من الأسئلة اللي بتشغل بال كل الأسر المقبلة على الكفالة
"هو أنا هقول للناس إيه؟"
"طب يا ترى رد فعلهم هيكون إيه؟
"طب أمي وأبويا هيدعموني ولا لأ؟"
"طب أقول لمين، وأقوله امتى وإزاي؟"
قلق شديد بيصيب الأسر المقبلة على الكفالة خصوصًا بسبب خلفيات وأفكار الناس الغلط عن أطفال دور الرعاية وعن الكفالة
في "كفالة" بنقدملكم 4 نصايح تساعدكم تعملوا إيه؟ وتعرفوهم امتى وإزاي؟
1- قرر هتقول لمين وامتى:
نظرًا إن إجراءات الكفالة بتاخد وقت كبير جدًا غير الوقت المستهلك أساسًا في أخد القرار، فطول المدة دا بيخلي بعض الناس محتاجة دعم من أهلهم أو أصحابهم، ودا اللي بيدفع بعض الأسر إنها تقول لصديق مقرب أو حد من العيلة في مرحلة البداية بسبب حاجتهم للدعم، ووقتها بيختاروا الأشخاص اللي فعلًا متأكدين إنهم هيدعموهم.
وفي أسر تانية بتختار متعرفش حد إلا لما تخلص إجراءتها وتختار الطفل وتتأكد إنها خلاص هتستلمه، عشان تعفي نفسها من الأسئلة والتوتر..
ففي النهاية مفيش وقت صح أو وقت غلط، اختاروا الوقت اللي يناسبكم، ولا في شخص بعينه مفروض تقولوله، اختاروا الأشخاص اللي هتدعمكم في رحلتكم.
2- خليك مستعد للأسئلة:
بمجرد ما اللي حواليك هيعرفوا الخبر طبيعي هيبدأوا يسألوك أسئلة زي "هو انتو هتستلموا الطفل امتى؟"
"هو انتو إزاي هتربوا طفل مش شايل اسمكم؟"
"هو انتو إزاي متأكدين إنكم هتحبوه؟"
للأسف في أسئلة هتستفزك أو هتضايقك، فخليك مستعد لكل سؤال ومتاخدهوش بشكل شخصي، واعتبر دي فرصة عشان تعرف الناس على الكفالة أكتر وأكتر لعلك تساعد في تغيير أفكار بعض الناس عن الكفالة.
3- خليك مستعد لمواجهة الأساطير:
هتسمع خرافات كتير بحكم جهل بعض الناس وأفكارهم اللي بياخدوها من الأفلام والمسلسلات، هتلاقي اللي يقولك "دا الأطفال دي بيبقى عندها مشاكل نفسية لما تكبر" وهتلاقي واحد يقولك "أنا سمعت إنهم بيكون عندهم تأخر في النمو"
برضو هنقولكم متاخدوش الأمور بشكل شخصي، وظيفتكم تكسروا صنم الجهل عند الناس وتعرفوا اللي حواليكم إن الأطفال المكفولين أطفال طبيعية جدًا محتاجين حب ورعاية وأسرة.
4- الأجداد والجدات هيحتاجوا وقت:
برغم إنهم نفسهم في حفيد إلا إن تقبل الأمر عليهم بيكون صعب في البداية، لأن في بعض الأفكار التقليدية بتكون مسيطرة عليهم، زي فكرة احنا نفسنا في حفيد من دمنا يشيل اسمنا، احنا نفسنا في حفيد شبهنا، غير قلقهم من فشل تجربة الكفالة لأنهم مجربوهاش قبل كدا، وخوفهم على أولادهم من الإحباط.
أفكار كتيرة بتخلي الأجداد والجدات موقفهم مش داعم، هنا وظيفتكم إنكم تحركوهم في اتجاهكم، هاتولهم كتب عن الكفالة، احكولهم قصص ناجحة عن أسر كافلة، ضيفوهم على صفحتنا "كفالة" وكل الصفحات اللي بتدعم الكفالة، خدوهم معاكم وانتو بتخلصوا إجراءاتكم لو يقدروا، خلوهم يحسوا بشغفكم وتعبكم، ولو كل دا محركهمش، إدوهم وقتهم بس، وهما بمجرد ما هيشوفوا الطفل هيحبوه كأنه حفيدهم من دمهم ...
أيوة هتقابلكم صعوبات وتحديات كتيرة هتحتاجوا تواجهوها بصبر وحكمة وسعة صدر كبيرة جدًا، بس في الآخر هتعرفوا إن كفالة طفل تستحق أكتر من كدا بكتير وإن رحلة التعب دي أخرتها حلوة أوي وابنكم بيكبر قدام عينيكم.
