الكفالة والعوامل الوراثية
"هو مش الرسول صلى الله عليه وسلم قال : العرق دساس ؟"
"طب يا ترى هل طفلي المكفول ممكن يتنقل له سلوك من أهله من النسب ؟"
"يا ترى العوامل الوراثية هتعمل ايه؟"
"ياترى هياخد سلوك الأسرة اللي هتربيه ولا هيكون سلوكه متأثر بأبوه وأمه من النسب؟"
"طب شخصيته هتبقى شبهنا ولا مختلفة؟"
مين لما فكر في الكفالة مفكرش في الأسئلة ديه ؟
أسئلة كتير محيرة جدًا، ممكن تأثر على قرار الكفالة من الأساس وتخليك تتردد.
مبدئياً كدا خلينا نبدأ بمعلومة صادمة وهي :
حديث "العرق دساس" حديث ضعيف واللي قال كدا هو الشيخ الألباني
تقدر تتأكد من (هنا)
بعد ما إتأكدت من عدم صحة الحديث خلينا نقولك بعض المعلومات المهمة المستندة على أبحاث علمية :
أولًا: الأبحاث السلوكية العلمية أثبتت إن الصفات ٣ أنواع
١- صفات بتتحكم فيها الوراثة تمامًا
٢- صفات بتتحكم فيها البيئة تمامًا
٣- صفات مختلطة بتتأثر بالاتنين الوراثة والبيئة
مجموعة الصفات دي هيا اللي بتكون الشخصية والسلوك والمزاج الخاص بكل شخص.
يعني من الآخر كدا احنا عبارة عن مزيج من الوراثة والبيئة
بس فيه معلومة مهمة جدا وهيا إن "سلوكنا" في العموم بيتأثر بالبيئة بشكل أكبر
خلينا ناخد مثال يوضحلك ده :
لو طفل كان أبوه سلوكه متهور جدًا، والتهور يعتبر صفة وراثية مش مكتسبة ، هل دا معناه إن الطفل هيبقى زي أبوه بالظبط؟
بمعنى تاني : لو مثلًا كان الأب متهور وبجانب صفة التهور نشأ في بيئة مش صحية مش بتدعمه مش بتحبه مش بتهتم بيه، وإتعرض للأذى والتنمر في المدرسة وسوء المعاملة في البيت ، تهوره دفعه إنه يهرب ويسيب البيت، انحرف وأدمن وأنجب طفل من علاقة محرمة.
خلي بالك إن كل اللي حصل للأب دا مكنش بسبب سلوك التهور، لأ . دا كان بسبب سوء البيئة من حواليه، ملقاش حد يوجهه أو يدعمه أو يشوف إيه مشكلته من الأساس . بدليل إن فيه آباء وأمهات غير متهورين تماما ومع ذلك أبناء لهم من النسب بيعملوا أعمال متهوره وده في المقام الأول بيكون بسبب التربية والبيئة المحيطة.
تعالوا بقا نشوف السيناريو لو الابن المكفول ورث الصفة دي من أبوه:
الطبيعي واللي المفروض يحصل في بيئة صحية إن لما الأم أو الأب يلاحظوا سلوك الطفل المندفع او المتهور، يتم أحتواءه أولًا، وبعدين لو الأمر يتطور هيعرضوه على أخصائي تعديل سلوك مثلًا، ممكن الطفل يتشخص طبيعي ومفيش عنده حاجة، ووقتها احتواء أهله وتعاملهم مع طبيعة شخصيته بشكل سليم كافي إنه يحافظ عليه من أي سلوك سيء.
وممكن الطفل يتشخص مثلًا بحالة معينة زي فرط الحركة ، وقتها بيتم إتباع بروتوكلات علاجيه تحتوي الموضوع ده ، الأم هتوفرله تعليم مناسب وهتتابعه في المدرسة وتوضحلهم حالته، هتشتركله في أنشطة معينة يقدر يطلع فيها طاقته، هتوفرله كل اللي يناسب حالته لحد ما يطلع أحسن ما عنده.
دا السيناريو الطبيعي اللي مفروض يحصل مع أي طفل سواء مكفول او غير مكفول ، مش معنى إن طفلك سواء كان بيولوجي أو مكفول ورث صفة معينة إن سلوكه هيكون سيء، العلم بيقول البيئة والتربية ليها العامل الأكبر في سلوك الطفل، وممكن الصفة اللي ورثها دي تطلع منه أحسن ما عنده لو اتوظفت صح.
ثانيًا: معظم الجينات الخاصة ببعض الاضطرابات النفسية علشان تظهر في الطفل بتحتاج تتنقل من الأبوين مع بعض ، يعني لازم يكون الأب والأم عندهم نفس الجين عشان يظهر في الابن ، عشان كدا بتكون وراثتها أصعب ونادرة إلى حد كبير.
الخلاصة :
إن مش من الضروري أبدًا عشان كفلت طفل وورث صفة معينة من أمه أو أبوه بالنسب، إنه هيبقى زيهم (مع العلم إنه أكيد ورث صفات جيدة) .
البيئة هيا الأصل . تربيتك هيا الأصل، إهتمامك وإحتوائك ودعمك هو الأصل.
اكفلوهم وانتو متطمنين.
