أحد الزوجات المقبلات على الكفالة بعتتلنا سؤال بتقول فيه "أنا وزوجي قررنا نوقف علاجات الخصوبة ونبدأ في إجراءات كفالة طفل، بس واحد من الآباء الكافلين نصح زوجي بإننا نخفي حقيقة كفالة طفلنا عن الناس من حوالينا وإني أتظاهر بالحمل قدام أصحابنا وأفراد عيلتنا، بس أنا مش مقتنعة ومش شايفة أي داعي لكدا، ومش متخيلة إني هقدر أتظاهر بالحمل ولا الولادة، هل حد جرب يعمل كدا قبل كدا، حد يقدر ينصحني أعمل ايه؟"
احنا في كفالة عرضنا السؤال دا على بعض الأسر الكافلة على جروب الواتس آب الخاص بالأسر الكافلة وطلبنا منهم يقدموا للزوجة دي خبراتهم، ودي كانت بعض ردودهم عليها:
١- أم كافلة : واضح إنك مرتبكة وقلقانة من الكلام اللي سمعتيه، وطبعًا عندك حق، التظاهر بالحمل عشان تخفي حقيقة كفالة طفلك يعتبر نوع من أنواع الجنون، حقيقي فكرة سيئة جدًا، امشي ورا مشاعرك، انتي صح"
٢- أم كافلة : ”أهلًا بيكي في عالم الكفالة، دا وقتكم عشان تتثقفوا عن الكفالة وتاخدوا معلوماتكم من مصادر موثوقة، وتكونوا وجهة نظركم وآرائكم بخصوص الكفالة، متخلوش حد ينصحكم بدون وعي، وعوا نفسكم صح واختاروا اللي في مصلحة طفلكم قبل أي شيء"
٣- أم كافلة : ”وقت ما قررنا نكفل واحد من قرايبنا عمره قريب من الستين تقريبًا سألني إذا كنت هزيف حملي وأخفي حقيقة كفالة بنتي، أنا لما سمعت منه الكلام دا مش بس حسيت إن دي فكرة مش مناسبة من الناحية الأخلاقية، لكني كمان متصورتش إزاي كدبة زي دي ممكن تنجح، فرضًا حصل أي تغيير في الخطط أو حصل أي شيء مش في الحسبان، حاجات كتير بيتم التخطيط ليها كويس جدًا وبتنهار في آخر لحظة، كمان احنا كنا عايزين نتأكد طول الوقت إن بنتنا فخورة بشخصيتها الحقيقية، وإنها عارفة تاريخها، وفي نفس الوقت عايزين نعلمها إن قصتها شيء خاص بيها وإنها مش مجبرة تناقشها مع أي حد غريب، الكفالة فيها خصوصية وخصوصية شديدة لكنها مش سر ولا فيها شيء تخجلوا منه"
٤- أم كافلة : “الكذب مش هيدوم حتى ولو بنية صادقة، الكذبة مؤقتة وهتنكشف في يوم من الأيام، ووقتها هتخسروا ثقة الناس فيكم، وممكن تخسري حبهم لطفلك، نفذي قرارك وانتي رافعة راسك وتأكدي إن ثقتك في قرارك هتولد ثقة طفلك في نفسه وهتجبر غيرك على احترامه، عكس ما لو عاش الطفل حياته مش عارف حقيقته واكتشفها بالصدفة فيما بعد الله أعلم وقتها هيسامحكم ولا لأ.. متخافيش طالما بتعملي خير وطالما بتعملي الصح، ولو حاسة إنك مش قد الكفالة يبقى انتظري بدل ما تظلمي نفسك وتظلمي طفل معاكم"
٥- أم كافلة : "ليه تعيشي نفسك في ضغط نفسي كبير بالشكل دا، وتفضلي طول الوقت تكذبي وتداري الكذبة بكذبة أكبر، الضغط النفسي اللي هتعيشي فيه بسبب الكذب انتي مش ضامنة إنك تقدري تتحمليه للنهاية، وكمان دا قراركم انتم محدش ليه دخل فيه عشان تكذبوا، طالما مقتنعين بقراركم، يبقى اعملوه بالطريقة الصح"
٦- أم كفالة : "لو مش هتقدروا تحتفلوا بكفالة طفلكم قدام العالم كله، يبقى متكفلوش، مفيش حاجة تكسف في الكفالة ولا في حاجة تخجلوا منها، غير إن التعامل مع الكفالة على إنها سر هيضر بطفلكم في المستقبل"
٧- أم كافلة :” ما بني علي باطل فهو باطل، بلاش تبتدي حياه جميله كلها خير وبركة بكذبة علشان نفسيه طفلك ونفسيتك، ليه تعيشي في قلق طول الوقت خوفًا من إن الكذبة تنكشف، طالما انتي وزوجك مقتنعين بالكفاله ميهمكيش أي حد، الكفالة مش عيب بالعكس ده شرف لأي حد، وكمان لازم تفتخروا بكفالة طفلكم وتدافعوا عنه وتعلموه القوة والتسامح وتقبل حقيقته، ومتسمحوش لحد يقلل منه أو يضايقه"
٨- أم كافلة : "في فرق كبير بين عدم مشاركة قصة كفالتكم مع الناس وبين تزييف الحمل، تزييف الحمل دا شيء مش مقبول تمامًا، الكفالة مش شيء من المحرمات عشان تعملوا كدا، بالعكس دا مفروض إنها شيء مستحب دينيًا، احنا كنا منفتحين جدًا خلال رحلة كفالتنا لأننا كنا محتاجين دعم ومساعدة أصدقاءنا وقرايبنا، لو مش هتشاركوا الناس حقيقة كفالة طفلكم فانتوا هترتاحوا شوية من الأسئلة والتعليقات المزعجة، لكنكم في نفس الوقت مش هتقدروا تطلبوا مساعدة أو دعم أي حد وقت ما تحتاجوا المساعدة أو الدعم، وغياب الدعم والمساعدة شيء مش قليل خلال رحلة الكفالة"
٩- أم كافلة : "فكرة سيئة جدًا إنكم تخفوا حقيقية الكفالة عن قرايبكم وأصدقائكم، أولًا: هتحتاجوا لطاقة كبيرة جدًا عشان تقدروا تكملوا في الكدبة دي، ثانيًا: معظم الناس بتحتاج لتكوين شبكة دعم قوية قبل وصول طفلهم ودا هيبقى صعب تعملوه لو خفيتوا الحقيقة، ثالثًا: التصالح مع فكرة الكفالة نفسها بيحتاج لوقت كبير، فمش من العدل إنك تخفي الحقيقة عن الناس أو عن طفلك، وفجأة يكتشفوا الحقيقة ومطلوب منهم يتقبلوها، رابعًا: أسهل بطريقة لتعليم الطفل عن كفالته بتكون من أول يوم لوصوله، أما إنكم تنتظروا لحد ما طفلكم يكبر عشان يعرف الحقيقية، دا بيكون صعب جدًا عليه، خامسًا وأخيرًا: إقراركم بإن الكفالة وسيلة لبناء الأسر زي الحمل والولادة، هيدفعكم تتعلموا حاجات ضروري تعلموها لطفلكم المكفول من صغره، زي إزاي يتكلم مع الناس عن كفالته، وإزاي يحط حدود ويحافظ على خصوصيته، وإزاي يتعامل مع اختلافه ويتقبله"
١٠- حملة كفالة :
"متبدأيش حياة ابنك أو بنتك بكذبة تفضل محاصراكي طول العمر، انتي مش محتاجة للكذب ولا لتزييف الحمل، انتي محتاجة بس تثقي في قرارك وتتعلمي إزاي تواجهي المجتمع وأفكاره بخصوص الكفالة، محتاجة تتأكدي تمامًا إن الكفالة مفيهاش حاجة تكسف عشان نخبيها، وإنها طريقة لبناء الأسر ولا تقل عن الحمل والولادة في شيء، طول ما انتي عندك القناعة دي فانتي هتقدري تواجهي أي حد، وهتقدري تساعدي ابنك انه يكبر وهو واثق في نفسه ومؤمن بإن كفالته لا تعيبه في شيء أبدًا.
"الكفالة شيء تفتخري بيه مش شيء تخبيه”
"الكفالة شيء تفتخري بيه مش شيء تخبيه”
