١- الأطفال المكفولين أمهاتهم من النسب كانوا مدمنين أو مش متزوجين
الحقيقة إن الأمهات من النسب للأطفال المكفولين مختلفين ومتنوعين، منهم المراهقة ومنهم اللي فوق الأربعين، منهم المتزوجة أو المش متزوجة، ومنهم الفقيرة ومنهم الغنية، ومنهم اللي طفلها مخطوف وفضلت عمرها كله تدور عليه . منهم الي أيقنت إن حياة الطفل هتكون في خطر لو كمل معاها ، منهم كمان اللي تأكدت إن حياتها هي اللي هتكون في خطر في وجود الطفل معاها وبالتالي حياة الطفل هتكون كمان في خطر فمفيش حاجة نقدر نحكم بيها على أم فيهم ولا لينا أصلًا الحق بالحكم عليها.
٢- الكفالة هي تاني أفضل طريقة لبناء الأسر
في الحقيقة الكفالة ممكن تكون أول وآخر طريقة لبناء أسرة بالنسبة لزوجين عندهم تحدي في الإنجاب، فمش لطيف أبدًا إننا نحسسهم إن طريقتهم في بناء أسرتهم خيار تاني أو درجة تانية، في أسر فعلًا بتشكر ربنا ليل نهار عشان شرع الكفالة لأن دي كانت وسيلتهم الوحيدة لبناء أسرتهم، ومستحيل يتخيلوا إنهم مش آباء حقيقين لأطفالهم المكفولين.
الحمل والولادة وسيلة لبناء الأسر، والكفالة وسيلة لبناء الأسر ومفيش اختيار أحسن ولا اوحش من التاني المهم العلاقة نفسها، الأسره نفسها هي الأهم.
٣- الآباء والآمهات بالكفالة مش آباء وأمهات حقيقيين
الحقيقة إن الجينات مش هي اللي بتصنع الأسرة، والحمض النووي مش هو الشيء اللي بيربط الطفل بأمه وأبوه، لكن علاقة الحب والترابط اللي بتنشأ بينهم وبين أولادهم هي اللي بتصنع البيت والأسرة.
الأبوة والأمومة الحقيقة بتتولد من علاقة الحب والرعاية اللي بيقدموها للطفل، من مشاعر الحب العميق جدا اللي بتكون جواهم تجاه طفلهم، من مشاعر الخوف عليه لما يمرض، ومن مشاعر الحماس والفخر الحقيقي من جون جابه في ماتش، أو بسبب درجة حلوه جابتها في امتحان.
الأبحاث أثبتت إن الآباء من الكفالة بيكونوا على درجة كبيرة من المسؤولية واليقظة والحب تجاه أولادهم، ودا ممكن يكون سببه في بعض الحالات إنهم قعدوا وقت طويل يتمنوا وجود طفل في حياتهم، عشان كدا مصطلح "الآباء والأمهات الحقيقيين" هما أولى بيه، وممكن نقول على الآباء من النسب الآباء الطبيعيين او البيولوجيين.
٤- الأطفال المكفولين متعبين
خلينا متفقين إن الأبوة والأمومة شيء مش سهل، وفيها حلوها ومرها حتى مع الأطفال من النسب ، آباء وأمهات كتير بيجي عليهم وقت وبينهاروا حرفيا، كل الفكرة إن بشوية مهارات وصبر هتخلي العيشة مع الطفل أسهل، بصرف النظر عن إنه طفل بالكفالة او بالنسب .
إحنا في “كفالة” بندعمكم من خلال ملفات دعم الأسر الكافلة اللي فيها محتوى خاص بالتربية من أول الرضاعه ولحد بعد سن المراهقه وكمان بندعمكم بمجله دوريه إلكترونيه فيها مقالات كامله عن التربيه والتحديات اللي ممكن تقابلها مع طفلك.
٥- الأطفال المكفولين أمهاتهم من النسب تخلوا عنهم عشان مش عاوزينهم
مفيش أم مش هتحب طفلها أو مش عايزاه
كل الفكرة إنها بتكون عاوزة ليه حياة أفضل، هي أيقنت إن حياته مع حد غيرها هيكون أفضل ليه، وعايزة توفر له حاجات هي مش قادرة توفرها، أو كانت مضطره لأسباب لا نعلمها إنها تتخلى عن طفلها، مش من السهل على أي أم انها تسيب طفلها، والام اللي بتاخد القرار دا بتتحمل إحساس الخسارة والحزن طول عمرها.
٦- المفروض الأطفال المكفولين ميعرفوش عن كفالتهم إلا لما يكبروا ويستوعبوا
غلط كبير، بيدمر الطفل وبيدمر علاقتكم بيه، الطفل محتاج يعرف من وهو صغير إنه مكفول (طبعا بالشكل والتوقيت المناسب) ، لازم الطفل يكون بيكبر كل يوم وهو عارف حقيقتة كفالته، عشان تكون هوية ليه بيكبر عليها ويفتخر بيها، الرسول صلى الله عليه وسلم وعد كل كافل بالثواب العظيم، والكفالة تعتبر واحدة من أكبر الأعمال الخيريه وأعظمها أجرًا.
الطفل لو خبيت عليه حقيقه كفالته وعرف وهو كبير بيبدأ يحس إنه اتخدع أو إن كفالته دي حاجة مخزية أو تكسف وكان لازم نخبيها عنك.
في “كفالة” عملنا “دليل محادثات الكفالة” وهو دليل تفصيلي عن كل التقنيات و الأساليب المناسبه لكل سن وازاي تقوله حقيقة كفالته.
٧- الأطفال المكفولين بيبقوا مدمرين نفسيًا وعاطفيًا
كلام مش حقيقي تمامًا، طبعا فيه شريحه منهم بيبقوا مضطرين للتعامل مع مواقف صعبة جدًا اللي للأسف بيفرضها عليهم المجتمع، المجتمع والناس اللي بيحكموا عليهم دول هما اللي بيحطوهم في المواقف دي، مواقف زي أسئلة وتعليقات محرجة من الأطفال والكبار كمان، عشان كدا بيترسخ في أذهان الناس الأفكار الغلط دي عنهم .
واحنا هنا بيك ومعاك علشان نغير الأفكار الخاطئة والقناعات الغلط اللي ملهاش علاقه بالمنطق او الدين.
٨- لازم تكون أب مثالي/أم مثالية عشان تقدورا تكفلوا طفل
الحقيقة إن مفيش حاجة إسمها أب مثالي وأم مثالية، أحد الأمهات الكافلات بتقول "احنا مش مثاليين ولا حاجة، احنا بس قادرين نربي طفل في بيت كله حب، ولو الكفالة كانت للأشخاص المثاليين بس يبقى محدش هيكفل أطفال من الأساس"
كل الآباء بالكفالة بيكون عندهم مخاوف قبل الكفالة ودا شيء طبيعي جدًا ومش بيقلل مش كونك هتبقى أب/أم كويسين، بالعكس المخاوف ديه بتأكد إنك إنسان مسئول ومحب.
٩- كفالة طفل مش هتبقى زي الحمل والولادة
انتي بالفعل هيفوتك تجربة الحمل والولادة، بس تربية طفل مكفول متفرقش في أي شيء عن تربية طفلك من الولادة، الاتنين هيحتاجوا منك حب بدون شرط، هيحتاجوا دعمك ورعايتك وحنيتك، هيحتاجوا منك صبر و تربية وتأهيل عشان يكونوا شباب مسؤؤولين. مشاعر الحمل والولادة مؤقتة، مشاعر الأمومه والحب دائمة.
١٠- الآباء والأمهات اللي سنهم كبير مينفعش يكفلوا طفل
أحيانًا الحمل في سن كبير بيسكون خطر على الأم، لكن مفيش أي خطورة من كفالة طفل في سن كبير، بالعكس دي حاجة جميلة انكم تبدأو تكونوا الأسرة اللي ياما حلمتوا بيها، كمان هيا فرصة عظيمه لكفالة طفل أكبر سنًا تخطى مرحلة الرضاعة، عشان تقدروا تتواصلوا معاه بشكل أكبر وأعمق، وتزرعوا جواه الحب و تغرسوا فيه المبادئ والقيم اللي هيعيش بيها طول حياته.
