الكفالة هي واحدة من أهم الخيارات المتاحة لما بيكتشف بعض الأزواج وجود تحديات في الإنجاب سواء بسبب الإجهاض المتكرر أو بسبب العقم أو لأسباب تانية كتير.
الأزواج اللي بيعانوا من مشاكل في الخصوبة أو عدم القدرة على الإنجاب بيبقى ليهم عدد من الخيارات المتاحة عشان يقدروا يحققوا حلمهم في الأمومة والأبوة من خلالها، والخيارات دي بتتمثل في ٤ اختيارات وهما؛
1- تقنيات المساعدة على الإنجاب (الحقن المجهري وغيره من علاجات الخصوبة)
2- كفالة طفل يتيم في البيت
3- الانتظار وترك الحياة تاخد مجراها
4- أخد قرار الحياة بدون أطفال
ونظرًا لأن معظم الخيارات دي ممكن تكون متاحة ومناسبة لكل الأشخاص، فاحنا في "كفالة" بننصح أي شخص بيعاني من تحديات في الإنجاب إنه يقضي فترة كافية يبحث فيها عن المعلومات والاستشارات والنصايح عشان يقدر يوصل لأفضل خيار مناسب ليه، ممكن تسألوا الطبيب الخاص بيكم عن نصيحته، وممكن كمان تطلبوا استشارة حد متخصص في أمور الكفالة..
الكفالة
لو انت أحد الزوجين اللي بيعانوا من تحديات في الإنجاب ومعتبر الكفالة واحدة من ضمن خياراتك المتاحة، فاحنا في "كفالة" بنقدملك 7 حاجات ضروري تعرفها عن الكفالة:
1- عندك فرصة لكفالة طفل لحد ما يبقى عندك 60 سنة:
ودا طبعًا على عكس تقنيات الإنجاب المساعدة اللي ليها حد معين في السن، عشان كدا إنت مش هتحتاج تستعجل في قرارك، وكمان عملية الكفالة بقت أسرع في الوقت الحالي عن قبل كدا، وفي الغالب مش بتاخد وقت أطول من 6 شهور في حالة استيفاء للشروط، والخبراء بينصحوا أي زوجة إنها تاخد فترة راحة كافية بعد أخر اجهاض حصلها أو بعد آخر محاولة علاج مرت بيها قبل ما تاخد قرار الكفالة.
2- الكفالة هي وسيلة رائعة لبناء أسرتك لكنها مش بديل عن الحمل:
ضروري جدًا إنكم تاخدوا وقتكم في التعامل مع مشاعر الحزن والخسارة اللي مريتوا بيها وتتصالحوا مع فكرة عدم القدرة على الإنجاب، عشان تقدروا بعد كدا تستعدوا عاطفيًا للكفالة وتكرسوا كل طاقتكم ليها، وضروري قبل ما تاخدوا خطوة الكفالة إنكم تحسوا باستعدادكم الكامل ليها من جميع النواحي خصوصًا من الناحية العاطفية.
3- انت مش محتاج تجرب علاجات الخصوبة قبل الكفالة:
ممكن تكون الكفالة هي الاختيار الأول المناسب ليك في حالة عدم القدرة على الإنجاب، على سبيل المثال: في بعض الناس بيبقى عندها اعتراضات أخلاقية أو دينية على تقنيات الإنجاب المساعدة، وفي ناس تانية مبيكنش عندها قدرة على تحمل الآثار الجانبية للعلاج، وفي اللي مبيبقاش عنده قدرة على تحمل تكاليف العلاج، وفي أزواج بيبقى عندها تخوف من نسب النجاح الضئيلة لتقنيات الإنجاب المساعدة، وفي اللي بيكون شايف إن تربية طفل وتقديم الحب والرعاية ليه أهم بكتير من وجود علاقة جينية تربطه بطفله، عشان كل الأسباب دي انتو مش مجبرين على خوض التجربة العلاجية طالما كانت غير مناسبة ليكم، وممكن تاخدوا قراركم بالكفالة بدون ما تخضعوا لأي علاج لو كانت دي رغبتكم.
4- انتي مش محتاجة تكوني متزوجة عشان تكفلي طفل:
القانون المصري بيسمح لأي سيدة غير متزوجة إنها تكفل طفل لو كانت تمت سن الـ 30 مادامت مستوفية لباقي الشروط.
5- انتم عندكم القدرة تكونوا آباء كافلين:
أثبتت الأبحاث إن الزوجين اللي بيمروا بتجارب صعبة مع بعض زي تجربة عدم القدرة على الإنجاب وتجربة علاجات الخصوبة بتكون علاقتهم قوية ومرنة وبيكون عندهم قدرة أكبر على مواجهة المشاكل والتحديات عن غيرهم من الأزواج اللي ممروش بظروف مشابهة، ودا بيخلي عندهم قدرة أكبر على مواجهة مشاكل وتحديات الكفالة وكمان مشاكل الأمومة والأبوة.
6- لو عندك أطفال بالفعل حط في اعتبارك احتياجاتهم:
لو بتعاني من عقم ثانوي بعد ولادة سابقة، فممكن تكون الكفالة هي حلكم الأمثل لزيادة عدد أفراد أسرتكم، وضروري وقت ما تاخدوا قراركم بالكفالة إنكم تحطوا في اعتباركم احتياجات أطفالكم الحاليين، وضروري يكون في فجوة عمرية بين أصغر طفل عندك وطفلك المكفول عشان كل طفل ياخد مساحته، وبينصح الخبراء إن الفجوة العمرية بين الطفلين تكون أكتر من سنتين.
7- تقدر تكفل طفل من عمر 3 شهور وحتى 16 سنة:
الأزواج اللي بتعاني من عدم القدرة على الإنجاب غالبًا بتسعى لكفالة طفل رضيع، وكل ما كان الرضيع سنه أصغر كل ما كان عندهم رغبة أكتر في كفالته، رغبة طبيعية بالنسبة لحد عايز يجرب مشاعر الأمومة والأبوة بصورة كاملة من بدايتها، بس يفضل لو تحطوا في اعتباركم إن كل الأطفال اللي بحاجة لأسر، مش بس الأطفال الرضع، أي طفل مهما كان سنه فهو محتاج للحب والرعاية والاهتمام وهتحسوا معاه بكل مشاعر الأمومة والأبوة اللي محتاجين تحسوها.
بعد ما اتعرفتوا على الكفالة كأحد الخيارات المتاحة في حالة عدم قدرتكم على الإنجاب تقدروا تقرروا إذا كانت الكفالة هي الاختيار المناسب ليكم أو لأ عن طريق تحميل دليلنا "هل الكفالة مناسبة ليك؟" من موقعنا الإلكتروني من قسم "ملفات الدعم"-
