لو تعرف زوج أو زوجة بيواجهوا تحدي في الخصوبة وبيحاولوا الإنجاب، فانت أكيد بتتردد في الكلام اللي ممكن تقوله ليهم خوفًا من جرح مشاعرهم بدون قصدك، واحنا في "كفالة" يهمنا إن كل زوجين بيواجهوا مع بعض تحدي في الإنجاب إنهم يتعرضوا لأقل ضغوطات ممكنة وأقل تعليقات مؤلمة، عشان كدا بنقدملك هنا الحاجات اللي مفروض تقولها او متقولهاش مع أي شخص يواجه تحدي مع الإنجاب.
١٠ حاجات تعملها
١- خليه يعرف إنك مهتم:
أفضل شيء ممكن تقدمه لصديق أو قريب ليك عنده مشكلة في الإنجاب إنك تعرفه إنك مهتم بيه.
٢- ابحث:
اقرأ عن الخصوبة والإنجاب، وعن العلاجات المتاحة وعن الخيارات التانية لبناء الأسر زي "الكفالة"، اقرأ واحتفظ بالمعلومات لحد ما صديقك أو قريبك يقولك إنه محتاج يتكلم معاك، وقتها هيبقى أفضل لو كان عندك خلفية وانت بتسمعله، وكمان هتقدر تقدمله نصيحة لو طلبها منك.
٣- اتصرف باهتمام:
بعض الناس مش هتحب تتكلم عن مشكلة الخصوبة مع حد، وناس تانية ممكن تحتاج تتكلم، في العموم قول لصديقك أو قريبك إنك متاح لو حابب يتكلم معاك في أي وقت.
٤- اسأل عن احتياجاته:
صديقك أو قريبك هيقدرك جدًا لو سألته عن أكتر حاجة حابب يسمعها منك أو عن الحاجات اللي حابب منك إنك تتجنب الكلام فيها.
٥- وفر دعم إضافي للزوج:
مسألة الإنجاب مش قضية متعلقة بالزوجة لوحدها، في الغالب الزوج كمان بيعاني من حزن لكن بصمت، طبعًا متحاولش تجبر صديقك للتعبير عن حزنه، لك يكفي إنك تقوله إنك موجود وحابب تسمعه جدًا لو حب يتكلم.
٦- ادعم قرارهم بوقف العلاج:
مفيش زوجين هيقدروا يتحملوا علاجات الخصوبة للأبد، أكيد هيجي عليهم مرحلة ومش هيقدروا يكملوا، طبعًا قرار مؤلم ومحزن بالنسبالهم، خليك داعم ليهم في قرارهم مهما كان الوقت اللي قضوه خلال رحلة العلاج وبرضه أعرض عليهم فكرة "الكفالة" وعرفهم على الموقع الإلكتروني الخاص بينا أو صفحتنا على مواقع التواصل الاجتماعي.
٧- افتكرهم في عيد الأم:
في عيد الأم الكل بينسى الزوجات اللي مقدروش يكونوا أمهات، لو انتي أخت أو صديقة لزوجة بتعاني من مشاكل في الإنجاب، خدي أولادك وزوري أختك أو صاحبتك وهاتولها هدية بمناسبة عيد الأم.
٨- احضر المواعيد الصعبة معاهم:
لو عرفت من صديقك إنه عنده معاد كشف أو تحليل، اعرض عليه تروح معاه، طبعًا متحاولش تفرض نفسك لو قالك إنه مش ضروري تيجي، عمومًا انت هتحس من رد فعله مدى ترحيبه بوجودك معاه.
٩- اعتني بالأطفال الكبار:
لو صديقتك أو اختك بتعاني من عقم ثانوي، فأكيد هيبقى عندها مشكلة في رعاية أطفالها بسبب مواعيد الكشف والعمليات الكتير، اعرضي عليها إنك ترعي أطفالها في وقت غيابها عشان تبقى متطمنة.
١٠-خليك الشخص الإيجابي في حياته :
الإيجابية طريقه تفكير ومنهج حياة، خليك انت الشخص ده لصديقك او لقريبك، الإيجابيه والتفائل والإيمان وحسن الظن من أجمل وأعمق الأفكار اللي ممكن توصلها بشكل مباشر وغير مباشر.
١٠ حاجات متعملهاش
١- متطلبش منهم الاسترخاء:
تعليقات زي "حاول/حاولي تهدي" بتخلق جو من التوتر للزوجين اللي عندهم مشاكل في الإنجاب، خصوصًا الزوجة، الطلب دا بيحسس الزوجة بإنها بتعمل حاجة غلط، أو إن قلقها مش مبرر.
٢- متقللش من حجم المشكلة:
عدم القدرة على الإنجاب شيء مؤلم جدًا، وتعليقات زي "استمتع/ي بحياتك وبقدرتك على النوم براحتك/ السفر/ الخروج.." كلها تعليقات بتحسس الشخص اللي بيعاني من مشكلة في الإنجاب بإنك بتقلل من حجم مشكلته.
٣- متحاولش تهون عليهم بإنك تقولهم "كويس إنها جت على أد كدا":
أولاً دا مش شيء كويس بالنسبة لهم ، ثانيًا إنت متقدرش تحكم إيه أسوء شيء ممكن يحصل لغيرك لأن الأشخاص بتتفاعل مع تجارب الحياة بشكل مختلف، ودا ممكن يكون أسوء شيء ممكن يحصلهم من وجهة نظرهم.
٤- متسألش "ليه مجربتوش التلقيح الصناعي/أطفال الأنابيب/...؟":
في الواقع علاجات الخصوبة مكلفة جدًا، ومش كل الناس عندها القدرة على تحمل تكاليفها، أكيد هما عارفين خيارات العلاج المتاحة وعارفين إيه مناسب لقدرتهم، ومش محتاجين منك تفكرهم بمشكلتهم.
٥- متقوليش "انتي لسه صغيرة، ولسه عندك وقت طويل عشان تحملي":
في الحقيقة كونها صغيرة ممكن يزيد من فرص الحمل لكنه مش ضمان لنجاحه، وفي العموم كل ما العلاج بيتأخر والزوجة تكبر في السن كل ما بتقل فرصة نجاح العلاج.
٦- متاخدش حالة صديقك كمثال تضربه في كل مكان:
ناس كتير بتعتبر موضوع علاج الخصوبة مسألة خاصة جدًا، احترم خصوصية صديقك وحافظ على أسراره.
٧- بلاش تعليقات غير حساسة ولو على سبيل الهزار:
مينفعش تقول نكت وتهزر على موقف صديقك، كلام زي "إيه رأيك أتبرعلك بحيواناتي المنوية " أو "اتأكد إن الدكتور هيستخدم حيواناتك المنوية في التلقيح" كل دي تعليقات سخيفة ومش مضحكة أبدًا، وهتضايق صديقك وهتخليه يندم إنه في يوم قالك على حاجة تخصه.
٨- متشتكيش من حملك:
حاجة من الحاجات الصعبة على الزوجات اللي بتواجه تحدي في الإنجاب، إنها تبقى موجودة في مكان فيه أمهات كتير، وكل واحدة منهم بتشتكي من حملها ومن أولادها، تجنب الشكوى من الحمل ومن الأولاد وتجنب الكلام في المواضيع المتعلقة بالحمل ممكن يخلي الوضع أسهل على صديقتك او قريبتك.
٩- متشككش في حزن صديقك/ صديقتك لأنهم بيعانوا من عقم ثانوي:
إنجاب طفل مش معناه إن الزوجين خلاص مش محتاجين لأطفال تاني، أو خلاص الزوجين حاسين إن أسرتهم اكتملت، الشعور بالحزن بسبب العقم الثانوي حزن حقيقي مينفعش أبدًا تقلل منه.
١٠ - متسألش "العيب عند مين فيكم؟":
مش معنى إن صديقك قالك إن هو وشريك حياته بيواجهوا تحدي في الإنجاب إنه مستعد يشاركك تفاصيل شخصية زي دي.
