لو قررت تكفل طفل يتيم في بيتك لأي سبب من الأسباب ، وقررت إنك تغير مستقبل وحياة طفل يتيم ، ضروري جداً إنك متعش دور البطل المنقذ لأن ده له تبعات سلبية كبيرة.
(بعض) الكافلين للأسف عندهم عقدة اسمها عقدة المنقذ وبعد ما بتكفل طفلها بتعيش دور البطل اللي أنقذ طفل من مأساة وغيرله حياته تمامًا، وفي المقابل بيكونوا متوقعين يلاقوا الامتنان والتقدير من طفلهم جزاء للعمل الصالح اللي قدموه، وكأن الطفل مديون لهم عشان كفلوه.
المشكلة إن الطفل اللي عايش في دار الرعاية مش محتاج إنقاذ وخلاص ، هو محتاج لحب دايم وغير مشروط من أسرته اللي هتكفله.
النهاردة "كفالة" هتقدملك ٣ نقاط المفروض تحطها في اعتبارك عشان تتجنب عقدة المنقذ خلال رحلتك مع الكفالة.
أولًا: مصلحة الطفل
الكفالة مش شيء متعلق بيك. الكفالة في الأساس متعلقة بإيجاد بيت و أسرة لطفل محتاج ده ، بمجرد وصول طفلك بيتك كل شيء في حياتك من هنا ورايح المفروض تصب في مصلحته هو ، الطفل هيحتاج منك طاقة نفسية وجسدية كبيرة جدًا، الأمومة والأبوة سواء كانوا عن طريق الولادة أو الكفالة فيها تضحية مستمرة علشان الطفل، غير إن الكفالة بتكون أصعب لأن تحدياتها أكبر، بس أيًا كان الوضع فالحياة من وقت وصول طفلك هتبقى متعلقة بيه هو مش بيك انت ، وقليل جدًا ما هتكون متعلقة بيك أو بشخصك، وهيبقى دورك في الحياة مركز على مساعدة طفلك على التأقلم مع حياته الجديدة ومساعدته على التقدم والنجاح في حياته.
بنيتك الطيبة انتا بتكرس حياتك لخدمة ومصلحة الطفل.
ثانيًا: الإمتنان
مينفعش تتوقع امتنان طفلك ليك عشان كفلته، مش من الطبيعي إنك تنتظر من طفل إنه يشكرك أو يمتن ليك عشان كفلته.
الموضوع ده ممكن يؤثر في ثقته في نفسه و في إحترامه لذاته ومدى إستحقاقه لحياة سليمه وعادية بدل شعور الشكر والإمتنان اللي بيلح على تفكيره وعلى روحه.
العلاقة لازم تكون علاقه طبيعية كلها حب و تقدير للشخص وللعلاقه مش علشان سبب ما . سواء إمتنان الطفل لكافليه علشان كفلوه أو إمتنان الكافلين للطفل علشان حقق لهم أمنيه إتحرموا منها.
ثالثًا: توقع الشكر
الآباء من النسب (البيولوجيين) مبينتظروش من أولادهم الامتنان والشكر، ليه انت كوالد كافل منتظر الامتنان والشكر من طفلك؟
ودي كانت رسالة من أحد الآباء الكافلين لابنه بيشرح فيها فكرة الامتنان بطريقة جميلة
"إبني العزيز . إنت مش محتاج أبدًا تحس بالامتنان عشان كفلناك، انت مش محتاج تعبر عن امتنانك لشيء هو في الأساس حقك، وحبنا ليك هو ملكك من قبل ما نقابلك ولحد آخر يوم في عمرنا، احنا مش عايزينك تحس بالامتنان، احنا عايزينك تعرف وتتأكد إن مكنش في أي اختيار لينا غير إننا نحبك، وحبنا ليك كان في انتظارك طول الوقت، لأنه اتخلق عشانك وملكك من الأساس، إحنا عاوزينك تحس بالحب اللي مالي قلوبنا ليك . الحب اللي هيستمر للأبد"
أطفال دور الرعاية مش بحاجة لمنقذين بطوليين، هما محتاجين أسرة تحبهم حب حقيقي يدوم للأبد بدون شرط وبدون انتظار امتنان أو شكر، لو هتكفل طفل عشان تمنحه حياة أحسن وتديه كل مشاعر الحب غير المشروط فهي دي الكفالة ، لكن لو هتكفل طفل عشان تنقذه وتقوم بدور البطولة، فانت محتاج تتخلص من عقدة المنقذ الأول قبل ما تفكر تكفله.
