جرب كدا تقول لقرايبك أنا جايلي طفل في الطريق.. طبعًا هيطيروا من الفرحة . صح ؟
طب جرب بقا تقولهم إن الطفل دا هيجي عن طريق الكفالة ، في الغالب هتتصدم من ردة فعلهم الغير مشجعة .
بتحكي سمية أحد الأمهات الكافلات " لما قولت لأهلي إني هكفل طفل، ملقتش منهم التشجيع اللي كان نفسي ألاقيه، مظنش إنهم كانوا مترددين . . لأ . . هما كان عندهم مخاوف وقلق ومكانوش معتبرين الكفالة طريقة لبناء أسرة . مكانوش عارفين يعني إيه كفاله بالشكل السليم ، بس مع الوقت قدروا يتعاملوا مع مخاوفهم دي، وتقريبًا الموضوع أخد مني حوالي شهور لحد ما قدروا يتعاملوا مع الموضوع بشكل طبيعي"
أكيد طبعًا بنتوجع جدًا لما مبنلاقيش دعم من أقرب الناس لينا، بس خلينا نقول إن تفكيرهم بيكون بدافع الحب والخوف علينا، قولولهم "احنا مقدرين خوفكم، بس احنا خلاص اخدنا القرار ومحتاجين دعمكم"
اعرضوا عليهم يقرأوا عن الكفالة وخلوهم يتابعوا صفحتنا "كفالة" والموقع الإلكتروني kafala.net اللي هتلاقوا فيه معلومات كتير عن الكفالة . خلوهم يتعلموا اللي انتوا اتعلمتوه . خليهم يعرفوا اللي إنتوا عرفتوه . دا هيقرب من أفكاركم ويسهل عليهم فهمكم .
كتير من الأسر الكافلة بتحكي أن أهلهم كانوا ممانعين بس بمجرد وصول الطفل البيت كل الممانعات والمخاوف تقريبًا انتهت وبدأوا يتعاملوا مع الطفل كحفيد وكابن أخ وأخت فعلي.
بتحكي سلمى من إسكندرية "أكبر الممانعين لفكرة الكفالة من أهل زوجي، هما أكتر ناس حبوا أحمد جدًا أول ما شافوه وبقوا من أكبر الداعمين لينا" بتقول "أفتكر إن عمري ما شفت حماتي بالحماس دا حتى مع أطفال أخوات زوجي، ويوم وصول أحمد البيت كان أكتر يوم لعبنا وضحكنا وهزرنا سوا".
حقيقي رحلة الكفالة رحلة كبيرة و قرارها مش سهل . بس لما بتاخد القرار وتنفذه بتعرف فعلًا أنه كان يستحق.
