منقدرش ننكر إن كتير من الأزواج اللي اتحرموا من نعمة الأولاد بيحسوا إن مفيش معنى للحياة بدون أولاد، ودا اللي بيدفع الكتير منهم للكفالة، بس في اللي مبيقدرش ياخد الخطوة وبيفضل متردد بين احساسه بإن حياته ناقصها طفل وبين سؤاله "هل المفروض نكفل طفل؟"
مفيش حد في الدنيا هيقدر يجاوبكم على سؤالكم بآه أو لأ، ولا في بلوره سحرية هتطلع لكم الإجابة القاطعة بإنك مفروض تكفلوا طفل ولا لأ
بس في أربع علامات هترشدكم إمتى تكون الكفالة هي الحل المناسب ليكم والمفروض تبدأوا تاخدو خطوة الكفالة:
١- أنا عندي استعداد أحب إبني بالكفالة بدون شروط:
لو حسيت كأب أو كأم إنك عندك استعداد تكفل طفل وتقدمله كل الحب والرعاية اللي كنت هتقدمها لطفلك اللي اتحرمت منه، فانت على الطريق الصح ودوافعك للكفالة صحيحة جدًا.
يعني لو عندك القناعة كأم إن الأهم من إنك تحملي إن يكون عندك طفل، فالكفالة مناسبة ليكي، لو عندكم استعداد لحب طفل مش شبهكم، مش واخد عيونكم ولا شعركم، وعندكم استعداد تقدموله حب غير مشروط بقرابة الدم فانتوا على الطريق الصح.
٢- أنا أقدر أوفرله البيت والآمان والاستقرار:
مش لازم تكون غني عشان تكفل طفل، بس على الأقل يكفي يكون عندك احتياجات ومطالب الطفل المادية والأساسية من أكل وشرب ولبس وتعليم، مينفعش تكون غير مقتدر ماديًا وتكفل طفل و تظلمه معاك.
٣- أنا مستعد لمواجهة التحديات:
مفيش حياة وردية تمامًا، كلنا بنواجه تحديات مع أطفالنا حتى اللي من دمنا، فانت لو عندك القناعة إنك هتقابل تحديات كتير غير متوقعة ومستعد ليها، فانت ماشي ع الطريق الصح.
٤- أنا وزوجي/زوجتي متفقين:
مينفعش تبدأ في إجراءات الكفالة وشريك حياتك مش موافق أو لسه مأخدش قراره، لأن كل واحد بياخد وقت مختلف عن التاني لحد ما يرتاح للفكرة ويتقبلها، فلو كنتوا انتوا الاتنين على درجة مقبولة من الاتفاق بدون ضغط من طرف على التاني فانتوا ماشيين على الطريق الصح.
لو اتحققت فيكم كزوج وزوجة كل العلامات الأربعة اللي فوق دي ولسه بتسألوا "هل المفروض نكفل طفل؟"
الإجابة هتكون : أيوة انت مستعد لكفالة طفل، اكفل طفل وهتعيش معاه لحظات كتير كانت فايتاك وهتحققله فرصة عظيمة في حياة كريمة مع أب وأم وأسرة.
الكفالة هتخليك تحس بإحساس الأبوة المتأصل جواك
الكفالة هتخليكي تحسي بالفرحة لما طفلك يخطي أول خطوة أو لما يكتب أول كلمة ولما يقولك ماما مع أجمل حضن
الكفالة حب
الكفالة دعم
الكفالة أب وأم
الكفالة أسرة للأبد
