مشاركات للأسر الكافلة عن اختيار سن طفلهم المكفول
مفيش أسرة مقبلة على الكفالة إلا وسألت نفسها، إيه سن الطفل المناسب لينا؟ هل الأفضل نكفل طفل رضيع؟ ولا طفل أكبر في مرحلة المدرسة؟ ولا مراهق؟ هل الأفضل نكفل طفل واحد ولا اتنين أو أكتر؟
ولأن اختيار سن الطفل المكفول من العوامل المهمة جدًا لنجاح الكفالة، قررنا إننا نسأل بعض الأسر الكافلة عن كيفية اختيارهم لسن طفلهم المكفول، وإزاي قدروا يحددوا السن المناسب ليهم، وبالفعل قدرنا نحصل على 8 مشاركات من الأسر الكافلة:
1- أم كافلة:
"أنا كنت عايزة أكون أم لطفل حديث الولادة، مكنتش عايزة أفوت أي لحظة ممكن تربطني بطفلي، وكان نفسي أجرب الأمومة من اللحظة الأولى لطفلي، عشان كدا كنت أخدت قراري بكفالة رضيع"
2- أم كافلة:
"أنا عندي أطفال بيولوجيين، وبحكم تجربتي كنت عارفة إن أصعب مرحلة هي مرحلة الرضاعة، عشان كدا كان نفسي أكفل طفل تجاوز مرحلة الرضاعة والحفاضات، كنت عارفة كويس أن نقاط القوة عندي أنسب أكتر لطفل بين 3 و 8 سنين، عشان كدا لما أخدت قرار الكفالة قررت أكفل طفلة عمرها 6 سنوات، حقيقي البنت جميلة جدًا، ومدهشة، وعندها قدرة كبيرة على المرونة والارتباط، أنا فعلًا فخورة بيها"
3- أب كافل:
"احنا كنا عايزين نكفل طفل أصغر من بنتنا البيولوجية، وفعلًا اختارنا أنس وكان عمره 11 شهور وكان أصغر منها بحوالي 15 شهر"
4- أم كافلة:
"احنا عانينا من مشاكل الإنجاب والإجهاض أكتر من مرة، وكان نفسنا نكون أب وأم لكل المراحل العمرية، كفلنا بنتنا في عمر 3 شهور، وحاليًا عمرها 3 سنين، وبنفكر حاليًا إننا نكفل طفلة كبير من الأطفال اللي قربت على سن المراهقة أو قربت تخرج من الدار"
5- أب كافل:
"في البداية كنا مقررين إن الأفضل بالنسبالنا إننا نكفل طفل بين 7 لـ 9 سنين، كنا عارفين كويس إن سننا وصحتنا متسمحش بكفالة طفل رضيع، الموضوع محصلش زي ما كنا متوقعين، لأننا في النهاية كفلنا أخين عمرهم 4 سنين و 11 سنة، انت مش بتختار اللي انت عاوزه، إنت بتختار اللي هما محتاجينه"
6- أم كافلة:
"كنت حاسة إني محتاجة لطفلة عمرها بين 10 و 14 سنة، مكنش عندي أي خبرة في التعامل مع مولود جديد أو طفل صغير، بشكل عام حسيت إن الاطفال أقل من 5 سنين مش مناسبين ليا خصوصًا إني غير متزوجة، الأطفال في عمر 10 سنين بيقدروا يتكلموا ويضحكوا ويهزروا، وبالفعل الحمد لله قدرت أكفل بنوتة في عمر 11 سنة، وعايشين حاليًا في سعادة وحب ملهمش وصف"
7- أب كافل:
"كان نفسنا في طفل رضيع، لأن كان عمرنا صغير وكنا بنعاني من مشاكل في الإنجاب، كنا نفسنا في طفل نعيش معاه كل تجارب الأمومة والأبوة، ونشوفه وهو بيكبر قدامنا خلال كل مراحل حياته، ونشيله بين ايدينا ولما يكبر يقولنا بابا وماما، مكنش في توقعاتنا أبدًا إننا نكفل طفل كبير، لكن سبحان الله ربنا غير قلوبنا وأفكارنا بمجرد ما شوفنا بنتنا، كفلناها في عمر 8 سنين، وفعلًا كفالتها كانت أحسن قرار أخدناه في حياتنا كلها"
8- أم كافلة:
"مكناش مقررين عمر الطفل اللي هنكفله، بالرغم من إني كنت بتمنى أكفل طفل أكبر من 5 سنين لأني كنت عارفة إن فرصته في الكفالة أقل، لكن في النهاية كفلنا طفل عمره سنة"
اختيارك لعمر طفلك المكفول ضروري يتناسب مع ظروفك وقدراتك، لكن أحيانًا القدر بيتدخل وقلوبنا هي اللي بتختار أولادنا، وقتها مش بنفكر في عمره مناسب ولا لأ، أد ما بنفكر إمتى هناخده معانا البيت.
