مفيش أسرة كافلة إلا وكانت دايمًا منتظرة الدعم من أفراد عيلتها وأصدقاءها، واحنا في "كفالة" بنسعى لدعم الأسر الكافلة بكل الطرق.
عشان كدا لو انتو أهل أو أصدقاء لأسرة كافلة جديدة فاحنا بنقدملكم هنا ٥ طرق مهمة لتقديم الدعم للأسر الكافلة خصوصًا خلال الفترة الأولى من وصول طفلهم:
١. حط في اعتبارك إن الطفل محتاج وقت عشان يستقر :
لو الطفل المكفول كان كبير في السن أو مش رضيع فدا معناه إنه على الأغلب مر بتجارب كتير سيئة قبل وصوله، سواء كانت التجارب دي مرتبطة بأسرة النسب أو بوجوده في دار الرعاية قبل كفالته، كل الاضطرابات ومشاكل الثقة اللي مر بيها الطفل معناها إن الطفل هيحتاج وقت عشان يقدر يستقر داخل أسرته ويصدق فعلًا إنها أسرة دايمة.
٢. اظهر للآباء الكافلين تفهمك لصعوبة المرحلة اللي بيمروا بيها:
أحيانًا بيبقى صعب على الطفل إنه يتكيف مع عملية انتقاله من دار الرعاية المألوف بالنسباله لأسرته الجديدة في بيت جديد، وأحيانًا بيبقى صعب على الوالدين التعامل مع طفلهم في البداية، عشان كدا من المفيد والداعم جدًا للأسر الكافلة إنك تعترف بمدى صعوبة المرحلة اللي بيمروا بيها وتدعمهم نفسيًا وعاطفيًا.
٣. متتوقعش إن الطفل المكفول هيتصرف زي باقي الأطفال خصوصًا في مراحل الكفالة الأولى :
كتير من الأطفال المكفولين بيكون عندهم فقدان للثقة في الكبار، وبيتعاملوا مع عدم الثقة دي بعدة طرق منهم اللي بيتفاعل بطريقة أكبر من سنه عشان يتظاهر قدام الكبار بإنه مش محتاج لرعايتهم، ومنهم اللي بيكون ودود جدًا مع الناس الغريبة لكنه بيتعامل برفض شديد مع آباءه الكافلين، ومنهم اللي بيتعمد يظهر عدم قدرته على إتمام المهام المتوقعة من طفل في سنه،
ممكن تكون الأسرة الكافلة بتمر بواحدة أو اتنين من السيناريوهات دي، والسبب ورا السلوكيات دي هو عدم ثقة الطفل في الكبار وخوفه من التعلق بشخص قد يتخلى عنه بعد كدا، فهمك المتعاطف لسلوكيات الطفل هيساعد الآباء الجدد وهيدعمهم بشكل كبير جدًا.
٤. حاول تفهم السبب وراء السلوكيات الصعبة للطفل :
السلوكيات الصعبة اللي بيظهرها الأطفال المكفولين مش سلوكيات متعمدة، الأطفال المكفولين بيحاولوا يُظهروا من خلال سلوكياتهم مدى شعورهم بالحزن، ومحتاجين يتعلموا من جديد معنى الانتماء للأسرة، خليك مدرك إن الحاجات العادية المسلم بيها واللي ممكن يفهمها أي طفل بسهولة، ممكن ميبقاش سهل على طفل مكفول إنه يفهمها من غير ما تتشرح ليه، وكمان ممكن يحتاج لشرحها أكتر من مرة.
٥. دعم الآباء الكافلين :
الأطفال المكفولين بيحتاجوا في البداية للوقت وللتشجيع عشان يتعلموا يثقوا في آباءهم الجداد، ومهمة الآباء في البداية بتتمثل بشكل أساسي في تشجيع أبناءهم على الاعتماد عليهم في تلبية احتياجاتهم، وانت تقدر تساعد الآباء في مهمتهم عن طريق تعزيز فكرة إنهم المسؤولين عن أي شيء خاص بالطفل حتى لو بطرق بسيطة، فمثلًا، لو الطفل طلب منك عصير أو بسكويت أو أي شيء، قوله "خلينا نسأل ماما/بابا الأول ونشوف ينفع نشرب عصير دلوقتي ولا لأ" أو لو الطفل جه قعد معاك في مكان بعيد عن نظر أسرته قوله "ياريت لو تقول لماما إنك قاعد معايا هنا"... وهكذا، حط في اعتبارك إن التدخلات من النوع دا واللي بتدعم الأسر الكافلة في الشهور الأولى مهمة جدًا وليها قيمتها الكبيرة.
شكرًا ليك على وقتك اللي قضيته في قراءة المقال دا، اهتمامك بقراءته معناه إنك هتلعب دور مهم جدًا في حياة الأسرة الكافلة وطفلهم المكفول في السنين الجاية.
