مش مهم إنك تكون غني أو متعلم تعليم جامعي عشان تقدر تكفل طفل ولا حتى مهم إنك تكوني متزوجة
المهم إن يكون عندك القدرة على الالتزام تجاه طفلك بالكفالة مدى الحياة.
قرار الكفالة مش قرار سهل وبيغير حياتك تمامًا، وبيلزمك برعاية كاملة لطفلك مدى الحياة، عشان كدا إنت محتاج تاخد وقتك قبل ما تاخد القرار المهم ده.
واحنا في "كفالة" هنساعدك تعمل تقييم قبل ما تاخد قرارك عن طريق ١٠ أسئلة مهمة جدا تسألهم لنفسك :
١. هل أنا عندي الإيمان والفهم الكامل بالكفالة ؟
٢. هل أنا عندي قوة الصبر والمثابرة للموضوع ده بكل تفاصيله ؟
٣. هل أنا عندي سعة الصدر والموهبة في التعامل مع الحياة بسلاسة و مرونة ؟
٤. هل أنا عندي القدرة على التعامل مع التحديات والضغوطات ؟
٥. هل أنا عندي القوة والحكمة عشان أحط حدود لبعض الناس ؟
٦. هل عندي الاستعداد أتعلم عن التربية والأبوة والأمومة، وعن احتياجات الطفل الصحية والتعليمية؟
٧. هل أنا عندي سعة الحيلة والدهاء اللي هحتاجهم في تربية الطفل؟
٨. هل أنا عندي القوة إني أواجه المحبطين والأفكار الخاطئة عن الكفالة ؟
٩. هل أنا عندي القدرة علي المحادثات الصريحة والذكية مع طفلي المكفول في موضوع هويته ؟
١٠. هل أنا عندي القدرة على الالتزام بكفالة طفل مدى الحياة ؟
لو كانت إجاباتك على معظم الأسئلة بـ "نعم" فإنت محتاج تسأل نفسك نوع تاني من الأسئلة عشان تحدد مدى استعدادك للكفالة ؟
١. هل أنا مدرك كويس جدًا سبب رغبتي في الكفالة ؟
٢. هل أنا وشريك حياتي متوافقين وواخدين قرارنا سوا ؟
٣. هل أنا وشريك حياتي عندنا القدرة على الالتزام بكفالة طفل مدى الحياة؟
٤. هل أسلوب حياتي أنا وشريك حياتي وشغلي بيتيح ليا الوقت والجهد لتربية طفل والالتزام تجاهه ؟
لو كانت إجاباتك بـ "نعم" على الأسئلة ال ٤ اللي فاتت دول فإنت تقريباً مستعد لكفالة طفل ينور حياتك وتنور حياته وتوفرله حياة كريمة .
