شريك حياتك عن سبب تردده واسأله لو بيفكر في حاجة من الأسئلة دي، وقدم ليه حلول منطقية بلفظ الجمع، قوله إنكم مع بعض وهتساعدوا بعض، وإن وجودكم سوا هيساعدكم تواجهوا أي تحديات هتقابلكم .
٤- استمر في الكلام:
لو شريك حياتك فضل رافض فانت موصلتش لطريق مسدود، اطلب من شريك حياتك إنك تتكلم معاه عن الكفالة مرة واحدة في الاسبوع، اتكلم فيها عن أحلامك وآمالك بخصوص الأبوة أوالأمومة بشكل عام، ولما يبدأ يتكلم اسمعه كويس بدل ما تستمر في اقناعه اديه فرصة يتكلم هو، وساعتها هتفهم بشكل حقيقي وجهة نظره وطريقه تفكيره ورؤيته للأمور .
٥- حاول تفهمه أكتر ما تقنعه:
وعشان تفهم شريك حياتك أكتر انت محتاج انت نفسك تشاركه مخاوفك عن الكفالة
بعض العلاقات بتحتاج للتوازن بين الزوجين، عشان كدا عشان تفهمه وتسمع مخاوفه قوله انت كمان مخاوفك. مشاركة المشاعر والمخاوف واحده من الخطوات المطلوبه في الوقت ده .
٦- انضم لمجتمع الكافلين:
انضمامك لمجتمع الكافلين وحتى الأشخاص المترددين زيك هيفيدك جدًا انت وشريك حياتك، اعرض على شريك حياتك ينضم للمجموعات دي، انضمام شريك حياتك لناس بتشاركه نفس مخاوفه وناس مرت بالمخاوف دي وقدرت تكفل طفل بعدها ونجحت في الكفالة هيفيد جدًا في اقناع شريك حياتك.
٧- خد استراحة من علاجات عدم القدرة على الإنجاب:
اتفق مع شريك حياتك انكم تاخدوا استراحة من العلاج لفترة محددة وممكن تكملوا بعده انتهاء الفترة دي لو عندك رغبة تكمل، قضوا وقت استمتعوا فيه بحياتكم كزوجين، وافتكروا انتوا ليه اتجوزتوا قبل أي شيء.
٨- اديه وقته:
ادي شريك حياتك الوقت والمساحة الكافية عشان ياخد قراره، كل واحد ليه أسلوبه ووقته اللي بيحتاجه عشان يتغلب على حزنه ويقدر ياخد قراره، فالأفضل تديه وقته مع استمراك بالكلام عن الكفالة من فترة للتانية.
٩- المعالج:
لو حسيت إن الطريق مسدود فانت ممكن تلجأ لمعالج أو استشاري يساعدكم على التواصل مع بعض ويفضل يكون المعالج عنده خبرة بمشاكل العقم وتأثيرها النفسي على الأزواج.
١٠- مش بالعافية:
متحاولش تجبر شريك حياتك على حاجة كبيرة زي دي، ولا تحسسه بالذنب، ولا تدفعه إنه يوافق عشان يرضيك وهو نفسه مش مقتنع، لأن أي طفل يستحق إنه يحس إنه مرغوب فيه من أمه وأبوه، ولو حس بالرفض من شخص فيهم فـ الكفالة ممكن تكون أسوء شيء حصله في حياته...
نتمنى إن النصايح ال ١٠ تكون مفيده ليكم وتساعدكم في إنك تاخدوا القرار السليم
