مفيش كلام يقدر يوصف المكاسب ورا كفالة طفل، لأن مزايا الكفالة بتختلف من أسرة للتانية، وكل قصة كفالة تعتبر قصة فريدة من نوعها، لكن في العموم مزايا الكفالة بتمتد من أول الشعور بالرضا عن نفسنا عشان قدرنا نوفر بيت لطفل و لحد الاستمتاع بمشاعر الأبوة والأمومة، حقيقي مكافئات الكفالة لا تعد ولا تحصى .
إحنا في "كفالة" بنقدملكم أعظم المزايا المكتسبة من كفالة طفل اللي أجمع عليها كل الأسر الكافلة :
١- تحقيق حلمك في تربية طفل مدى الحياة:
عدد كبير من الأمهات والآباء وحتى قبل زواجهم بيكون حلم حياتهم إنهم يربوا طفل، ويشاركوه كل التفاصيل اللي حلموا بيها طول حياتهم، الكفالة بتسمح لكل زوج وزوجة ربنا لم يرزقهم الأطفال و بتسمح لكل سيدة ملقتش نصيبها في الزواج إنهم يربوا طفل يحققوا معاه كل مشاعر الأمومة والأبوة .
٢- تجربة الشعور بالفرحة والسعادة لإضافة طفل لأسرتك:
برغم إن عملية كفالة طفل وتربيته عملية مرهقة في بعض الأحيان، لكن النتايج السعيدة منها لا تعد ولا تحصى، وسواء كان طفلك المكفول هو أول طفل في أسرتك أو إن طفل جديد هينضم لأسرتك، فشعورك بالبهجة مش هيختلف، أيامك هتبقى مشرقة أكتر، ومستقبل أسرتك هيبقى واعد أكتر لما ينضم ليها طفل جديد يجلب ليكم السعادة والفرحة.
٣- حياة أكثر تنظيمًا:
إنشاء الروتين أمر ضروري جدًا للأطفال، لأن الروتين بيوفر للطفل الشعور بالأمان وبيساعدهم على التطور، نشأة الطفل في بيئة روتينية مستقرة بتنمي عنده حس الإتقان في أمور حياته وكمان بتساعده على التأقلم مع التغييرات بشكل أفضل.
حتى إن بعض الدراسات عن تأثير الفوضى المنزلية أثبتت إن كل ما كانت الحياة الأسرية أكتر فوضوية، كل ما زادت احتمالية تعرض الطفل للمشاكل زي التوتر وسوء الحالة الصحية العامة وزيادة مستوى العدوانية ومشكلات السلوك.
وعرفت الدراسة الفوضى المنزلية بإنها: "الحياة الفوضوية الخالية من الروتين اللي بيغيب فيها التنظيم وفيها ضوضاء مفرطة أو زحام شديد أو ليها وتيرة سريعة جدًا"
ومع التزامكم بالروتين لتحسين حياة طفلكم المكفول، هتلاقوا إن حياتكم اليومية الخاصة وروتينكم اليومي بيتغير بشكل إيجابي وإن حياتكم بقت أكتر استقرار وانتاجية.
٤- أنشطة واهتمامات جديدة:
برغم إن كل الأطفال مختلفين، لكنهم كلهم عندهم شيء واحد مشترك مهما كان سنهم أو حجمهم أو جنسهم، كلهم عندهم أحلام وتطلعات، ولما هتكفل طفل فانت بتكفل معاه مجموعة كاملة من أحلامه وتطلعاته، كل طفل عنده مواهبه واهتماماته الفريدة، وأفضل طريقة تساعد بيها طفلك على اكتشاف مواهبه هي مساعدته على تجربة حاجات جديدة.
كفالة طفل هتتطلب منك تفكر برا الصندوق وتجرب معاه أنشطة جديدة، وخروجك من منطقة الآمان وتجربتك لأنشطة جديدة هيلهم طفلك يعمل نفس الشيء.
في النهاية هتلاقي نفسك بتشارك طفلك رحلة البحث عن هواياته وتكوين هويته، ومش بعيد إنت كمان تبدأ تكتشف هواياتك وتطور نفسك فيها. الكفالة هتخليك مش بس تشوف اهتمامات جديده . هتخليك تشوف الحياة بشكل تاني.
٥- التعلم والنمو المستمر:
لما بتكفل طفل وتسعى لتعليمه بتقدر تكتشف نفسك عن طريق مساعدة طفلك على التعلم، هتكتشف إن عندك القدرة على تعلم مهارات جديدة، وإن عندك قدرات أكبر من تصورك عن نفسك، كمان خلال رحلة تعليم طفلك هتكتشف أسلوب التعلم الخاص بيك، لأن كل الناس بتتعلم بشكل مختلف وليها أسلوب خاص بيها في التعلم، من خلال كفالة طفل هتقدر تدرك حقيقة إن ابنك المكفول ليه أسلوب مختلف عنك في التعلم، وإن مهارات طفلك السمعية والبصرية والحركية مختلفة تمامًا عن مهاراتك، وإن أسلوب تعلمه مختلف عن الأسلوب اللي انت اتعودت عليه.
٦- تحسين كفاءة حياتك:
محتمل جدًا إن حياتك وحياة أسرتك تتحسن بعد وصول طفلك، لأن جزء كبير من نمو الطفل وتطوره بيعتمد على الروتين وعلى التعزيز الإيجابي.
الأسر اللي بتقدر تخلي التشجيع والإيجابية هما محور حياتها في البيت، بتقدر تخلق جو تمكيني للطفل المكفول ولكل أفراد الأسرة، وهتشوف تأثير دا على حياتها العملية وكمان الاجتماعية لأن الإيجابية معدية زي ما بيقولوا.
٧- تحسن الصحة العامة:
تطبيقك القواعد في البيت بعد وصول طفلك زي الأكل الصحي وظبط مواعيد النوم والأكل، وتخصيص وقت للعب والراحة، كل دا هيخلي حياتك تتشكل بصورة أفضل.
نمط الحياة الإيجابي الجديد مش هيستفيد منه طفلك المكفول لوحده، لكن انت كمان وباقي أفراد أسرتك هتستفيدوا بنفس الدرجة.
٨- المساهمة في الكفالة والثواب العظيم :
بكفالة طفل انت بتساهم في تخفيف الأعباء على المجمتع وعلى الدولة ، لكن الفايدة الأكبر إنك بتوفر بيت دايم لطفل محتاج، مجرد توفيرك لبيت آمن وأسرة محبة لطفل هي في حد ذاتها فايدة أكبر وأهم من أي فايدة. الثواب العظيم اللي كل أسرة كافلة مسئوله بترجوه واحد من اعظم مكاسب الكفالة.
في النهاية الكفالة تجربه رائعة، الكفالة بتغير حياتك وحياة طفل للأبد .
