الكفالة ممكن تكون أجمل هدية تقدمها لطفل محتاج لبيت وأسرة، بس للأسف الهدية دي ممكن تكون أسوء شيء ممكن تقدمه لطفل لو الكفالة حصلت لأسباب غلط.
قبل ما تاخد قرار الكفالة اتأكد إن الأسباب الموجودة هنا دي مش من ضمن دوافعك للكفالة، ولو واحد من الأسباب دي كان من ضمن دوافعك للكفالة، فانت هتحتاج تعيد التفكير من تاني قبل ما تاخد قرارك بالكفالة.
طب إيه هي الدوافع الخاطئة للكفالة؟
1- الإحساس بالذنب:
لو هتكفل طفل عشان بس حاسس بالذنب تجاه الأطفال الموجودة في دار الرعاية، أو عشان حاسس إنك لو معملتش كدا هتبقى مذنب في حقهم بدون التفكير في قدرتك على رعاية طفل أو التفكير في قدرتك على الكفالة وكل القضايا المتعلقة بيها، فانت لسه مش مؤهل للكفالة.
2- ضغط العائلة والأصحاب:
هل عايز تكفل طفل بسبب ضغط من عيلتك أو بسبب ضغط من صديق ليك كافل لطفل، لو حصل وحسيت إن في حد بيدفعك ناحية الكفالة وان دي مش رغبتك الحقيقية، فانت لسه مش مستعد للكفالة.
3- عدم القدرة على تقبل تحديات الإنجاب:
عجزك عن التصالح مع عدم قدرتك على الإنجاب ممكن يضر بطفلك المكفول، ضروري إنك تتصالح مع خسارتك وتتقبل مشاعر حزنك تمامًا، لأن مش من العدل إنك تدخل طفل أسرتك كبديل لطفل تاني مقدرتش على إنجابه، عشان متبقاش انت مصدر لخيبة أمل الطفل دا، ضروري إتك تتصالح مع مشاعر الحزن اللي جواك، ولما تحس بالرضا التام وإن الكفالة ماهي إلا وسيلة تانية مش وسيلة بديلة لبناء أسرتك خد قرارك.
4- ابنك محتاج طفل يلعب معاه:
مينفعش يكون غرضك من الكفالة هو تلبية احتياجات أسرتك أو طفلك، مينفعش تكفل طفل عشان ابنك محتاج طفل يلعب معاه، للمرة التانية هتبقى انت مصدر خيبة أمل للطفل دا وغالبًا الكفالة بالشكل دا مش هتنجح، ممكن تشترك لطفلك في نادي أو أي نشاط يتعرف فيه على أصحاب يلعب معاهم.
5- انقاذ علاقتك بشريك حياتك:
الكفالة مش وسيلة انقاذ للزواج الفاشل أو المضطرب، آه انتوا في البداية هتنشغلوا بالطفل عن مشاكلكم الأساسية، بس الإلهاء دا مش هيدوم كتير، فترة وهترجع مشاكلكم تظهر وبالعكس هيبقى الضغط أكبر في حالة وجود طفل، فمش من العدل أبدًا انكوا تجيبوا طفل لبيئة مضطربة غالبًا هتنتهي بالانفصال، ولا انكم تحملوا الطفل مسؤولية انقاذ زواجكم المضطرب.
6- متلازمة العش الفارغ:
بعض الأسر وغالبًا الأمهات بعد زواج أولادهم أو سفرهم بيحسوا بالوحدة الشديدة وبيحسوا بقلق شديد جدًا، الحالة دي بتتسمى بـ "متلازمة العش الفارغ" بعض الأمهات بتفكر في كفالة طفل يملى الفراغ اللي في البيت، وحقيقي الكفالة مش هي الحل الأمثل في المواقف دي، لأنك برضو بتكفل طفل عشان تسد احتياجاتك مش احتياجاته هو، في أكتر من طريقة تانية ممكن تملى بيها فراغك، إلا لو كنتي متأكدة تمامًا من رغبتك في توفير حياة كريمة لطفل وتوفير احتياجاته المادية والنفسية والعاطفية، وعندك وقت فراغ كبير وطاقة حب هيساعدوكي على كفالة طفل.
7- شريك حياتك عايز يكفل طفل:
متوافقش على كفالة طفل لمجرد إرضاء شريك حياتك لو انت مش مقتنع، لو مش مقتنع قول رأيك بصراحة بدون ما تعمل حاجة انت مش متقبلها، لما تعالجوا خلافاتكم دلوقتي، أفضل من إن طفل يدخل أسرتكم ويحس فيها بالرفض من حد منكم.
8- حاسس إنه نداء الواجب:
الكفالة مش وسيلة لسداد ديونك للمجتمع، كفالة طفل من باب الإيثار مش كفاية لإعالة طفل لحد مرحلة البلوغ، لازم تكون كفالة الطفل شيء نابع من رغبتك في توفير حياة كريمة لطفل وتوفير احتياجاته المادية والنفسية والعاطفية بدون احساسك بإنك ظالم نفسك أو جاي على نفسك أو بتقضي واجب.
نصيحتنا ليك:
لو حاسس إنك عندك مشاعر متضاربة بخصوص قرار الكفالة، فاحنا بننصحك تستشير حد متخصص، أحيانًا بيكون من الطبيعي إنك تبقى مش متأكد من قرار مهم زي دا خصوصًا لو عندك مشاكل في نفس وقت أخد قرارك مسببالك حزن، وسواء كنت بتحاول تحل المشاكل دي أو سواء كنت مش قادر تحدد إذا كان هو دا الوقت المناسب للكفالة ولا لأ، فاستشارة حد متخصص أو حتى الفضفضة مع حد عنده خلفية ممكن يساعدك كتير عشان توصل لقرارك.
