لكل سيدة غير متزوجة نفسها تبقى أم
و لكل أرملة عاشت إحساس الوحدة و ملازمها
و لكل زوج وزوجة كبار في السن عايشين لوحدهم
عمركم فكرتوا تغيروا حياتكم وتغيروا حياة ومستقبل طفل معاكم ؟
عمركم فكرتوا تكفلوا طفل يتيم في بيتكم تكونوا بيه أب وأم ويلاقي فيكم سنده وأسرته ؟
عمركم فكرتوا تكفلوا طفل في عمر المدرسة مش محتاج منكم لمجهود بدني كبير، لكنه محتاج دعمكم وحبكم وحكمتكم ؟
طب هل تعرفوا إن الأطفال الأيتام في عمر المدرسة (سواء أولاد أو بنات) موجودين في كل دور الرعاية بعدد كبير جدًا، وفرصتهم في الكفالة بتقل كل ما بيكبروا في السن؟
هل تعرفوا إن الإقبال على كفالة الرضع أكبر بكتير من الأطفال في مرحلة المدرسة لدرجة إن الأطفال الرضع في دور الرعاية بقوا معدودين وقليلين جدًا ؟
هل تعرفوا إن القانون بيسمح للآنسات والأرامل والمطلقات بكفالة طفل يتيم في البيت بعد عمر الـ 30 ولحد الـ 60 سنة ؟
هل تعرفوا إن القانون بيسمح للمتزوجين بكفالة طفل يتيم في البيت لحد عمر الـ 60؟
هل تعرفوا إن في أطفال كبار محتاجين ليكم، وانتم كمان محتاجين ليهم عشان تحققوا معاهم مشاعر الأمومة والأبوة سواء حسيتوا بيها قبل كدا أو لا ؟
هل تعرفوا إن بكفالتهم هتعيشوا مع بعض حياة فيها أجمل التفاصيل اللي ممكن تتخيلوها ؟
انتم أمل كل طفل كبير وصل لمرحلة المدرسة بدون كفالة، وهو كمان أملكم في حياة أجمل وفي أجر عظيم زي مجاورة الرسول عليه الصلاة والسلام في الجنة.
انتم اللي في ايديكم تغيروا مصير طفل للأفضل
انتم اللي في إيديكم تنقذوا روح من مصير مجهول
انتم اللي في إيديكم تحيوا أمل طفل من أول وجديد وتقدموله الأسرة اللي محتاج ليها وعاش سنين كتير يحلم بيها.
